Ekisodha 24
24
Gidzumeledzwano gya Nungungulu ni Israyeli
(Josuwa 24:16-22; Matewu 26:28; Vahebheru 9:18-22)
1Nungungulu a di embela Mosi, khuye: “Lita ga Pfhumu Nungungulu wago, uwe, Aroni, Nadhabhi, Abhiyu gumogo ni vale nya livbandre na mavili magumi madhota ya Israyeli; mu ta khidzima khu hwindzo. 2Mosi a na hidzimela ekha ga Pfhumu Nungungulu. Aholu avo kha va na nga hidzimela ambari vathu va nga liti naye gigomoni.”
3Mosi a di wuya a ta embeledzela vathu magana yatshavbo a nga ganelago Pfhumu Nungungulu, ni sileletelo satshavbo; vathu va di hakha khu lito limwedo, khavo: “Ethu hi na landrisa magana yatshavbo aya a ganedego Pfhumu Nungungulu.” 4Mosi a di lova magana yatshavbo ya Pfhumu Nungungulu.
A di wuga ni dzimindru ngudzu, a gira giluvelo vbavbatshi nya gigomo, a di vbaha likhumi na mavili madingo, gukhedza khu likhumi na mavili mahundzu ya Israyeli. 5A di rumela madzaha nya sanana sa Israyeli va ningela miphaso nya guvbiswe; va paya dzimombe, va gu ningela dzimhamba nya pwanano ga Pfhumu Nungungulu. 6Mosi a di vbungula wumbe novba dzikhalini, wumbe a mitegedzela khuwo giluvelo.
7A di dzega libhuku nya gidzumeledzwano a hevbula na gu pwidwa khu vathu, avo va hakha, khavo: “Satshavbo esi Pfhumu Nungungulu a ganedego, ethu hi na si gira ni gu si yingisa.”
8 # Wona gambe: Mat 26:28; Mark 14:24; Luk 22:20; 1 Kor 11:25; Hebh 10:29. Khu guralo, Mosi a di dzega novba a gu mitegedzela khuwo vathu, khuye: “Owu khu novba nya gidzumeledzwano egi Pfhumu Nungungulu a hungidego nanu khu magana yatshavbo yaya.”
Nungungulu a ngu dzi wonegisa ga Mosi
9Mosi, Aroni, Nadhabhi, Abhiyu gumogo ni livbandre na mavili magumi madhota ya Israyeli va di lita gigomoni, 10va ya wona Nungungulu wa Israyeli. Vbavbatshi nya migondro yaye gu di romo gilo nya gufanane ni giwindri nya guvatwe nya safira, nya guphatime kha nga ndzadzini. 11Nungungulu kha bayisa khu mandza yaye sihathwa sesi nya sanana sa Israyeli; aholu si di wona Nungungulu si vbedza si hodza ni gu sela.
Mosi gumogo ni madhota va ngu gwela nyaluphye gigomoni
12 Pfhumu Nungungulu a di embela Mosi, khuye: “Lita u ta eno gwangu tshokatunu nya gigomo; u na khala iyo gasi nyi gu ninga sivatu nya siwindri nyi lovidego avbo milayo ni sirumo u fanedego gu va hevbudza.”
13Mosi a di khuga ni githumi gyaye Josuwa va gwela gigomo gya Nungungulu. 14A di embela madhota, khuye: “Enu hi vireleni avba kala hi wuya hi ta mi mana. Aroni ni Huri va na tshala nanu; muthu watshavbo a na gu bani nari ni mahungu a na ma bikela gwawe.”
15Mosi na litide gigomoni, lipfhi li di fenengedza gigomo. 16Khavbo avbo, wudhumo wa Pfhumu Nungungulu wu di ngangamela vbatshani nya gigomo gya Sinayi, lipfhi li di fenengedza gigomo livbandre na limwedo matshigu. Khu litshigu nya livbandre na mavili Pfhumu Nungungulu a di rana Mosi khu ndrani nya lipfhi. 17Mahoni ga sanana sa Israyeli, wudhumo wa Pfhumu Nungungulu wu di wonega kha nga nilo wu dzurago vbatshani nya gigomo. 18#Wona gambe: 9:9. Mosi a di bela vbakari nya lipfhi a gu lita vbatshani nya gigomo. Mosi a di ya khala gigomoni gipimo nya magumana matshigu, wutshigu ni mihani.
Iliyochaguliwa sasa
Ekisodha 24: BGE2014
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
A Bíblia em Gitonga © Bible Society in Mozambique, 2014.