LITANGA 48
48
Yakobo Yagasiza Efuraimu na Manase
1Inyima wa yaga, Josefu yavolerwa ndi baba weve aveeye mulwaye ligali. Kunangwa Josefu yavugula vayaayi veve vaviri, Manase na Efuraimu, ma nazia harara navo kolola baba weve. 2Lwa Yakobo yavolerwa ndi muyaayi weve Josefu yaazi kumulora, yidinyiriza ma niyikara ku kidali. 3Yakobo yavolera Josefu, “Nyasaye Wuvunyali yaloleka ku inzi ha Luzi mukivala cha Kanaani, ma nangasiza. 4Yambolera, ‘Inzi ndakuha lwivulu lwa vana vanyingi, kunangwa visukululwi vivio navive zihiiri zinyingi. Ndahaana kivala yiki ku visukululwi vivio keve miandu jaavo mihiga ni mihiga.’ ”
5Yakobo yaazizagilira kovora, “Avayaayi vovo vaviri, Manase na Efuraimu, avuwivulira mukivala cha Egebeti inzi ni ngikiri kuzayo, vaveeye avange, kuli Rubeni na Simioni. 6Niiva ulivuula vana vandi inyima wa yava, valava avoovo. Imiandu javalinyoola jilakatuli ku Efuraimu na Manase. 7Lwa ndaali ninziranaa kutura Mesopotamia, ndaali novovereri kigira mama woovo Raheli yakuzira mukivala cha Kanaani. Kwali nikwenya kuduuka Efurazi. Kunangwa ndaamuyavira uwene yeyo ahimbi kunzira izizaa Efurazi, kalunu halangangwa Bezelehemu.”
8Lwa Yakobo yalora avayaayi va Josefu, yateeva, “Vayaayi ki yava?”
9Josefu yativura, “Yava na vayaayi vange, ava Nyasaye yahaana ku inzi mukivala cha Egebeti.” Yakobo yavoola, “Valeete hano ku inzi nduuki kuvagasiza.” 10Zimoni zia Yakobo ziali ni zitangi kuvakula kigira uvusakulu. Si yaali anyala kolola vulahi mba. Kunangwa Josefu yaleeta vayaayi veve ahimbi na Yakobo, yavavuusa kandi navakumbelera. 11Yavolera Josefu, “Inzi si ndaganagana ku ndakolola kandi mba, navuzwa kalunu Nyasaye yambugiriyi inzi kolola ivi kandi avana vovo.” 12Maku Josefu yavugula vayaayi veve kutura mu magulu ga Yakobo. Yinama imbiri wa baba weve mu liegehiza.
13Josefu yasunda vayaayi veve ahimbi na baba weve, Efuraimu ku mukono mumosi, na Manase ku mukono mulungi. 14Navuzwa Yakobo yanyira mukono gwigwe mulungi naviika ku mutwi gwa Efuraimu uwaali ku mukono mumosi, kali niiva yaali muyaayi mukekeeke. Kandi yanyira mukono gwigwe mumosi naviika ku mutwi gwa Manase uwaali ku mukono mulungi, uwaali muyaayi muhindira. 15Mulikola ndi, Yakobo yagasiza Josefu; Yavoola;
“Nyasaye wa vaguuga vange Aburahamu,
na Isaka vatumikira, yaanza ugasizi avayaayi yava!
Nyasaye waanzimilira mu limenya liange liosi kuduuka lero,
uyaanze uvagaasizi!
16Engelosi yasoola kutura ku vudamanu vwosi, yaanza uvagaasizi!
Lieta liange harara na mita ga vaguuga vange,
Aburahamu na Isaka gagulikwi avayaayi yava!
Vave ni zinzivulu zia vana
vanyingi kandi visukululwi vinyingi!”
17Lwa Josefu yalora ndi baba weve aviiki mukono gwigwe mulungi ku mutwi gwa Efuraimu, yavihilirwa. Yaatuliza mukono gwa baba weve kutura ku mutwi gwa Efuraimu, ma naguviika ku mutwi gwa Manase. 18Josefu yavolera baba weve, “Si gaveeye ndio mba baba, Manase aveeye muyaayi muhindira, uviiki mukono gwugwo mulungi ku mutwi gwigwe.”
19Navuzwa baba weve yasura navoora, “Muyaayi wange, inzi manyia ichangola. Visukululwi via Manase vilakave zihiiri zinyingi ligali. Efuraimu amwavo weve mukekeeke alakave munene kuye na visukululwi vivie vilakave zihiiri zinene ligali.”
20Kunangwa Yakobo yavagasiza lidiku liene yilio, navoora, “Avandu va Isiraeli valakatumikiri amita ginyu lwa valiva ni vahaana ligasiza. Valakavoole, ‘Nyasaye ayaanze akole ivi kuva kuli Efuraimu na Manase.’ ” Munzira yiyi Yakobo yavika Efuraimu imbiri wa Manase.
21Maku Yakobo yavolera Josefu, “Inzi mbeeye ahimbi kukuza, navuzwa Nyasaye alava harara nivi. Alakwimilira kwirana mukivala cha vaguuga vovo. 22Inzi mbana kivala cha Shekemu ku ivi, navuzwa si mbana ku vamwavo vovo mba. Yiki ni kivala keveeye kenetu ichandavugula kutura ku vandu va Amori mu vulwani.”
Iliyochaguliwa sasa
LITANGA 48: LOGOOLI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©Bible Society of Kenya, 2019