KUTURA 7
7
1Yahova yavolera Musa, “Henza, nziza kokokola ove kuli Nyasaye ku mwami, na amwavo woovo Haruni alakomolomera kuye kuli muporofeti woovo. 2Volera Haruni goosi aga ngulaga, naye alavolera Mwami wa Egebeti aleke vandu va Isiraeli vatuli mu kivala chiche. 3Navuzwa inzi ndadinyia mwoyo gwu Mwami wa Egebeti, kandi kali ndaameeda ligali ivilolekizu kandi iviokogenyia mu kivala cha Egebeti, mwami sialahulira munyi kali hakuzu mba. 4Mwami sialamuhulira mba, maku ndahana mageri ku vandu va Egebeti nokoleta maduywa malulu kuvo, kandi ndatuliza zihiiri ziange, avandu vange, avana va Isiraeli mukivala cha Egebeti nilikalaga linene. 5Maku vandu va Egebeti valamanya ndi inzi mbeeye Yahova, lwa mbana mageri kuvo kandi ndulizi vandu va Isiraeli mu kivala chavo.” 6Musa na Haruni vaakora aga Yahova yavalaga kokora. 7Ing'inga lwa vamoloma ku Mwami, Musa yaali naveeye ni mihiga 80, na Haruni yaali naveeye ni mihiga 83.
Imbimbu ya Haruni yagwa Enzoka
8Yahova yavolera Musa na Haruni, 9“Niiva mwami wa Egebeti aleenya ndi munyi aveene mwimanyie kulikola vilolekizu, volera Haruni avuguli imbimbu yeeye na agilase hasi imbiri wu mwami. Na ilagirung'ana kugwa enzoka.” 10Kunangwa Musa na Haruni vazia ku Mwami kandi, vaakora kuli Yahova yaali naavalagi. Haruni yalasa imbimbu yeeye hasi imbiri wu Mwami wa Egebeti na vatumikiri veve, kandi yagirung'ana nigwa enzoka. 11Maku mwami yalanga avandu veve avageri na vasigitiri. Kandi navo vaakora kindu kilala chere. 12Valasa hasi zimbimbu ziavo, na zimbimbu ziavo, ziagirung'ana kugwa zinzoka. Navuzwa imbimbu ya Haruni yaamira iziavo ziosi. 13Mwami yadinyia mwoyo gwigwe kandi, navula kuhulira Musa na Haruni kuli Yahova yavoola.
Amaduywa ga Mazi kugwa Masahi
14Maku Yahova yavolera Musa, “Mwoyo gwu Mwami wa Egebeti goveeye mudinyu ligali kandi usuyi koleka avandu vazie. 15Kunangwa zia wagane naye mugambazuri lwava nasulungutaa kuzia ha mugera. 16Maku volera Mwami, ‘Yahova, Nyasaye wa Avaheburaina, undumi ku ivi ku kokovoolera oleke avandu veve vazie, kunangwa vaduuki kumusigamira mwigendanyama. Navuzwa kuduuka na kalunu ukikiri kuhulira. 17Yahova Wuvunyali avoora ndi, kolondekana nayaga ulamanya ndi Inzi mbeeye Yahova. Henza, nziza kukuya mugera nimbimbu yiyi, na amazi galagirung'ana kugwa amasahi. 18Zisuzi ziu mugera gwa Naili zilakuza, nu mugera gulafunya vugundu ligali na vandu va Egebeti sivalanyala kunwa mazi gagwo mba.’ ”
19Yahova yavolera Musa, “Volera Haruni avuguli imbimbu yeeye kandi anyiiri mukono gwigwe agiviiki ku amazi gi migera jiosi notogera kali ku zinyanza na madavalia goosi mu Egebeti. Amazi galagwa amasahi, kandi kivala choosi kilava amasahi kali mu viju via magina.”
20Maku Musa na Haruni vaakora kuli Yahova yavalaga. Imbiri wu Mwami navatumikiri veve, Haruni yaginga imbimbu yeeye igulu nakuya mu mugera, na amazi goosi gagirung'ana nigagwa amasahi. 21Zisuzi ziosi ziu mu mugera ziakuza, na gwafunya vugundu ligali. Avandu va Egebeti sivali vanyara kunwa amazi mugwo mba. Amasahi gaali havundu hoosi mu Egebeti. 22Maku vakumu vu Mwami vaakora malala mere ku vukumu, vwavo nu Mwami yaali mudinyu kuli kazozo. Kuli Yahova yaali navooye, Mwami yasura kuhulira Musa na Haruni. 23Mu vogono yivwo, yazia munyumba yeeye yu vwami vugira kali kuvugura ikika. 24Na vandu va Egebeti vosi vayava kulujinga lwu mugera mbula vanyoore amazi gukunwa, kigira sivali vanyara kunwa amazi kutura mu mugera yigu mba.
25Amazi gaali masahi kulwa madiku saba kutura Yahova nakuya mu mugera gwa Naili.
Iliyochaguliwa sasa
KUTURA 7: LOGOOLI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©Bible Society of Kenya, 2019
