ROMA Meijouhw
Meijouhw
Paulus ogu men surad gini dou leng Krisden se cinogo Roma, dauntoba len lesedeb merdoc mes naugb sug en edeiya len aimougtut gini. Anai en auwam an deb ino dag en ousa leng Krisden se Roma gini, dauntoba len lemobsara dau Krisdusero. Doba len laiyan merdocesem naugb len laimo en namcir. Dangga hang, en ens dau areg en esai dou lusud eisaugb Krisdus dara maman geicara dag leng Krisden merijouhw augwan asesa dou len toua. Gin dauwohob, kaba, en acgeij len naugb len lesedeb ara ara deb. Dauntoba len lousa en sug en eihwededau len naugb en esai Mer Geigouhw eisaugb Krisdus dou lusud se leng Spanyol meren hancob toua.
Sug en ou leng se goucimdeb se cinogo Roma, dara en ecic eisaugb sug en ocuncum an len dauwohob, kaba, en ens dau surad men hancob dou len dag Allah emeic gesgigouhwesa dou lusud emogdoc meren geicara ginero. Doba en eic gesgigouhwesa dou len dau sug len merdoc ebdebin an en mer eisaugb Krisdus gin dous (1:17). Anai Paulus ens dou maman dag leng Yahudi dara lugmahara maman maugwan dag sesar men sogougwohob naugb sug maman mabesesar terimda. Dangga hang, Allah emeic gesgigouhwesa dou maman emogdoc maman geicara ginero. Doba ogdoc sug maman mamdoc ebdebin an Yesus Krisdus en dous.
Sug Paulus ens dau Allah men ucina sug en eic gesgigouhwesa dou mamanohob, kaba, en ens dau maireseb menau men meijouhw ucan dou maman deit. Hang en enara dou maman dau sug maman madag hom dara Krisdus ginohob, kaba, dag maman mamedag Allah men moc deitero. Doba maman mamdoc dag hom dara en touohob. Anai sesar dara gomom maran goubesa emakebin maman deitero. Doba Mena Gogoufu esga maman dau maran goubesa augwan gin namcirohob.
Se pasal 5—8, kaba, Paulus ens dau Allah men gomnomna areg en eic dou Musa se menmod Torsina men meijouhw asesa dou maman toua. Anai sug Allah aigdougwo lusud meren sesar ogdoc sug len merdoc ebdebin an Krisdus men geicara naugb maman dous, kaba, dagiro, naugwe hang, en eic men gomnomna dou maman aos dara deita? Dau, kaba, en esulou maman dag maman mamaimo areg maman mamdoc etrij icira gin deitero. Doba sug Mena Gogoufu einesa maman mamdoc mesohob, kaba, dag maman maimo areg en arougb maman gin dous. Anai men goubesa edeinyum naugb maman maimo areg se maireseb menau gin terimda.
Se pasal 9—11, kaba, Paulus ecic eisaugb men lusud leng Yahudi dou maman dag meren geicara ec misis dau lugmahara naugb sug Allah eic gesgigouhwesa dou len toua. Anai aimougtut, kaba, Yesus ens enin ainyes dou leng Yahudi dous dag eni Sud Hom Geigdoc Len Dau Sesar Men Gogom. Dara en esai Allah mer dou len toua. Doba len lemouwan Allah eic gesgigouhwesa dou len ogdoc sug len merdoc ebdebin an Krisdus men geicara naugb lenero. Doba len louwan Allah eic gesgigouhwesa dou len ogdoc sug len leicara laimo Musa men gomnomna gin dous. Dangga hang, Allah en ogod len ledag meriresmougb namcir. Hanoba en ec misis dau lugmahara. Dauntoba sug len merdoc ebdebin an Krisdusohob, kaba, en eic gesgigouhwesa dou len toua. Gin dauwohob, kaba, en esga leng Israel merires deit, dauntoba len merdoc ebdebin an Krisdus. Anai len meriresmougb gini, kaba, dag aihnehineh dous.
Se pasal 12—15, kaba, Paulus ens dau maman Krisden maman geicara dou maman dag maman mamouwunim an maman geicara sug madreg Krisdus mer, dara maman mamedag igdahab naugb sug leng Krisden menenau lemetob icira maman geicara dau Krisdus touwero. Doba maman mamdoc gororogouwim namcir. Dara maman mamdoc emagas anim touwero. Doba maman maicara doum dara mamdoc arjaga terimda, aimo dau mou ouforoho areg Allah eic dou mamanohob anim dous. Dara en ens dau maman geicara dou pemerintah toua.
Se pasal gouwedoc, kaba, Paulus en ou leng se cinogo Roma. Dara en esulou len dougwo gembala areibahau. Dara leng louwan lekebem. Dauwohob, kaba, en arautut maman naugb sug maman magahugouhw an Allah beb huhugb namcir. Anai maman madag hom dara Krisdusohob.
Hancob Aududi:
Paulus ou dara esulou len se goucimdeb Roma aimougtut. 1:1-17
Lusud laugwan lobsara aud sesarohob. 1:18—3:20
Allah men ucina naugb en eigdoc lusud dau sesar. 3:21—4:25
Meijouhw eisaugb merireseb menau se Krisdus. 5:1—8:39
Allah men geicara dou leng Israel. 9:1—11:36
Maman Krisden maman geicara. 12:1—15:3
Paulus ou leng se Roma dara men gesulou gouwedoc. 15:4—16:27
Iliyochaguliwa sasa
ROMA Meijouhw: INOSOU
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
ALLAH MEN GOS DOU MENAU © Indonesian Bible Society 1996, 2016