KORINTUS HWAI 5
5
1Dangga hang, emen emdoc emomomtom dau sug emen emaimo ucina mog erij icira Mer Geigouhw eisaugb Krisdus gin touwero. Doba emen emaiyan emdocesem naugb emen emeicara emaimo gin terimda, anai emen emecinaga dau sug emen emomom, kaba, dag Allah esedeb emen emaga menau geb huhugb se bogo naugb emenohob. Maga gin, kaba, lusud lemesinsin touwero. Doba Allah enin eng esinsin gin dous. Hang emetaha touwero, doba eb beb huhugb namcir. 2-3Dangga sug emen emeb se emen emaga getaha ginaba, kaba, emen emougwaha aud terimda. Anai emen emdoc erleij naugb emen emdeic emen emaga geb se bogo naugb emen emeg se emen toua. Dauntoba sug emen emegohob, kaba, emen ememedag mena touwero. Doba maga gin, kaba, eb naugb emen beb huhugb namcir. 4Hang emen gedig emen emeb se emen emaga getaha gin, kaba, emen emougwahan gin terimda. Anai gini akebin emen namcir. Dara emen ememouwan naugb sug emen emarges dau emen emaga getaha gini touwero. Doba emen emouwan naugb emen emaga menau geb se bogo en baihiron dougwo emen emaga getaha gin dous. Dauntoba eperwei areg getaha gini dag menau beb huhugb toua terimda. 5Dara sud hom areg en esedeb emen naugb ginohob, kaba, eni Allah enin dous. Hanoba en esa Mena Gogoufu se emen emdoc mes. Dauntoba emen emecinaga dag areg en os dou emen ginohob, kaba, en emereiyara hom dou emen touwero. Doba en emeperwei emen emaga menau dag misen toues.
6-7Dangga toua, sug emen emebsa emen emaga getaha gin, kaba, emen emecinaga dag emen emedebeij maman Adehsud touebma. Doba emen emeigtou aigusi dau enaba. Hang areg emen emaimo se cinogo gin, kaba, emogdoc sug emen emeiya en se emen emiresi touwero. Doba dau sug emen emdoc ebdebin an en dous. Doba emen emecinaga dag emen emaga menau eb naugb emen se bogo dag ginohob. Dangga hang, emen emdoc emomomtom dau emen geicara touwero. Doba emen emaiyan emdocesem naugb emen emaimo ucina mog erij gin terimda. 8Hang naugb emenin, kaba, emen ememouwan naugb sug emen emeigtou se cinogo gin deitero. Doba emen emarges dau emen emaga getaha gin deb. Anai gin, kaba, aninim dag emen emugwengga desij emen Adehsud enohob. Dobnaro, kaba, emen emdoc momogo an touwero, doba emen emdoc ebtou namcir.
9Dangga sug emen emugwengga se cinogo ginaba, era sug emen emugwengga desij en, kaba, emen emeic emouwemougb esesa namcir naugb sug emen emeic en medoc eigouhw dou en terimda. 10Anai Allah mer ogod an debohob dag astesda dau maman, kaba, en emesa deseino Krisdus men maija moc. Dauntoba en ogod geigouhw era gecgu deinaugb en, aimo dau enin men geicara dou en toua.
Allah eic gesgigouhwesa dou maman ogdoc Krisdus men geicara naugb maman
11Sug emen emecinaga dag maman Adehsud en ogod aremer aga emen dag ginohob, kaba, gini eic dag emen emahau dau en toua namcir. Dangga hang, emen emarges dau sug emen emenara emaic lusud touwero. Doba emen emeic emouwemougb esesa naugb gini terimda. Dauntoba len lecinaga dag emen emereiyara dou len touwero. Doba dag areg emen emesai dou len gin, kaba, se geica dara emen emdoc hom dou len namcir. Hanoba len merdoc ebdebin an Krisdus gin toua. Allah ecinaga dag emen emdoc mes an gin augwanohob. Dara dan dod dan indina se yen dag yen yousa deisa emen an gin toua terimda. 12Areg dan dog dou yen gini, kaba, aninim dag emen emeigdoumesa emen emoho deseino yen deitei? Naro, doba dan dog augwan gini dou yen, dauntoba sug yen yecinaga gin dag misenohob, kaba, eic dag yen yeimiman emen an gin dou len gus toua. Hanoba yen yenara yaugtarera dougwo lusud gedig len lemeigdoumesa lusud meroho an areg geb se merdoc mesero. Doba len leigdoumesa lusud meroho an areg geb se len meraga dous. 13Dangga hang, sug lusud lowun emen emoho endag mereiyeba emen, kaba, gini dag emen emeicara dou Allah se aremer augwan dous. Era sug emen emdoc dag misen toua, kaba, augwan gini naugb sug emen emousa yen toua terimda.
14Anai emen emdoc eica Krisdus dau sug en eperwei maman mamuhw. Hanoba en omom naugb maman maugwan maman sesar augwan dag gin, kaba, gini aninim dag maman maugwan maimo ucina aud gomom dau sesar men gogom augwan dara en touohob. Sug Krisdus medoc gororougb maman dag ginohob, kaba, emen ememarges dau sug emen emesai Mer Geigouhw eisaugb en dou lusud touwero. Doba en medoc gororougb gin, kaba, arautut emen naugb sug emen emesai en mer gini dou lusud terimda. 15Dara en omom taiba sogo salib naugb maman sesar, dauntoba maman gedig maman mamiresebaba, kaba, maman mamaimo areg maman mamdoc etrij icira dag mohon toua deitero. Doba maman masogwa deisa en mohotimei mohw se aremer augwan toua terimda. Anai enin dous eng ohw en mougt edug naugb maman sesar. Hanoba Allah eigdoumesa en dau gomom aud maireseb menau geb huhugb naugb maman touohob.
16Dangga hang, emen ememaimo lusud meren gauwamara eisaugb ara ara toua deitero. Doba emen emarges dau augwan namcir. Anai sug nosa, kaba, emen emaimo lusud meren gauwamara an Krisdus dag misen toua namcirohob. Doba se lona sug emen emedag hom dara enohob, kaba, emen ememaimo len dag gin deitero. Doba emen emarges dau len touohob. 17Anai gareg en edag hom dara Krisdusohob, kaba, en edag sud hom menau. Hang areg mohon, kaba, augwan ediyebeiya namcir, doba areg menau enohob.
18-19Dara maman madag lusud menau gin, kaba, emogdoc mamanin maman goubesa touwero. Doba Allah enin eng ehilon ucina naugb sug en eic gesgigouhwesa dou maman ogdoc Krisdus men geicara taiba sogo salib naugb maman dous. Hanoba en arougb emen naugb emen emens dau areg graga meijouhw augwan asesa dou lusud toua. Dauntoba len lecinaga dau sug Krisdus en omom naugb meren sesarohob, kaba, dag Allah medoc emeiseisan meren sesar augwan toua deitero. Doba en esedeb len naugb sug en eic gesgigouhwesa ogdoc Krisdus men geicara taiba sogo salib dou len ucugb toua. Hanoba en eigdoumesa emen emoho naugb sug emen emesai en mer gesgigouhwesa gini dou lusud laugwan toua terimda.
20Sug Allah eigdoumesa emen emoho naugb sug emen emesai en mer eisaugb Krisdus dou lusud dag ginohob, kaba, areg emen emesai gin, kaba, aninim dag Allah enin eng esulou yen ogdoc emen dou len toua. Hang emen emesulou yen dara goubesa namcir. Dauntoba yen yemohoiya Allah en mer eisaugb Krisdus gini touwero. Doba yen yen aud en naugb yen yacgeij en, dauntoba en eic gesgigouhwesa dou yen ucugb deit. Anai emen emeperwei Krisdus en mohw naugb ginohob. 21Emen emesulou yen dag gini, anai Krisdus gin, kaba, en emaimo sesar mougwa hom touwero. Hang Allah emeigdoumesa maman sesar augwan deb se eni. Dauntoba sug maman madag hom dara enohob, kaba, sesar men gogom emeb naugb maman toua deitero. Doba Allah aigdougwo maman sesar augwan, hanoba en eic gesgigouhwesa dou maman ucugb ogdoc men geicara taiba sogo salib gin toua namcir.
Iliyochaguliwa sasa
KORINTUS HWAI 5: INOSOU
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
ALLAH MEN GOS DOU MENAU © Indonesian Bible Society 1996, 2016