JAKARIA 4
4
Bibilohe pasali lo oa̒ato tohe
1Malai̒kati tamalo bisala ode laatia boito luli lonao̒ mai wau lopobongu olaatia debo odelo lopobongu mao̒ taa tuutuluhu. 2“Wolo u iloontongamu?” yilintulio.
“Oa̒ato tohe tuwau monto hulawa,” tametao̒ lowatia mao̒. “Tohuudu yitaatio woluo tambati lo winulio, wau topalitio woluo tohe mohelu pitu, u tinggai woluo tambati losumbu mohelu pitu. 3To ambahu oloihi wau olowala lo oa̒ato tohe boito woluo bungo lojaitun dulo bungo.”
4Lapatao̒ wau̒ lohintu mao̒ ode malai̒kati boito, “Wolo u pilopo tomaya mai lo babaa-langiyalo boito, Tuani?”
5“Wolo diila otaawamu?” yilintulio olaatia.
“Diila Tuani,” tametao̒ lowatia.
10bMalai̒kati boito loloi̒ya mai odelaatia, “Opitu tohe boito yito opitu mato lo Eeya u mongimato ngoilanggubu tudu lodunia.”
11Lapatao̒ watia luli lohintu mao̒ olio, “Wolo boliilo odulo batango lojaitun to olowala wau oloihi oa̒ato tohe boito? 12Wolo poli boliilo odulo tango lojaitun totili lo odulo pipa hulawa u mopotolohe winulo jaitun boito?”
13Ualio mao̒ olaatia, “Wolo diila otaawamu?”
“Diila Tuani,” tametao̒ lowatia.
14Tio luli loloi̒ya, “Uito yito duulota tamaa tilulaoto Eeya lo ngoilanggubu aalamu wau tilunu u momaya o-Lio.”
Danti lo Eeya odelei Jerubabel
6Malai̒kati boito lopoa̒hu olaatia lopo tunggulao̒ odelei Jerubabel tahuli botie, “Diila wolo olootolo suludadu wau diila olo wolo olootolumu lohihilao yio̒ mao̒tilapulo, bo wolo rohu-U̒. 7Totaibuto penu boli debo odelo udaa̒ lo hui̒dee mamohei monto talumu. Yio̒ mamuli momongu Belee-U̒, wau tosaaa̒ti yio̒ mopodutu mao̒ botu tau̒wa lopundasi to tambatilio, tau-tauwalo mamo ngiibode meengahu, ‘Donggo boli gagaalio!’ ”
8Lapatao̒ leidungga mai poli tahuli uwewo lonto Eeya. 9Tahudaa-Lio, “Tei Jerubabel malo podutu mao̒ pundasi lo Belee-U̒, wau tio mamo poo̒lapato ngoa̒amila u bilongu boito. Wonu uito motoduo mai, umati-U̒ mamotota mao̒ deu̒ Wau̒ulo tamalolao mai olemu Jakaria ode limongolio. 10aWoluo tamo mandungi diila ohuna polou̒tiya botie. Bo timongolio mamoo̒onto mao̒ tei Jerubabel mamopo tolonga mola dudelo lou̒ momongu lo Belee-U̒, wau timongolio mamo tiwengahe.”
Iliyochaguliwa sasa
JAKARIA 4: LAIGOR
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia