MALEAKHI 2
2
1 Eeya Taa Laba-labaalo kawasa lotahuda ode mongo iimamu, “Uti-utieelo palentaa-U̒ olemu: 2Pohulumatilo to Olau̒ wolo huhutuumu. Wonu timongoli diila mohuto modungohe tahudaa-U̒, timongoli malaa̒natiya-U̒. Ngoa̒amilalo u tilolimo limongoli odelo lijiki mamobolio̒ mowali laa̒nati. Tutuulio tutu, ngoa̒amila u mopiohe boito mailana̒aati-U̒, sababu timongolio diila lomandungi palentaa-U̒. 3Mongo walau̒mu mahukuu-maniyo-U̒, wau bayamu polomuwo-U̒ wolo bountu lo binatangi u pilobake limongoli, wau timongoli madedeo̒lo ode huntua lo bountu. 4Yi mao̒taawa mao̒ limongoli deu̒ palenta botie mailohi-U̒ mai, alihu daantiaa-U̒ wolo mongo iimamu, walimai lei Lewi, debo pohupohutu.
5Todelomo daantia boito Wau̒ lodanti ode limongolio tutumulo u aamani wau moa̒ahu, wau timongolio ilahula-U̒ mohulumati ola-U̒. To maasa boito timongolio memangi mohulumati ola-U̒ wau moohe ola-U̒. 6Timongolio mongaajali u otutu, wau diila u tilaala. Timongolio mohulango wolaa-U̒, wau wolo motulidu hale modudua̒ kahandaki-U̒. Timongolio motulungi taa dadaata u diilalo mohutu u moleeto. 7Memangi uwajibu tomongo iimamu mongaajali mao̒ u otutu pasali ola-U̒, Eeya Taa Laba-labaalo molanggato. Toli mongoliolo ulipu musi mohintu wolo kahandaki-U̒, sababu timongolio boito mongo otoliya-U̒.
8Bo masaatia botie, timongoli, mongo iimamu, malohei lonto dalalo u otutu. Pongaajalimu malo dedea̒a taa dadaata u mohutu totala. Timongoli malo poa̒antulu daantia u pilohutu-U̒ woli mongoli. 9Yi Wau̒ olo mamohutu mai olimongoli diila pandungio lo umati Isirai̒lu sababu timongoli diila modungohe kahandaki-U̒, wau sababu timongoli mopo hihiiheede tau tou̒ mongaajali umati-U̒.”
Ulipu diila tatapu wau molotolo hilao to Allahu Taa̒ala
10Ito ngoa̒amila oti Aba u tutuuwauwa diila odito? Ito ngoa̒amila pilopowali lo Allahu Taa̒ala u tutuuwauwa diila odito? Wonu odito, yilongola ito tinggai mopaapaahe danti wau lou̒ odito momaahe daantia u pilohutu lo Allahu Taa̒ala wolo loluuhurunto? 11Umati lo Yehuda malo lambanga daantia lo Allahu Taa̒ala woli mongolio wau helohutu susuu-aliyaalo u moo̒tihela hapato to Yerusalemu wau to ngoilanggubu lipu. Timongolio malo pokootolo Bele lo Eeya u otolia̒ngio wau lonika wolo mongobua tahi polubowa dedeewaalo bangusa wewo. 12Pohileaala dua̒ tau-tauwalo tahi pohutua odito yinggilo lo Eeya monto umati lo Isirai̒lu. Hileaala dua̒ timongolio diilalo modudua̒ wolo bangusaanto mopodewo babaa-keyaalo ode Eeya Taa Laba-labaalo kawasa.
13Wau utie huhutuumu uwewo. Mesba lo Eeya yilomu limongoli wolo ponu; timongoli hilumoyongo wau lohilimuta sababu Eeya diilalo lotuhatawa lololimo bakemu. 14Timongoli mohintu yilongola Eeya diila mohuto mololimo mao̒. Masababu otaawa lo Eeya timongoli diila tatapu wau molotolo hilao̒ to totaabua tanilika limongoli tomaasa mudamu. Taabua boito tamani lo tutumulumu, bo timongoli malo hiyanati olio, eleponu totalu lo Allahu Taa̒ala timongoli malodanti u tatapu wau molotolo hilao to Olio. 15Diila maa Allahu Taa̒ala Taa Laba-labaalo Tuwau lopowali olimongoli ngobatanga wau ngojiwa wolo taabua boito? Wolo makasudu lo Eeya woleeto? Diaaluo patuju uwewo ngopohia alihu timongolio moo̒toduo mai mongo walao̒ tamowali umati lo Allahu Taa̒ala ututuulio tutu. Oditolio poo̒dahailo mao̒ batangamu, diila bolo woluo towolota limongoli tadiila tatapu wau molotolo hilao to dilelio. 16“Wau̒ molonuo̒ to polobuua̒ya,” tahuda lo Eeya Allahu Taa̒ala lo Isirai̒lu. “Wau̒ molonua̒ wonu tala ngota limongoli mohutu debo odelo diila omanusia boito todilelio. Yi poo̒dahailo batangamu wau diila mao̒ pohiyanati to dilemu sama-samaata.”
Dulahee pomutoa̒alo malembidei
17Timongoli helohutu Allahu Taa̒ala madiilalo mohuto wolo tabiboomu. Bo timongoli mohintu, “Woloolo mola mongowatotia mohutu to Eeya madiilalo mohuto?” Wolo moloi̒ya, “Ngoa̒amila taa u mohutu moleeto anggapuo lo Eeya mopiohe, wau Eeya motuhatawa toli mongolio.” Meaalo lou̒ mohintu, “Tou̒toonu Allahu Taa̒ala tailanggapu aadili boito?”
Iliyochaguliwa sasa
MALEAKHI 2: LAIGOR
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia