HOSEA 11
11
Eeya lomonu umati-Lio tahe lomaahu palenta
1 Eeya lotahuda mai,
“Wau̒ lomonu Isirai̒lu anggadu tio donggo ukikiia̒i,
tiliyangu-U̒ walau̒u-U̒ boito yilumualo lonto Masiri.
2Bo lebe hetiyango-U̒ walau̒u-U̒ boito
botio lebe hemo poo̒laminga monto Olau̒.
Tio lodelo bake wau helo lulube totabu
duo̒lo Baa̒l wau dedeewaalo wewolio.
3Lebe-lebe pomao̒ Wau̒ulo tahe longaajali Isirai̒lu lonao̒,
wau talo loo̒opu mao̒ wolo odehu hilao.
Wau̒ulo tahe loraawati olio
bo tio diila mohuto motolongaku mao̒.
4Wolo totoonulalo odehu hilaa-U̒,
pilopo wimbidiu-U̒ mai tio ode Olau̒.
Totoonulalo polodutolio pilopo heelu-U̒,
wau wolo muula lohilao yilohiya-U̒ tio ua̒alo.
5Tau-tauwalo Isirai̒lu boito diila mohuto muli mohualingai ode Olau̒, sababu uito timongolio musi muli mohualinga ode Masiri, wau babaa-ngusawalo Asyur mamo malenta olimongolio. 6Popaatea mamomali huhuuo̒ tunggula ode delomo kokoo-tawaalo limongolio, huhuu-hebuwaalo hulubangi maa̒ntuluolio, wau umati-U̒ pobinasaalio. Uito lotoduo sababu timongolio helo dudua̒ u otohilaa limongolio lohihilao, 7wau baaa̒ngiola u lololaa ola-U̒. Yi timongolio madeehelio, bo diaaluo tamo lopata olimongolio eleponu timongolio monguatio̒ mei̒tuulungi.”
8 Eeya lotahuda mai, “Wuu Isirai̒lu, diila pongalo aakali yio̒ poluli-U̒ meaalo tolaa-U̒. Tingga mowali yio̒ antuluwo-U̒ debo odelo tei Adma? Meaalo pohutuwo-U̒ debo odelo tei Jeboim? Diila owalia lo hilaa-U̒ mohutu mao̒ sua̒li boito, sababu ponu-U̒ udaa̒ tutu olemu! 9Yio diila tahukuu-maniyo-U̒ todelomo omulukaa-U̒ mai; yio̒ diilalo antuluwo-U̒. Sababu Wau̒ Allahu Taa̒ala, diila manusia. Wau̒, Taa Mantali, pee̒-pee̒enta wolemu, wau diilalo mohuto muluka to olemu.”
10 Eeya lotahuda mai, “Umati-U̒ mamo dudua̒ ola-U̒ wonu bolo Wau̒ moheuwanga debo odelo singa wau mopo humuheela musu limongolio. Umati-U̒ mahua̒a monao̒ mai monto ambahu otolopa u molubo ola-U̒. 11Monto Masiri timongolio mamonao̒ mai debo odelo linggahu lo bulungi, wau monto Asyur debo odelo polemboa̒ lopoombo. Lapatao̒ timongolio mamuli deloo-U̒ ode bele limongolio. Wau̒, Eeya, talo tahuda mai.”
Iliyochaguliwa sasa
HOSEA 11: LAIGOR
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia