AMOS 6
6
Isirai̒lu loa̒ntulu
1Matilopotala timongoli tatumu-tumula hisanangia to Sion, wau timongoli tamolaasa aamani to Samaria – timongoli wuu tahi otanggulawa todelomo ulipu bangusa lo Isirai̒lu tapolu-polutuo̒ botie, timongoli tabiasaalio henao̒o mai lo lipu u mei̒tulungi! 2Ponao̒lo mota bilohi mao̒ to Kalne, lapatao̒ ponao̒lo tulusi ode kota lo Hamat uleidaa̒ boito, lapatao̒ ode kota Gat to Pilistin. Tingga to lantobumu kokoo-tawaalo boito lebe mopiohe wolo yilaidia lo Yehuda wau Isirai̒lu? Wolo madala limongolio lebe udaa̒ wolo lipumu? 3Timongoli hemo taahangia deu̒ dulahu lobaala donggo molamingo, bo huhuu-huhutuumu bo mopo linggahei dudunggaalio mai lodulahee diila omanusia boito.
4Matilopotala timongoli tahi balata toitaato heheetule u ngoa̒amilalo dadaata wau helo potihunggu wolo tapu losapi wau himba u buboto! 5Timongoli sanangi hemo ngalangani lahu, debo odelo u pilohutu lei Dauda, wau timongoli mopoitohe lalaa-huwaalo boito wolo kocapi. 6Timongoli mongilu angguru monto halati u hituanga polupolu, wau timongoli helomake winulo moonu u mopiohe daa̒, bo timongoli diila lotisuukali lohilao to obobinasa lo Isirai̒lu. 7Sababu uito timongolilo tabohu-bohulio mabintao̒lio mota ode polayahu. Popoo-tihungguwalo wau totaa-totamelumu mamopaluto.
8Wolo pintalo Eeya Taa Laba-labaalo kawasa wau Laba-labaalo molanggato malo poe̒ela mai utie, “Wau̒ molonua̒ to osombongi umati lo Isirai̒lu; Wau̒ diila sanangi wolo bebee-leyaalo biluloa̒ saaha li olongia limongolio u ngoa̒amilalo dadaata. Tiilo lokota limongolio wolo ngoa̒amila uwoluo todelomio mawuduwo-U̒ ode musu.”
9Wonu bolo donggo woluo mopulu lota tahituua̒ todelomo bele ngowale, timongolio maamate olo. 10Ngotaalio lo pongawaa̒ ngaalaa̒ tao̒ tuugasi monguulusi polobungala olio, mamonao̒ mai wau modelo lumualao̒ milate lo tamaniilio. Tio mamo ngiibodeo̒ totaa uwoluo towimbihu dibalaka lobele boito, “Wolo donggo woluo tatumu-tumulo ngopohia yio̒?”
Yi mao̒dungohe mai totameta, “Diila!”
Pongawaa̒ longaalaa̒ tao̒ tuugasi molobunga milate boito mamoloi̒ya, “Diilalo pobisala! Ito diila mowali mongunte tanggulo Eeya.”
11Wonu bolo Eeya mongohi palenta, bebee-leyaalo leidaa̒ kikiio̒ maa̒ntuluwolo. 12Tingga mowali wadala tumetea̒ tohui̒dee botu? Wolo mawoluo tahelo madeo̒ deheto wolo sapi? Bo timongoli malopo loloombulia u aadili lowali peedi u moo̒pate, wau u otutu lowali tilaala.
13Timongoli hemolatabu deu̒ timongoli malopo olaaheo̒ Lodebar. Timongoli olo loloi̒ya, “Ami motuuheta lotolo u moheehu Karnaim.”
14 Eeya Taa Laba-labaalo molanggato wau Laba-labaalo kawasa lohihilao lotahuda mai, “Umati lo Isirai̒lu, Wau̒ mamolao suludadu monto bangusa tuwau udeli u moluhu lipumu. Timongolio mamodeehe olimongoli monto dalalo ode Hamat totilayo demola Lumbaya Araba to huliaalio.”
Iliyochaguliwa sasa
AMOS 6: LAIGOR
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia