Ŋilep. 1
1
Ŋainakineta ŋuna epeyo
1Abu Ekapolon tonyarau Moses, kirwor neni keŋ aloeema a ŋolo elipere tema, 2“Tolimok Ŋisirael ebe, ‘Ani eyauni idio kus ainakinet alobaren keŋ neni ke Ekapolon, emaikina tolemu alosipan a ŋaatuk keŋ, kori a ŋakinei keŋ.’”
3Ani kerae ainakinet ŋin ŋina epeyo ŋina elemunitae alosipan a ŋibaren, emaikina iŋes tolemu etaok ŋolo ajokan ŋolo emam neni eŋwalit; yau lopuke ŋolo ke eema a ŋolo ilipere, ikotere Ekapolon ecamuni aŋuna keŋ ibarasit ŋin. 4Emaikina ituŋanan ŋin kidokok akan keŋ nakou ka ainakinet a ŋina epeyo a ŋin, ikotere Ekapolon ecamuni ainakinet ŋin tomookunere iŋes asecit keŋ. 5Emaikina ituŋanan ŋin toar ibarasit ŋin a nen, tosodo nai ŋidwe ka Aron ŋulusapa ŋulu erae ŋisacaradotin tolemut ŋaokot, yaasi kipakakis lowaetin daadaŋ anamuroet a ŋina eyai lopuke ŋolo elomarere loeema ŋolo ilipere. 6Emaikina ituŋanan ŋin toyeŋ ainakinet ŋin ŋina epeyo, ido kileny ibarasit. 7Emaikina ŋidwe ka Aron ŋulusapa ŋulu erae ŋisacaradotin kinokakis akim kidiama namuroet, kinapinapakis ŋakito nakim. 8Emaikina nai ŋidwe ka Aron ŋulusapa ŋulu erae ŋisacaradotin tolemununut ŋakir kinapanakis, tolemut akou ka asepwae daŋ kiwuakis nakito ŋuna enepete alokidiama namuroet. 9Nai emaikina ŋini elemunit ainakinet ŋin, kilota ŋiboro ka akook a ibarasit kaapei ka ŋimolokony; ido emaikina esacaradoti kicuny ibore ŋin daadaŋ alokidiama amuroet, anerae erae iŋes ainakinet ŋina epeyo, ŋina ebob eure keŋ aneni ke Ekapolon.
10Ani kerae ainakinet ŋin ŋina epeyo ŋina elemunitae alosipan a ŋakinei, a ŋamesekin, kori a ŋamee, emaikina tolemunae ibarasit ŋinimoŋ ŋini ajokan ŋini emam neni eŋwalit. 11Emaikina ibarasit ŋin toarae alo Kuju namuroet alokiŋaren Ekapolon, tosodo nai ŋidwe ka Aron ŋulusapa ŋulu erae ŋisacaradotin, tolemut ŋaokot, kipakakis lowaetin daadaŋ anamuroet. 12Emaikina ibarasit ŋin kilenyae, tolemunae akou ka asepwae, ido kinapanak esacaradoti akiriŋ ŋin nakito ŋuna enepete alokidiama namuroet; 13nai ŋiboro ka akook a ibarasit kaapei ka ŋimolokony, emaikina kilotarae; ido emaikina esacaradoti kicuny ibore ŋin daadaŋ alokidiama namuroet, anerae erae iŋes ainakinet ŋina epeyo, ŋina emaikina ebob eure keŋ aneni ke Ekapolon.
14Ani kerae ainakinet kon ŋina epeyo ŋin neni ke Ekapolon ŋin ikenyit, emaikina iyoŋ toseu ainakinet kon ŋin erae akuri, kori temeleudi. 15Emaikina esacaradoti yau ikeny ŋin namuroet, tomojir akou totubo, ido kicuny anamuroet; ido emaikina ŋaokot a ikenyit a ŋin kitiitakinae epeiwae namuroet. 16Emaikina ituŋanan ŋini eyaunit ainakinet ŋin tolema aŋalube nyepunoro, kimasak lowae ŋolo alo Kide namuroet, nakibois ŋina emudio ekuron. 17Emaikina ituŋanan ŋin totero ŋabebenuk a ikenyit a ŋin, ido kibel alokuyoit, nai nyetubo ŋabebenuk. Emaikina nai esacaradoti kicuny ikenyit ŋin alokidiama namuroet, anerae erae iŋes ainakinet ŋina epeyo, ŋina ebob eure keŋ aneni ke Ekapolon.
Iliyochaguliwa sasa
Ŋilep. 1: NIB2008
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ngakarimojong Interconfessional Bible © Bible Society of Uganda, 2008.