Awos. 33
33
Awotokin alomoru Sinai
1Tema Ekapolon neni a Moses, “Towotok anakibois a na, iyoŋ kaapei ka ŋituŋa ŋulu ibu iyoŋ kitipeunio anakwap a Ijipit, towoto nakwap ŋina abu ayoŋ ekoŋ ainakin Aburaam, Isaka ka Yakob abala, ‘Ainakini ayoŋ akwap ŋin neni a ŋiletok kus.’ 2Eyakuuni ayoŋ emalaika ikitena iyes, ido eritari ayoŋ anakwap a ŋin Ŋikanaani, Ŋiamori, Ŋiitaiti, Ŋiperisi ka Ŋiipi ta Ŋiyebusi. 3Apesi kitipeiyosi nakwap ŋina elelyaata ŋakile ka ao. Nai nyikilosi ayoŋ ka iyes, acepaki apedori ayoŋ amunyar iyes alorot, anerae irae iyes ŋituŋa ŋulu egogoŋ ŋakyes.”
4Ani iirarete ŋituŋa ŋakiro ŋuna apipilak ŋun, kikalout, tolacasi ŋinapito ŋulu asiritotor, 5anerae aris Ekapolon ketema neni a Moses, “Tolimok Ŋisirael ebe, ‘Irae iyes ŋituŋa ŋulu egogoŋ ŋakyes; ani kerae orukorete ayoŋ ka iyes kidiama ama tari apaki ŋina euruwuana, kapedo ayoŋ amunyar iyes. Tolacasi tokona ŋinapito ŋulu isiritotor iyes, ido oanyu nai ayoŋ ŋuna etiyakini neni kus.’ ” 6Aŋun, apotu Ŋisirael tolacasi ŋinapito ŋulu asiritotor, ameun anapaki a ŋina ayakatar ikes lomoru ŋolo enyaritae Oreb, kori Sinai.
Eema ŋolo iryamununoi
7Apaki ŋin, amina Moses aayenen Eema kigurok kiŋa alomar, neni alwana iwadio. Anyarit iŋes Eema ŋol, “Eema ŋolo iryamununoi.” Ituŋanan daadaŋ ŋini acamit akiŋit Ekapolon ŋakiro, alosi iŋes tooma Eema ŋolo iryamununoi ŋolo ayai kiŋa alomar. 8Apaki daadaŋ ŋina elosyo Moses tooma Eema ŋolo iryamununoi, aminasi ŋituŋa daadaŋ akiwo, ŋinituŋanan alopuke ke Eema keŋ, kiteosi Moses tari ŋina elomarya tooma Eema ŋolo iryamununoi. 9Alomar Moses tooma Eema bon, amina edou abunenen min lopuke ke Eema a ŋolo iryamununoi, ido kisirwor Ekapolon Moses. 10Apaki daadaŋ ŋina iŋolikiniata ŋituŋa edou emini lopuke ke Eema, anyounete ŋituŋa daadaŋ kilipa alopukei a ŋiemae kec. 11Amina Ekapolon akisirworyanakin Moses apaki ŋin etakani, lopite ŋolo isiyania ituŋanan lokone keŋ. Ani irikakin, toboŋo nai Moses nalomar, nai pa arotonokini Yosua lokoku a Nun alotooma Eema ŋolo iryamununoi. Arae iŋes ŋolo eŋarakinit Moses.
Akilipa a Moses
12Tema Moses neni ke Ekapolon, “Ikilimonokini iyoŋ ayoŋ ŋinapei paaran ebe, ‘Torik ŋituŋa lu,’ nai nyiteyenikina iyoŋ ayoŋ ituŋanan ŋini iyakiyari iyoŋ orukosi ka ayoŋ; tobali bo iyoŋ, ‘Ayeni ayoŋ ekiro kon ka idau iyoŋ ajokyar aneni kaŋ.’ 13Ani kajok ayoŋ aneni kon, kitatamae ayoŋ ŋuna icamit iyoŋ, ikotere akayenuni ayoŋ iyoŋ, ido orubak ajok aneni kon. Totamunite atemar erae ŋituŋa lu ŋulu kon.” 14Tema Ekapolon neni a Moses, “Ikirukori ayoŋ ka iyoŋ, ido ekesieŋari ayoŋ iyoŋ.” 15Tema nai Moses neni ke Ekapolon, “Ani pa kerukor isua ka iyoŋ, nyikitorotok isua a ne etipeiyosi ama. 16Ikokini nai ai ituŋanan idio eyenuni atemar ajokyar ayoŋ ka ŋituŋa kon aneni kon arae pa kerukor isua ka iyoŋ? Nyo eketegelaani ayoŋ ka ŋituŋa kon alotuŋa a daadaŋ a ŋulu iboiyete anakwap?” 17Tema Ekapolon neni a Moses, “Acamuni ayoŋ ŋakiro ŋun, ŋuna ilipa iyoŋ; anerae ijokiar iyoŋ aneni kaŋ ka ayeni ayoŋ ekiro kon.” 18Tema Moses, “Ekelipit ayoŋ iyoŋ, kitoodikinae ayoŋ akica kon.” 19Tema Ekapolon, “Emyekini ayoŋ ajokis daadaŋ ŋina ebunit aneni kaŋ kitoru kiŋaren kon, ido alimori ayoŋ ekiro kaŋ ebe, ‘Arae ayoŋ Ekapolon’ ” iyai iyoŋ. Esyoni ayoŋ ŋini acamit akisyon, etimi ŋini acamit akitim. 20Nai tema Ekapolon neni a Moses, “Nyeketaanyuwari ayoŋ iyoŋ ereet kaŋ, anerae mam ituŋanan ŋini ani keanyuuwa ereet kaŋ, torubak eyari.” 21Torubak Ekapolon irworo tema, “Eyai diyete kaŋ ne akibois ŋina ipedorya iyoŋ akiwo anataaba. 22Ani esitoruni ayoŋ akica kaŋ kiŋaren kon, ekewuakini ayoŋ iyoŋ nakabaat a ataaba, ido okorap a akan kaŋ, akitodol ŋina alunyaror ayoŋ; 23olema nai ayoŋ akan kaŋ, kiŋolik iyoŋ akau kaŋ; nai ereet kaŋ, nyiŋolikini iyoŋ.”
Iliyochaguliwa sasa
Awos. 33: NIB2008
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ngakarimojong Interconfessional Bible © Bible Society of Uganda, 2008.