Awos. 17
17
Tolomut ŋakipi anataaba
(Ekim. 20:1-13)
1Towotokis Ŋisirael daadaŋ analoŋisat a ŋina a Sin, torubakis ewosete anakibois ka apei tari ŋinace, lopite ŋolo ecikitor Ekapolon ikes. Toloma ikes neni enyaritae Repidim, nai amam ŋakipi a nen ŋuna emasete ikes. 2Aŋun, apotu ikes kisiburata Moses a nen temasi neni a Moses, “Inakinae isua ŋakipi tomatae.” Kiŋit Moses ikes tema, “Kaanukiro ikisiburaata iyes ayoŋ? Kaanukiro ikatakinitotor iyes Ekapolon?” 3Tonyam akure ŋituŋa a nen nooi, kiŋuruŋura neni a Moses. Kiŋita Moses temasi, “Kaanukiro ikitipeunio iyoŋ isua alo Ijipit akitaar isua ka ŋidwe kosi ta ŋibaren kosi akure?” 4Aŋun, abu Moses kikalou neni ke Ekapolon kiŋit tema, “Nyo emaikina ayoŋ etiya neni a ŋituŋa a lu? Etenito ikes akicak ayoŋ a ŋamoru.” 5Kirwor Ekapolon neni a Moses tema, “Ape tolot kiŋaren ŋituŋa, ya ŋikasikou a Ŋisirael ŋidi torukosi ka iyoŋ; totiŋ ebela kon ŋolo ibunio toramya aŋolol Nile. 6Awoi ayoŋ alokiŋaren kon anataaba a ŋina eyai lomukura ŋolo enyaritae Oreb. Toram ataaba ŋin, elomunete ŋakipi a nen, ido tomata ŋituŋa.” Abu Moses kitiya ŋun iteete ŋikasikou a Ŋisirael. 7Tolimok Moses ŋirorwa a akibois a ŋin Masa #17:7 Masa Masa iŋes atemar akikatakin ka Meriba, Meriba Meriba iŋes atemar ebura. anerae apotu Ŋisirael kisiburata ka kikatakis Ekapolon a nen kiŋita temasi, “Eyai mono Ekapolon kaapei ka iwon, kori mam?”
Toremo Ŋiamaleki Ŋisirael, nai aponi tobwaŋae
(Akisy. 14:7; Ekim. 13:29, 14:25)
8Toŋaut Ŋiamaleki ajore, toremo Ŋisirael alo Repidim. 9Tema Moses neni a Yosua, “Toseu ŋikilyok ŋidi alotuŋa yok toloto kitijioto Ŋiamaleki. Awoi ayoŋ moi taparacu alokidiama emukura atiŋit ebela ŋolo ka Akuj.” 10Aŋun, abu Yosua kitiya ikwapei alimokinitor Moses iŋes, kitiji Ŋiamaleki apaki ŋina ayakatar Moses ka Aron ta Ur kidiama emukura. 11Apaki daadaŋ ŋina ekyaaritor Moses akan keŋ, elounito Ŋisirael Ŋiamaleki; ido apaki daadaŋ ŋina etikiunio Moses akan keŋ, kilout Ŋiamaleki Ŋisirael. 12Nai abu toup Moses akikyaarit ŋakan keŋ, aŋun, apotu ŋirukitos keŋ tolemut amoru kisiboikis Moses nen. Totiŋa Aron ka Ur ŋakan a Moses kikyaasi, ipei kikyaa teten ka ŋinice kikyaa kedyeny. Aŋun, apotu ŋakan a Moses torubakis ikyaara akitodol ŋina adoiyorya akoloŋ. 13Aŋun, abu Yosua tobwaŋ Ŋiamaleki toar a ŋileŋia.
14Tema nai Ekapolon neni a Moses, “Kigir ŋakiro nu lokitaabo ikotere etamunitae, ido tolimununuye ikes epupi Yosua, anerae esunyari ayoŋ jik Ŋiamaleki todaun ituŋanan etamunit ikes anakwap a na.” 15Todukok Moses Namuroet nen tolimok ekiro keŋ ebe, “Erae Ekapolon abendera kaŋ.” 16Tema iŋes, “Ani ikyaaritae abendera ŋina ke Ekapolon, itiji Ekapolon Ŋiamaleki ŋulu a ŋanyameta a daadaŋ.”
Iliyochaguliwa sasa
Awos. 17: NIB2008
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ngakarimojong Interconfessional Bible © Bible Society of Uganda, 2008.
