ABALAWI 3
3
Ekeng’wanso ki’omorembe
1“Omonto kararue ekeng’wanso ki’omorembe ase obosio bwane inche Omonene, nigo ararente eeri gose eng’ombe etari na kemocho ase omobere oye. 2Omonto oyio goika abeke okoboko kwaye igoro ase omotwe bw’eng’iti eyio ekoruegwa ekeng’wanso, erio ayenyenyere agwo ase egesoero ki’Eema y’Omosangererekano, na abakuani, abamura ba Haroni, basiarere amanyinga aria ase egesasimero chinsemo chionsi. 3-4Korwa ase eng’iti y’ekeng’wanso ekio ki’omorembe arusie ebitinya bitubete chinyama chi’enda, na ebitinya binde bionsi bire ase enda ime, amo ne chinyigo chionsi ibere na ebitinya bichitubete; na ebitinya bie riini abirusie amo ne chinyigo. Ebinto ebio bionsi abirue bibe ekeng’wanso kegosambwa nomorero asende inche Omonene. 5Erio abamura ba Haroni babisambere ase egesasimero, igoro y’ekeng’wanso ki’ogosambwa kebekire ase chinko chiria chire ase omorero. Ekio nekeng’wanso kegosambwa nomorero kere ne rimisu rigiya rikongwenera.
6“Omonto kararue ekeng’wanso ki’omorembe asende inche Omonene korwa ase riicho rie ching’ondi, gose chimbori, arente eng’iti etari na kemocho ase omobere oye, etuoni gose eaberi. 7Onye okorua eng’ondi ebe ekeng’wanso kiaye, erio ayerue ase obosio bwane. 8Ere goika abeke okoboko kwaye igoro ase omotwe bw’eng’ondi eyio akorua ebe ekeng’wanso, erio ayenyenyere agwo bosio bw’Eema y’Omosangererekano. Abamura ba Haroni basiarere amanyinga aria ase egesasimero chinsemo chionsi. 9-10Korwa ase ekeng’wanso ekio ki’omorembe arue ebitinya, na omokera bwonsi ayobutore kegima korwa ase riuga ri’omogongo, na ebitinya bitubete chinyama chionsi chi’enda, na ebitinya binde bionsi bire ase enda ime, ne chinyigo chionsi ibere, amo nebitinya bichitubete; na ebitinya bie riini abirusie amo ne chinyigo. Ebinto ebio bionsi bibe ekeng’wanso kegosambwa nomorero asende inche Omonene. 11Omokuani otenenerete asambe ebinto ebio bionsi ase egesasimero bibe endagera ekoruegwa ekeng’wanso kegosambwa nomorero asende inche Omonene.
12“Onye ekeng’wanso kiaye nembori, ayerue ase obosio bwane, 13na omonto oyio goika abeke okoboko kwaye igoro ase omotwe bw’embori eyio, erio ayenyenyere agwo bosio bw’Eema y’Omosangererekano. Abamura ba Haroni basiarere amanyinga aye ase egesasimero chinsemo chionsi. 14-15Erio korwa ase ekeng’wanso ekio arue ebitinya bionsi ebire ase enda ime, ne chinyigo chionsi ibere, na ebitinya bie riini abirusie amo ne chinyigo. Ebinto ebio bionsi abirue bibe ekeng’wanso kegosambwa nomorero asende inche Omonene. 16Omokuani abisambere ase egesasimero bibe endagera ekoruegwa egosambwa nomorero, ere ne rimisu rigiya rikongwenera. Ebitinya bionsi nebiane. 17Oyo nigo orabe omoroberio ochikire oragenderere botambe ebiaare ase ebiaare, aande onsi ase morabe mokomenya, ng’a timobaisa koria ebitinya, gose konywa amanyinga.”
Iliyochaguliwa sasa
ABALAWI 3: EKEGUSIIBBLE
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
OLD EKEGUSII BIBLE PROTESTANT EDITION
©Bible Society of Kenya, 2020