ABALAWI 18
18
Ogokora kw’obosooku
1Omonene agakwana na Musa, akamotebia, 2“Tebia Abaisraeli ng’a natebire iga: Inche ninche Omonene, Nyasae oino. 3Timobaisa gokora buna abanto ba Misiri bagokora, agwo ase mwamenyete, gose buna abanto ba Kanani bagokora, ense eyio nkobaira mochie komenya, gose timobaisa kobwatia chingencho chiabo. 4Moigwere amachiko aane, na mokore aya nkobachika. Inche ninche Omonene, Nyasae oino. 5Ee, mokore aya nkobachika, na mobwate amachiko aane. Omonto karakore amang’ana ayio nabe moyo. Inche ninche Omonene.
6“Monto onde bwensi tabaisa korara nomokungu ore omoamate omwabo. Okwo nokorentera omoamate omwabo obosooku. Inche ninche Omonene. 7Tobaisa korara na nyoko. Okwo nokomorentera iso obosooku. Torentera nyoko obosooku. 8Tobaisa korara na nyoko moke, moga iso. Okwo nokomorentera iso obosooku. 9Tobaisa korara na moiseke omino, omoiseke o iso gose oyo o nyoko, onye moiboire komo ase enyomba eyemo, gose oiboire ase enyomba ende. 10Tobaisa korara nomochokoro oo, oyo bw’omwana oo omomura, gose oyo bw’omwana oo omosubati. Ayio nigo arakorentere obosooku. 11Tobaisa korara nomoiseke o nyoko moke, moga iso; oyio nomoiseke omino iso aiborete. 12Tobaisa korara nomoiseke omwabo iso; oyio nyoko moke, omwabo iso. 13Tobaisa korara nomoiseke omwabo nyoko; oyio nyoko moke, omwabo nyoko. 14Tobaisa korara na moga iso moke omwabo iso; okwo nokorentera iso moke obosooku, ekiagera omokungu oyio nyoko moke are. 15Tobaisa korara na moka momura oo; obwo nobosooku, ekiagera nomokungu bw’omwana oo omomura. 16Tobaisa korara na moka momura omino; okwo nokomorentera momura omino obosooku. 17Tobaisa korara nomoiseke bw’omokungu kwabeire nere, gose tobaisa gotwara omochokoro oye, omoiseke bw’omwana oye omosubati, gose oyo bw’omomura oye, ekiagera abwo nabanto abamo. Obwo nobonyaka obobe. 18Tobaisa koira mokoyoo, omwabo mokao, ekero mokao are moyo; ayio nabaise korenta obobisa.
19“Tobaisa korara nomokungu ekero abwate omotienyi, ekiagera ere tachenegeti ase ekero ekio. 20Tobaisa korara nomokungu bw’omosacha onde na gwesoyia ase ogotacheneka nere. 21Tobaisa korua omwana onde oo abe ekeng’wanso ase enyasae Moleki, ekiagera okwo nokorentera erieta ria Nyasae oo obosooku. Inche ninche Omonene. 22Tobaisa korara nomonto omosacha buna okorara nomokungu; obwo nobonyaka obobe bw’okogechia. 23Tobaisa korara neng’iti ende yonsi na gwesoyia ase ogotacheneka nero. Na omokungu tabaisa kwerua korara neng’iti ende yonsi. Obwo nobonyaka obobe kegima bw’okogechia.
24“Inwe timobaisa gwekora abatachenegeti ase ogokora buna okwo. Ase enchera eyio abanto b’ebisaku mbesoetie ase ogotacheneka, na bono inche Omonene nkobaseria inde babatigere inwe ense eyio. 25Ogokora kwabo gokarentera enseeria ogotacheneka, na inche nkayea egesusuro ase engencho y’ogosaria okwo, na ense eyio ekaanga tiyatwara abanto bamenyeteo, korende ekabaseria. 26Ase igo inwe mwensi, ababiare gose abamenyi bamenyete ase egati yaino, goika morende amachiko aane na kobwata aya onsi nabachikire, gose timobaisa gokora kende gionsi gi’okogechia okwo abanto b’ebisaku bakorete. 27Abanto bamenyete ase ense eria ritang’ani riaino nigo bakorete okogechia okwo gwonsi, na igo ense eria ekaba etachenegeti. 28Moise gokora ayio, ense eyio nigo erabaange morue aroro, buna yangete abanto b’ebisaku, abwo babatang’anete komenyao, 29ekiagera monto onde bwensi orakore okogechia konde gwonsi buna okwo, oyio naatananwe korwa ase abanto baye.
30“Ase ayio, moigwere amang’ana aya onsi nabachikire, na moyakore. Timobasia kwenaria chingencho chi’okogechia chiakoretwe nabanto abwo babatang’anete komenya ase ense eyio. Moise gokora igo, inamwesoyie ase ogotacheneka ase chingencho echio. Inche ninche Omonene, Nyasae oino.”
Iliyochaguliwa sasa
ABALAWI 18: EKEGUSIIBBLE
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
OLD EKEGUSII BIBLE PROTESTANT EDITION
©Bible Society of Kenya, 2020