ZEKARIA 9
9
MOKUNA IX.
1 Ka pōʻino ʻana o ko Suria, ko Turo, a me ko Pilisetia. 9 Ke komo ʻana o Kristo i loko o Ziona ma luna o ka hoki. 16 Ka lanakila ʻana o ka ʻekalesia.
1¶ Ka wānana o ka ʻōlelo a Iēhova i ka ʻāina ʻo Haderaka, a ʻo Damaseko kona wahi e hoʻomaha ai; no ka mea, ua kau pono ʻia nā maka o nā kānaka, a me nā ʻohana a pau o kā ʻIseraʻela ma luna o Iēhova;
2A ʻo Hamata hoʻi kona palena;
ʻO Turo hoʻi, a me Zidona; no ka mea, ua naʻauao loa ia.
3A kūkulu ihola ʻo Turo i pā kaua nona,
A ahu ihola i ke kālā e like me ka lepo,
A me ke gula e like me ka naele o nā alanui.
4Aia hoʻi, na ka Haku ia e hoʻokuke aku,
A e hoʻolei aku i kona waiwai i loko o ke kai;
A e hoʻopau ʻia auaneʻi ʻo ia i ke ahi.
5E ʻike auaneʻi ʻo ʻAsekelona me ka makaʻu;
ʻO Gaza hoʻi, a e haʻalulu nui loa ia;
A me ʻEkerona; no ka mea, e pohō auaneʻi kona manaʻolana;
E make ke aliʻi o Gaza,
A e kanaka ʻole auaneʻi ʻo ʻAsekelona.
6A e noho ka malihini ma ʻAsedoda,
A e hōʻoki iho nō wau i ke kiʻekiʻe o ka poʻe Pilisetia.
7E lawe aku hoʻi au i kona koko mai loko mai o kona waha,
A me kona mau mea hoʻopailua mai waena o kona mau niho.
Akā, ʻo ka mea i waiho ʻia, no ko kākou Akua ia,
E like auaneʻi ia me ka luna ʻāina, ma kā Iuda,
A ʻo ʻEkerona hoʻi me he Iebusa lā.
8E hoʻomoana nō wau a puni ka hale oʻu, no ka poʻe kaua,
I ko lākou hele ʻana aʻe a i ka hoʻi ʻana mai;
ʻAʻole hoʻi e puka hou aʻe kekahi aliʻi hoʻoluhi i waena o lākou;
No ka mea, ua ʻike nō kaʻu mau maka.
9E hauʻoli nui, e ke kaikamahine o Ziona,
E hoʻōho ʻoliʻoli, e ke kaikamahine o Ierusalema;
Aia hoʻi, e hele mai ana kou aliʻi i ou lā;
He hoʻopono, a he hoʻōla nō kona;
He akahai nō, a e noho ana ma luna o ka hoki, ʻo ke keiki hoʻi a ka hoki.
10E hoʻopau auaneʻi hoʻi au i nā hale kaʻa mai ko ʻEperaima aku,
A me ka lio mai Ierusalema aku;
E hōʻoki ʻia hoʻi ke kakaka kaua;
A e haʻi aku auaneʻi ʻo ia i ka maluhia i nā lāhui kanaka;
A mai kekahi kai a hiki i kēlā kai kona aupuni,
A mai ka Muliwai aku a hiki i nā palena o ka honua.
11¶ ʻO ʻoe hoʻi, no ke koko o kāu berita,
E hoʻokuʻu aku nō au i kou poʻe paʻahao,
Mai loko aʻe o ka lua meki, ʻo kahi wai ʻole.
12E huli aʻe ʻoukou i ka pā kaua, e ka poʻe pio manaʻolana;
No ka mea, ke haʻi aku nei au i nēia lā,
E uku pālua aku nō au nāu.
13No ka mea, e lena auaneʻi au i kā Iuda noʻu,
E lena hoʻi au i kā ʻEperaima e like me ke kakaka,
A laila e hōʻeuʻeu aʻe hoʻi au i kāu mau keiki, e Ziona;
E kūʻē i kāu mau keiki, e Iavana,
A e hoʻolilo au iā ʻoe e like me ka pahi kaua a ke kanaka koa.
14A e ʻikea auaneʻi ʻo Iēhova ma luna o lākou,
A e lele aku kona pua e like me ka uila;
A e hoʻokani ʻo Iēhova ka Haku i ka pū,
A e hele aku nō ia i loko o nā makani ʻino o ke kūkulu hema.
15Na Iēhova o nā kaua lākou e hoʻomalu mai;
E ʻai iho lākou, a e hehi lākou ma luna o nā ʻalā o ka maʻa;
A e inu lākou, a e walaʻau e like me ka poʻe inu waina;
A e hoʻopiha ʻia lākou e like me nā bola,
A me nā kihi o ke kuahu.
16A e mālama mai ʻo Iēhova ko lākou Akua iā lākou ia lā,
E like me ka ʻohana hipa, i poʻe kānaka nona;
No ka mea, e lilo auaneʻi lākou i mau pōhaku maikaʻi o ka pāpale aliʻi,
I hoʻokiʻekiʻe ʻia ma luna o kona ʻāina.
17Nani ka nui o kona lokomaikaʻi!
Nani hoʻi ka nui o kona maikaʻi!
ʻO ka palaoa ka mea e hoʻoulu ai i nā keiki kāne,
A ʻo ka waina hou i nā kaikamāhine.
Iliyochaguliwa sasa
ZEKARIA 9: KBH
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ka Baibala Hemolele © Partners Development Foundation, 2018.