HAGAI 1
1
MOKUNA I.
1 He ʻōlelo paipai i nā Iudaio, e ikaika lākou e kūkulu hou i ka luakini.
1¶ I ka lua o ka makahiki o Dariu ke aliʻi, i ke ono o ka malama, i ka lā mua o ua malama lā, hiki maila ka ʻōlelo a Iēhova ma o Hagai lā, ʻo ke kāula, iā Zerubabela ke keiki a Saletiʻela, ke kiaʻāina o Iuda, a iā Iosua ke keiki a Iosedeka, ke kahuna nui, i ka ʻī ʻana aʻe,
2“Ke ʻōlelo mai nei ʻo Iēhova o nā kaua, penei, ʻī maila, ‘Ke ʻī mai nei kēia poʻe kānaka, “ʻAʻole i hiki mai ka manawa, ka manawa e kāpili ai i ka hale o Iēhova.”’”
3No laila, hiki mai ai ka ʻōlelo a Iēhova ma o Hagai lā, ʻo ke kāula, i ka ʻī ʻana aʻe,
4“E ʻoukou nei, ʻo ka manawa anei kēia no ʻoukou e noho ai i loko o ko ʻoukou mau hale papa kedera, a e neoneo ai hoʻi kēia hale?”
5No laila hoʻi, eia kā Iēhova ke Akua o nā kaua e ʻōlelo nei, “E noʻonoʻo ʻoukou i ko ʻoukou mau ʻaoʻao.
6“Ua lūlū nui aku ʻoukou, a he ʻuʻuku ka mea a ʻoukou i ʻohi ai; ua ʻai ʻoukou, ʻaʻole naʻe i māʻona; ua inu ʻoukou, ʻaʻole naʻe i kena ka make wai; ua ʻaʻahu kapa ʻoukou, ʻaʻole nō naʻe ʻoukou i mehana; a ʻo ka mea i hana e uku ʻia mai, ua hahao ʻia kāna uku ma loko o ke ʻeke pukapuka.”
7¶ Eia kā Iēhova ke Akua o nā kaua i ʻōlelo mai nei, “E noʻonoʻo ʻoukou i ko ʻoukou mau ʻaoʻao.
8“E piʻi aku i ke kuahiwi a e lawe mai i lāʻau, a e hana i ka hale, a e ʻoluʻolu au ia, a e hoʻomaikaʻi ʻia auaneʻi hoʻi au,” wahi a Iēhova.
9“Kuko akula ʻoukou i nui, aia hoʻi he ʻuʻuku; lawe akula ʻoukou i loko o ka hale, a pupuhi akula au ia. No ke aha?” wahi a Iēhova, ke Akua o nā kaua. “No kuʻu hale nō i neoneo, a holo ʻoukou kēlā mea kēia mea i kona hale iho.
10“No laila, ua pani ʻia ka lani ma luna o ʻoukou, i hāʻawi ʻole mai ai ia i ka hau, a ua pau ka hoʻohua mau ʻana o ka honua i kona hua.
11“Ua kāhea akula au i manawa wī ma luna o ka ʻāina, a ma luna o nā mauna, a ma luna o ka ʻai, a ma luna o ka waina hou, a ma luna o ka ʻaila ʻoliva, a ma luna o nā mea a pau a ka lepo e hua mai ai, a ma luna o kānaka, ma luna o nā holoholona, a ma luna o ka hana a pau a nā lima.”
12¶ A laila, hoʻolohe aʻela ʻo Zerubabela ke keiki a Saletiʻela, a ʻo Iosua ke keiki a Iosedeka, ke kahuna nui, a me ke koena kanaka a pau, i ka leo o Iēhova ko lākou Akua, a me ka ʻōlelo a Hagai ke kāula, me kā Iēhova ʻo ko lākou Akua i hoʻouna mai ai iā ia, a makaʻu aʻela nā kānaka iā Iēhova.
13ʻŌlelo akula ʻo Hagai ʻo ka ʻelele o Iēhova, ma kā ke kauoha a Iēhova i nā kānaka, i ka ʻī ʻana aʻe, “‘Me ʻoukou pū nō wau,’ wahi a Iēhova.”
14A paipai maila ʻo Iēhova i ka naʻau o Zerubabela ke keiki a Saletiʻela, ke kiaʻāina o Iuda, a me ka naʻau o Iosua ke keiki a Iosedeka, ke kahuna nui, a me ka naʻau o ke koena kanaka a pau; a hele akula lākou a hana ihola i ka hale o Iēhova o nā kaua, ʻo ko lākou Akua,
15I ka lā iwakāluakumamāhā o ka malama ʻeono, i ka lua o ka makahiki o ke aliʻi ʻo Dariu.
Iliyochaguliwa sasa
HAGAI 1: KBH
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ka Baibala Hemolele © Partners Development Foundation, 2018.