ʻAMOSA 8
8
MOKUNA VIII.
1 Ma ka hīnaʻi hua i hōʻike ʻia mai ai ka ʻino e hiki koke ana i kā ʻIseraʻela. 4 ʻO ke ao ikaika ʻana, a me ka wānana ʻana no nā ʻino nui. 11 He manawa wī i ka ʻōlelo ʻole.
1¶ Pēnēia i hōʻike mai ai ʻo Iēhova ka Haku iaʻu; aia hoʻi, he hīnaʻi hua oʻo.
2A ʻī maila ia, “He aha kāu e ʻike nei, e ʻAmosa?” ʻĪ akula au, “He hīnaʻi hua oʻo.” A laila, ʻī maila ʻo Iēhova iaʻu, “Ua hiki mai ka hope ma luna o kuʻu poʻe kānaka o kā ʻIseraʻela; ʻaʻole au e hele hou aʻe mai o lākou aku.
3“A e lilo nā mele o ka hale aliʻi i auē ʻana ia lā,” wahi a Iēhova ka Haku. “A he nui auaneʻi nā kupapaʻu ma nā wahi a pau; a e hoʻolei malu aku iā lākou.”
4¶ E hoʻolohe i kēia, e ʻoukou ka mea e moni i ka poʻe ʻilihune, a hoʻopau i ka poʻe nele o ka ʻāina,
5i ka ʻī ʻana aʻe,
“Āhea lā e pau ai ka Mahina Hou, i kūʻai aku ai kākou i ka ʻai?
A me ka Sābati, i wehe aʻe ai kākou i ka hua ʻai, e hōʻuʻuku ana i ka ʻepa,
A e hoʻomāhuahua ana i ke sekela, a e hoʻololi ana i nā mea kaupaona hoʻopunipuni?
6“I kūʻai aku ai kākou i ka poʻe ʻilihune no ke kālā,
A i ka poʻe nele no ka paʻa kāmaʻa; a i kūʻai aku ai i ka huapalaoa ʻino?”
7¶ Ua hoʻohiki ʻo Iēhova ma ka nani o Iakoba,
“ʻAʻole loa au e hoʻopoina i kā lākou mau hana a pau.
8“ʻAʻole anei e haʻalulu ka ʻāina no kēia mea,
A e auē nā mea a pau e noho ana i loko ona?
A e piʻi aʻe ia me he Muliwai lā a puni ona;
A e laweʻia aku ia, a e hālana aʻe ia e like me ka Muliwai o ʻAigupita.
9“A i kēlā lā,” wahi a Iēhova ka Haku,
“E hoʻonapoʻo iho au i ka lā i ke awakea, a e hoʻopouli iho au i ka ʻāina i ka lā laʻelaʻe.
10“A e hoʻolilo au i kā ʻoukou mau ʻahaʻaina i auē ʻana,
A i ko ʻoukou mau mele i kanikau ʻana;
A e lawe mai au i ke kapa ʻino ma luna o nā pūhaka a pau,
A me ka ʻōhule ma luna o nā poʻo a pau;
A e hoʻohālike au ia mea me ka auē ʻana no ke keiki kama kahi,
A i ka hope o ia mea e like me ka lā ʻawaʻawa.
11¶ “Aia hoʻi, e hiki mai ana nā lā,” wahi a Iēhova ka Haku,
“E lawe mai ai au i ka wī ma luna o ka ʻāina, ʻaʻole ʻo ka wī i ka ʻai, ʻaʻole ʻo ka make inu i ka wai,
Akā, ʻo ka lohe i ka ʻōlelo a Iēhova.
12“A e ʻauana lākou mai ke kai a hiki i ke kai, a mai ke kūkulu ʻākau, a ka hikina,
E holo lākou ma ʻō a ma ʻō, e ʻimi ana i ka ʻōlelo a Iēhova, ʻaʻole e loaʻa.
13“I kēlā lā, e maʻule nā wāhine puʻupaʻa maikaʻi, a me nā kānaka ʻōpio no ka make wai.
14“ʻO ka poʻe e hoʻohiki ma ka hewa o Samaria, a ʻī iho,
‘E ola ana kou Akua, e Dana; a e ola ana ka ʻaoʻao o Beʻereseba’;
E hāʻule nō hoʻi lākou, ʻaʻole loa e ala hou aʻe.”
Iliyochaguliwa sasa
ʻAMOSA 8: KBH
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ka Baibala Hemolele © Partners Development Foundation, 2018.