LIVAI 4
4
Ụrụpɛ iwɛ Iwɛwɛ yo Onongbo
1Nazhɛ AGWANGWAMA hiɛŋ Moses, 2Mbiso atwa Isrɛl maa, Yaa shɛ bụtụ be elele njɛ iwɛwɛ nu umepiteshi, na amɛ iyi elele nɛ Ngee peni-unu ibɛ maa kede a njɛ o, asha ga a 'wa ihwɛŋnɛ gɛ Ngɛɛ zhɛ mo hi tulonono.
3Yaa shɛ bunongbo bụ 'wụtụ njɛ iwɛwɛ nɛ shapɛrɛganɛ atwa vwɛ n-ndumwa-tụwụma, asha ga shapa yɛu buna be eyi nɛ zasa tụsụnyasụ iwɛ iwɛwɛ ɛtɛ baa njɛ maa pana AGWANGWAMA ụrụpɛ iwɛwɛ. 4Ga shapɛ yɛu buna ata be eyi no odubo udulo tu'ulwatagwụ nu umbe AGWANGWAMA, maa patana u'ala ubwa nu uhiuhiu yɛu buna ata be eyi, maa kwụna bụ nu umbe AGWANGWAMA. 5Go bunongbo ata bụ 'wụtụ seri mehieŋ mi yɛu ɛtɛ buna maa tono nu udulo ata ụ tu'ulwatagwụ. 6Go bunongbo ata shiyeni buvwa bwa ne mehieŋ ma ata maa zhizhongo mu nu umbe ibɛgɛlɛ ɛtɛ tugwuno i jilanɛ ohwolu ata tijilo kpalụ cenje ne eshe AGWANGWAMA. 7Go bunongbo ata zweni mehieŋ ma ata mu ko na mahiuaŋ mu utukwu-ụrụpɛ iturɛre ata namɛ na amɛ udulo ata ụ tu'ulwatagwụ ne eshe AGWANGWAMA. Ga 'waŋ mehieŋ ma ata mu vwɛ nu uvwi utukwu ata ụrụpɛ tuhwoŋzhingo ata namɛ no odubo udulo ata ụ tu'ulwatagwụ. 8Go sugo manɛbɛ ma ata mu ubeni ni i'wɛŋnɛ ya amɛ yɛu buna ata be eyi bụ ụrụpɛ iwɛwɛ kpaaŋ, 9to nkpokpolo mu bwa mi yebi keeni manɛbɛ ma muba mu na mu namɛ ne emenyi keeni asụbụ ubwa, 10gana na te e suji mu na ma buna ata bụ ụrụpɛ wa amɛ-olom, gana ata du bunongbo ata zhɛ bo hwoŋzhingo iŋ hwɛɛ nu utukwu-ụrụpɛ tuhwoŋzhingo. 11Ama go sugo u'waba yɛu buna ata be eyi, tu usunda ubwa, tu uhiuhiu ubwa, ta akatakpa ubwa, ti i'wɛŋnɛ ibwɛ ya amɛ keeni tuwiŋ tu bwa hwɛɛ, 12maa bacɛnga iŋ no tupohondo tu ugba tu'ulwa maa zha no ofwo tishɛshɛshɛ, na aa 'waŋ ma'alụ, maa hwoŋzhingo iŋ apata nu ulwa i'wɛ'wɛ.
Ụrụpɛ iwɛ Iwɛwɛ ya Atwa Tu'ulwa ta ata Kpaaŋ
13Yaa shɛ tu'ulwatagwụ ti Isrɛl hwɛ hwɛɛ tɛ njɛ iwɛwɛ ni iyi nɛ ee ge mepi shi, ni iyi elele nɛ AGWANGWAMA ge peni aŋ unu maa kede a njɛ o, n-ndumwa mi ibɛ kaa mụ wụmɛ aŋ. 14Aka na ti ya kapɛshɛngwanụ aŋ, ee mepi ya iwɛwɛ ɛtɛ aa njɛ, asha ga tu'ulwatagwụ ta ata tɛ shapɛ yɛu buna be eyi maa e peni ụrụpɛ iwɛwɛ nu umbe udulo tu'ulwatagwụ ne eshe AGWANGWAMA. 15Ga n-nyarɛ mu tu'ulwatagwụ mi petengeni i'ɛlɛ ya aba nu uhiuhiu yɛu ɛtɛ buna be eyi ne eshe AGWANGWAMA, nazhɛ a kwunanjɛ bụ AGWANGWAMA. 16Go bunongbo bụ 'wụtụ seri mehieŋ mi yɛu ɛtɛ buna be eyi maa zha no ofwo udulo tu'ulwatagwụ, 17go shiyono buvwa bwa ne mehieŋ ma ata maa zhizhongo mu geri bu umbe ibɛgɛlɛ ɛtɛ tugwuno yo odubo ata kpalụ cenje nu umbe AGWANGWAMA. 18Go zwono mehieŋ ma ata mu ko na mahiuaŋ ma ata mu utukwu-ụrụpɛ ata namɛ na amɛ udulo ata ụ tu'ulwatagwụ nu umbe AGWANGWAMA. Ga 'waŋ mehieŋ maa ata mụ vwɛ nu uvwi utukwu ata ụrụpɛ tuhwoŋzhingo ata namɛ no odubo udulo tu'ulwatagwụ. 19Go sugo manɛbɛ mu bwa hwɛɛ maa hwoŋzhingo mu nu utukwu ata ụrụpɛ. 20Gana baa shɛ ba nda ni yɛu buna ata be eyi ta; gana na tu baa njɛ ni yɛu buna be eyi bụ ụrụpɛ iwɛwɛ, gabata du bɛɛ zhɛ ba nda na bu na ga. Nazhɛ bunongbo ata zhɛ ba gangana aŋ iwɛwɛ ya aba. 21Ga shapa yɛu buna ata ni ikɛnyi ibwɛ maa bacɛnga bụ no tupohondo tu ugba tu'ulwa, maa hwoŋzhingo bu gana na ti bee ge hwoŋzhinji yɛu buna bụ ụrụpɛ iwɛwɛ ikɛnyi ibwɛ.
Ụrụpɛ iwɛ Iwɛwɛ nɛ Uhiu wa Atwa Njɛ
22Aka na bụtụ na shɛ uhiu wa atwa njɛ iwɛwɛ nu umepiteshi, ni iyi elele nɛ AGWANGWAMA na shɛ Agwatana ge peni-unu ibɛ maa i shɛ shɛ ya nda o, n-ndumwa kaa mụ wụmɛ bụ. 23Yaa shɛ bee mepi ya kaa iwɛwɛ ɛtɛ baa njɛ, asha ga 'waŋnɛ biywoywo be eyi na zasa tụsụnyasụ iwɛ ụrụpɛ ata. 24Ga patana u'ala ubwa nu uhiuhiu biywoywo ata, maa kwụna bụ no ofwo ata aa kwụna iyi ụrụpɛ tuhwoŋzhingo nu umbe AGWANGWAMA, iwɛ ụrụpɛ iwɛwɛ ibwɛ. 25Go bunongbo seri mehieŋ ma ata mi iyi ụrụpɛ iwɛwɛ na buvwa bwa maa zwono mu na mahiuaŋ mu utukwu-ụrụpɛ tuhwoŋzhingo, maa 'waŋ mu na ata mụ vwɛ nu uvwi utukwu-ụrụpɛ ata u tuhwoŋzhingo. 26Go hwoŋzhingo manɛbɛ mu bwa hwɛɛ nu utukwu-ụrụpɛ, gana manɛbɛ mi iyi ụrụpɛ wa amɛ-olom, iwɛ maa bunongbo ata gengeni bu iwɛwɛ ibwɛ, ɛ zhɛ kaa a gangana bụ.
Ụrụpɛ iwɛ Iwɛwɛ nɛ Atwa Tukwakwa Njɛ
27Yaa shɛ bụtụ bu tukwakwa be elele njɛ iwɛwɛ nu umepiteshi ni iyi elele nɛ AGWANGWAMA ge peni-unu ibɛ maa i shɛ shɛ ya nda o, n-ndumwa kaa mụ wụmɛ bụ.#Tɛrɛ 15:27,28 28Aka na bee mepi ya iwɛwɛ ɛtɛ baa njɛ, bɛ shɛ ba 'waŋnɛ biywoywo bo o na zasa tụsụnyasụ iwɛ iwɛwɛ ɛtɛ ibwɛ baa njɛ. 29Ga patana u'ala ubwa nu uhiuhiu biywoywo ata bụ ụrụpɛ iwɛwɛ maa kwụna bụ nu utukwu-ụrụpɛ tuhwoŋzhingo. 30Go bunongbo seri mehieŋ mu bwa na buvwa maa zwono mu na mahiuaŋ mu utukwu-ụrụpɛ tuhwoŋzhingo, maa 'waŋ mu na ata mụ vwɛ nu uvwi utukwu-ụrụpɛ. 31Go sugo manɛbɛ mu bwa hwɛɛ gana na to o sugo manɛbɛ mi iyi ụrụpɛ wa amɛ-olom maa hwoŋzhingo mu nu utukwu-ụrụpɛ maa mu shanɛ AGWANGWAMA ụhiụŋ ụlatụ. Go bunongbo to ụrụpɛ iwɛ ubwa, nazhɛ ɛɛ zhɛ a gangana bụ iwɛwɛ ibwɛ.
32Yaa shɛ kaa ụgwụdụ bụtụ ata shɛ ba shapɛ iwɛ ụrụpɛ iwɛwɛ ibwɛ, asha ga shɛ bu na bo o na kaa zasa tụsụnyasụ baa 'waŋnɛ. 33Ga patana u'ala ubwa nu uhiuhiu ụgwụdụ ata ụrụpɛ iwɛwɛ, maa kwụna bụ no ofwo ata aa kwụna iyi ụrụpɛ tuhwoŋzhingo. 34Go bunongbo seri mehieŋ mụ ụgwụdụ ata na buvwa bwa maa zwono mu na mahiuaŋ mu utukwu-ụrụpɛ tuhwoŋzhingo, maa 'waŋ mu na ata mụ vwɛ nu uvwi utukwu-ụrụpɛ. 35Go sugo manɛbɛ mu bwa hwɛɛ gana na to o sugo manɛbɛ mi yɛu-ụgwụdụ ụrụpɛ wa amɛ-olom, maa bunongbo ata hwoŋzhinji mu nu utukwu-ụrụpɛ, na azuba iyi ya arụpɛ ata ee peni AGWANGWAMA tedure nu ulwa. Nazhɛ bunongbo zhɛ ba ta ụrụpɛ iwɛ iwɛwɛ ɛtɛ baa njɛ, ɛ zhɛ kaa a gangana bụ iwɛwɛ ibwɛ.
Iliyochaguliwa sasa
LIVAI 4: RBT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Rubassa Bible © Bible Society of Nigeria, 2008