LIVAI 22
22
Onongbo keeni Iyi Tijilo
1Nazhɛ AGWANGWAMA hiɛŋ Moses, 2Mbiso Aron na miaụŋ mu bwa me eyi maa, ga a na ishɛga no olugwo iyi tijilo nɛ atwa Isrɛl n shileni swooŋ, iwɛ maa kede e heshigeni izeci mi tijilo: Gamba AGWANGWAMA na. 3Mbiso aŋ maa, Yaa shɛ bụtụ be elele na ajalalo awaŋnɛ hiŋ kpaaŋ zhajɛ, boo gwumwongonu ni iyi tijilo nɛ atwa Isrɛl shileni AGWANGWAMA swooŋ, na aka na kaa tu baa hashɛganụ, ɛ zhɛ a bacɛnga bụtụ ata na agba mi: Gamba AGWANGWAMA na.
4I zasa bụtụ be elele nụ ụlamụ Aron na shɛ bụtụ bụ ụngwụ-uwaŋna, kwo kaa na ba zhɛnga ibilɛ, i zhɛ ba ya iyi tijilo semi aka na baa namɛ shɛshɛshɛ. Bụtụ be elele na timengeni iyi elele nɛ hashɛganụ tedure no ru'wo, kwo kaa bụtụ na shɛ tugbolo te etwenyi, 5kwo kaa bee timengeni iyi nɛ yo hombilo, inɛɛ nɛ zhɛ ya hashɛgana bụ, kwo kaa bụtụ na zhɛ ba nda bụ maa hashɛganụ, 6bụtụ na timengeni kaa iyi gɛnɛ ɛtɛ ye elele, bi zhɛ ba hashɛganụ tutu ụrụmɛ. Bi zha shɛ kaa du ba ya iyi tijilo semi tu baa dụrɛ tugwo meni. 7Aka na uwaŋna teni, bi zhɛ ba nama ya shɛshɛshɛ, na aba ibɛ nazhɛ bee eri ba ya iyi tijilo, iwɛnɛ ti iyimɛyɛ ɛtɛ ga shɛ inɛ ibwɛ. 8Bɛ shɛ shɛ ba ya iyi elele nɛ meme 'weji, kwo kaa inɛɛ nɛ usunda-ehilo dwetweji maa mama hashɛgana ni ibɛ o. Gamba AGWANGWAMA na. 9A shɛ a untangana unu mu tɛtɛtagana, iwɛ aka na ɛɛ zhɛ a 'waŋna iwɛwɛ ya aba iwɛ ibɛ, ɛɛ zhɛ kaa o 'wo apata na aka na te e heshigeni iŋ: Gamba AGWANGWAMA na mo shilo aŋ swooŋ na.
10Bụtụ bu tupohondo zha shɛ ba ya iyi tijilo. Bụlashɛ na bunongbo 'yajɛ keeni bɛnjɛ-bu-ugondu bụ ụgwụ na aa tụpa utashɛ, zha shɛ ba ya iyi tijilo. 11Ama yaa shɛ bunongbo so bujama nu ukwuribi ubwa maa sha bu na bwa, bujama ata zhɛ ba ya iŋ, ta atwa na ee meci ni ihwɛ ibwɛ, ɛ zhɛ a ya iyimɛyɛ ibwɛ. 12Yaa shɛ yɛu-yo-o bunongbo cɛnɛ bụtụ bu tupohondo, bi zha shɛ ba ya iyi ya arụpɛ tijilo. 13Ama yaa shɛ yɛu-yo-o bunongbo shɛ bululo kwo kaa bwolo bwa keri bu, baa zasa kaa yɛu, bee gwure ya ni ihwɛ bishi bwa, gana na tu baa ta shɛ yɛu towo, bi eri ba ya iyimɛyɛ bishi bwa. Ama bụtụ bu tupohondo zha shɛ ba ya iŋ o.
14Yaa shɛ kaa bụtụ bu ko yɛ iyi tijilo nu mepiteshi, bɛ shɛ ba tụpa iŋ hwɛɛ, maa madanga iyi itana ibɛ, maa pana bunongbo. 15Onongbo shɛ shɛ a hashɛgana iyi tijilo nɛ atwa Isrɛl peni AGWANGWAMA o. 16Iwɛ aka na yɛɛ zhɛ ya nda maa a 'waŋna tijama keeni tụwụma ta aba, tedure ni iyi tijilo tiya. Gamba AGWANGWAMA na mo shilo aŋ swooŋ na.
Kede o To Arụpɛ nu Usunda na 'Yajɛ Tụsụnyasụ o
17Nazhɛ AGWANGWAMA hiɛŋ Moses, 18Hiɛŋ Aron, ta miaụŋ mu bwa me eyi keeni atwa Isrɛl hwɛɛ maa, Aka na ta bụtụ bi ihwɛ Isrɛl be elele, kwo kaa bụlashɛ na namɛ ni Isrɛl shɛkanɛ AGWANGWAMA upwaŋ ubwa, okwo waa shɛ tụ'ụrụcɛnga tu unu na bee ge shiri la, kwo kaa upwaŋ tukwulangana, maa ụ shɛ ụrụpɛ tuhwoŋzhingo, 19maa e leshiji uŋ, asha ga i shɛ butubwenyi, kwo kaa agwụdụ kwo kaa iyweywe nɛ zasa tụsụnyasụ. 20Ta pana ma AGWANGWAMA iyi elele nɛ 'yajɛ tụsụnyasụ o, bi zha shɛ ba lashɛga iŋ o.#Undwa 17:1 21Aka na bụtụ be elele peni AGWANGWAMA ụrụpɛ wa amɛ-olom, maa ụrɛcɛnga unu ubwa tishilo, kwo kaa upwaŋ tukwulangana, na buna, kwo kaa nụ ụgwụdụ, i shɛ shɛ ya 'yaga tụsụnyasụ o, maa e leshiji iŋ. Kede tụsụnyasụ te elele tu nama ni ibɛ o. 22Hiɛ shɛ shɛ hia pana AGWANGWAMA ụrụpɛ na dure nu ulwa nu utukwu-ụrụpɛ nu usunda na lubeni, kwo kaa unaa na hiingwa, kwo kaa bu naa na munatangwụ, kwo kaa bu naa na 'yajɛ ukwuru, kwo kaa bu naa na namɛ shakwa shakwa o. 23Hi eri hia shɛkana ụrụpɛ tukwulangana na buna be eyi, kwo kaa nụ ụgwụdụ na itwɛ tu'waba tu bwa momo hwulosu ụnjɛswa. Ama yaa shɛ iwɛ ụrụpɛ unu-tishilo, a zha shɛ a lashɛga iŋ o. 24Usunda we elele na ee kwuci, kwo kaa aa pɛpɛtanganɛ, kwo kaa ee bwereteji, kwo kaa ee jeji iyi ibwɛ ike, ta pana ma ya AGWANGWAMA tedure nụ ụrụpɛ tuta ni ibɛ, na cɛnjɛ ti hiŋ o. 25Okwo yaa shɛ bugaiŋ 'waŋnɛ usunda we elele na shɛ gana ata, ta pana ma Agwatana hiŋ iyimɛyɛ gɛnɛ ɛtɛ o. A zha shɛ a lashɛga uŋ ya o, iwɛnɛ tu waa 'yagawa tụsụnyasụ.
26Nazhɛ AGWANGWAMA hiɛŋ Moses, 27Aka na ta buna, okwo ụgwụdụ, kwo kaa biywoywo meci yɛu-ye-eyi, yɛu ɛtɛ shɛ ya nama no bino bwa ijitɛ icenje. Ama te kwuni nụ ụjita ụtụndatụ, ɛ zhɛ a lashɛga bụ, ti yaa shɛ ee peni bu AGWANGWAMA nụ ụrụpɛ na dure nu ulwa. 28Okwo yaa shɛ kaa bino buna, kwo kaa ụgwụdụ, ta kwụna bu ma ti yɛu ibwɛ nu uwaŋna ụjita uko hwɛɛ aba ebe yebi o. 29Aka na ɛhi zhɛ hia pana AGWANGWAMA ụrụpɛ ugwoje, hiɛ shɛ hia ta uŋ gana na ta andwa ibɛ namɛ, maa e leshiji uŋ. 30Ya ma usunda ubwa jita ata gbaa, ta ganga ma okwo uko maa iyi heleni uŋ o. Gamba AGWANGWAMA na.
31Untangana ma onu mi tụpana maa kaa hi na nda aŋ. Gamba AGWANGWAMA na. 32Ta hashɛgana ma kaa izeci mi tijilo, ama N zhɛ kaa ma sha bụtụ bi tijilo na ashashɛ atwa Isrɛl. Gamba AGWANGWAMA na mo hi shilo swooŋ na. 33N hi bɛcinjɛ na cɛnjɛ ti Ijipti, maa ma sha Agwatana hiŋ. Gamba AGWANGWAMA na.
Iliyochaguliwa sasa
LIVAI 22: RBT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Rubassa Bible © Bible Society of Nigeria, 2008