LIVAI 20
20
Ulwapɛ u Tuswoswoswo Tumuna Atwa
1Nazhɛ AGWANGWAMA hiɛŋ Moses, 2Mbiso atwa Isrɛl maa, Bụtụ bi Isrɛl be elele, kwo kaa agaiŋ a na shɛ alashɛ ni Isrɛl, a na peni tuwa tu na ɛɛ hiɛŋ Molɛk miaụŋ ma aba me elele. Ga atwa cɛnjɛ ta ata tegeni bu atayɛ maa a kwụnɛ bụ. 3Gamba ni ikɛnyi mi N zhɛ mo imo bụtụ ata. Ge becinji bu na ashashɛ atwa ubwa, iwɛnɛ ti bee peni tuwa tu na ɛɛ hiɛŋ Molɛk yɛu ibwɛ ike, bee heshigeni ohwolu mi tijilo keeni izeci mi tijilo. 4Yaa shɛ kaa atwa cɛnjɛ ta ata henicingeni bụtụ ata rishe okwo cwɛŋ bana, na aka na ti bee peni tuwa ta ata tu Molɛk yɛu ibwɛ ike, aa kwụnɛ shɛ bụ, 5asha N zhɛ mo imo bụtụ ata keeni ukpogwu ubwa, ɛ zhɛ kaa a bacɛnga aŋ na ashashɛ atwa aba, tu bwa ata, ta atwa elele na 'wa bụ a na a zhɛba tuwa ta ata tu Molɛk.#Liv 18:21
6Yaa shɛ bụtụ be elele zhegeni atwa e'uye keeni orizhonu, baa zhɛba aŋ, N zhɛ mo imo bụtụ ata, Ngɛɛ zhɛ kaa ma bacɛnga bụ du na ashashɛ atwa ubwa.
7Iwɛbɛ po meme shiri ma swooŋ, maa hiɛ shɛ atwa tijilo; iwɛnɛ po Gamba AGWANGWAMA na shɛ Agwatana hiŋ na. 8Untangana ma shikpogo shi mi, maa hi na nda shụ: Gamba AGWANGWAMA na mo hi shilo swooŋ na.
9Bụtụ be elele na twajɛ bishi bwa, kwo kaa bino bwa, ga kwụnɛ bụ. Tijama to tu'wo tu bwa tu namɛ nu uhiuhiu ubwa.#Ụban 21:17; Mat 15:4; Mak 7:10
10Yaa shɛ bụtụ njɛ tuwɛle ne biyikwo bu uyebi ubwa, ga kwụnɛ aŋ hwɛɛ aba ebe yebi, ta bɛnjɛ ata bu tuwɛle, te biyikwo ata baa njɛ tuwɛle nu bwa.#Ụban 20:14; Liv 18:20; Undwa 5:18
11Bụtụ na weci ne biyikwo bishi bwa, bɛ njɛ tupwaŋ, ga kwụnɛ aŋ hwɛɛ aba ebe yebi. Tijama to tu'wo ta aba tu namɛ no ohiuhiu aba.#Liv 18:8; Undwa 22:30; 27:20
12Yaa shɛ bụtụ weci nu utashɛ ubwa, ga kwụnɛ aŋ hwɛɛ aba ebe yebi; a njɛ tupwaŋ. Tijama to tu'wo ta aba tu namɛ no ohiuhiu aba.#Liv 18:15
13Yaa shɛ bụtụ weci ne butubwenyi gana maa biyikwo, ga kwụnɛ aŋ hwɛɛ aba ebe yebi, a njɛ tupwaŋ. Tijama to tu'wo ta aba tu namɛ no ohiuhiu aba.#Liv 18:22
14Yaa shɛ bụtụ zeni biyikwo, te bino biyikwo ata, a njɛ tupwaŋ, ge hwoŋzhinji aŋ nu ulwa, hwɛɛ aba aba tatụ, iwɛ maa kede iyi-tupwaŋ na nama na ashashɛ hiŋ o.#Liv 18:17; Undwa 27:23
15Yaa shɛ bụtụ weci nu usunda-ehilo, ga kwụnɛ bụ, tu usunda ata ehilo.
16Yaa shɛ biyikwo zhegeni usunda-ehilo, bee weci nu bwa, ga kwụnɛ biyikwo ata, tu usunda ata ehilo. Tijama to tu'wo ta aba tu namɛ no ohiuhiu aba.#Ụban 22:19; Liv 18:23; Undwa 27:21
17Yaa shɛ bụtụ zeni bụngwụfwụ bwa, na shɛ yɛu nɛ bishi bwa kwo kaa bino bwa meci, aa mama kwụbanụ kaa mohondo ma aba, ga njɛ aŋ ezuye ne eshe ufwugwo maa e becinji aŋ na tu'ulwa. Aba zhɛ a 'waŋna tijama ta aba.#Liv 18:9; Undwa 27:22
18Yaa shɛ bụtụ weci ne biyikwo na njɛ shɛ iyi, bee shiri bu mohondo, asha bi kepishinji ibilɛ biyikwo ata, biyikwo ata kaa du shiri ibilɛ mehieŋ mu bwa mohondo. Ge becinji aŋ na ashashɛ atwa aba hwɛɛ aba ebe yebi.#Liv 18:19
19To woto no nobu tidice, kwo kaa no nobu 'wụtụ, kwo kaa nu ushimwa bụ o. Inɛ ɛtɛ i shɛ bu weci na bụtụ na abụ 'yajɛ ụmatụ nu bwa kpɛmkpɛm. I shɛ tilɛɛ maa a 'waŋna tijama ta aba.
20Yaa shɛ bụtụ weci ne biyikwo bishi bwa bụ 'wụtụ, kwo kaa bu na bi tidice, kwo kaa biyikwo butatugwa bwa, asha bɛ njɛ bishi bwa, kwo kaa butatugwa ata bwa ụpụrụsa. I shɛ tilɛɛ maa ga 'waŋna iwɛwɛ ya aba. A zha shɛ a mata kaa miaụŋ nazhɛ e 'wi kwukwuŋ.#Liv 18:12-14
21Yaa shɛ bụtụ leshiji biyikwo batagwụ kwo kaa buhongwu bwa, i shɛ iyi nɛ zasa rụmbɛɛ, bɛ njɛ batagwụ kwo kaa buhongwu bwa ụpụrụsa, a zha shɛ a mata yɛu o.#Liv 18:16
22Untangana ma shikpogo shi mi keeni andwa mi kpaaŋ, maa hi na nda aŋ, iwɛ maa kede cɛnjɛ tu na Ngɛɛ zhɛ mo hi sugo na tuba maa hi gɛga tɛ hiɛ lacɛ hwuŋ tunama o. 23To nyiwonowuŋ ma ni iyi iwɛ nɛ edenji na Omo hi unzongo apata a nda o. Iwɛnɛ ta a nda ijɛ hwɛɛ, iwɛbɛ po Ama nda inyizhi ya aba. 24Ama N hi hiɛŋ, Ya ma ogwu cɛnjɛ ta aba. N zhɛ kaa ma hi pana tụ maa hi 'yaga, cɛnjɛ tu na ti 'yajɛ ugwungwu tu na kaa tuwebiye ta fwunga. Gamba AGWANGWAMA na shɛ Agwatana hiŋ na mo hi bogwu na atwamwa na.
25Iwɛbɛ po ahiɛ shɛ hio shilo ogwungwu na ashashɛ usunda-ehilo na hashɛganụ, nu unaa na hashɛganụ sụ, tụ ụnụnụ na hashɛganụ nu unaa na hashɛganụ sụ. Ta mama hashɛgana ma tedure nu usunda-ehilo, kwo kaa nụ ụnụnụ, kwo kaa ni iyi elele nɛ yo kokwulo amɛ ibɛ na cɛnjɛ o, inɛɛ nɛ kaa Ngaa dumwa caakwụ maa i hashɛganụ o. 26Sha ma atwa mi tijilo, iwɛnɛ tu Gamba AGWANGWAMA Ngaa shɛ bụtụ bi tijilo. Ibɛ po Ngoo hi bogwu na anya edenji, iwɛ maa hiɛ shɛ atwa mi kiri.
27Butubwenyi kwo kaa biyikwo be elele na ba nda tirizhonu kwo kaa tizhikwoto, ge tegeni bu atayɛ maa a kwụnɛ bụ. Tijama to tu'wo ta aba tu namɛ no ohiuhiu aba.
Iliyochaguliwa sasa
LIVAI 20: RBT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Rubassa Bible © Bible Society of Nigeria, 2008