LIVAI 10
10
Ata Nadab na Abihu Njɛ Iwɛwɛ, Ee 'Wi
1Ga Nadab na Abihu miaụŋ-me-eyi mu Aron, bụtụ bụtụ aba shepi ujebi ubwa ulwa tutala, aa tarɛ ulwa na shɛ shɛ una tijilo na aba, ee peteni iturɛre na aba, aa shɛkanɛ AGWANGWAMA ulwa ata unaa na bee peni shi aŋ kaa unu ubwa. 2Ibɛ po ulwa banɛ na agba AGWANGWAMA eshigiri, woo hwoŋzhinji aŋ, ee 'wi nu umbe AGWANGWAMA apata. 3Nazhɛ go Moses hiɛŋ Aron, Iwɛ gɛ AGWANGWAMA jɛmɛ na, bɛɛ hiɛŋ, N zhɛ mo mbisono tijilo ti mi na ashashɛ atwa na gwumwonu ne mi, ɛ zhɛ kaa ma m pana ụjɛrụma ne eshe atwa ga kpaaŋ. Ga Aron dumanɛ shɛ iwɛ ye elele kwukwuŋ.
4Nazhɛ go Moses suyanɛ Mishaɛl, nɛ Ɛlzafan, a na shɛ miaụŋ-me-eyi mu Uziɛl (a na shɛ nkwonyi mo bino) Aron, bɛɛ hiɛŋ aŋ, Kaanɛ ma izhɛ maa hi suji n'wo mu miaụŋ-mo-bino hiŋ hi becinji mu no ohwolu ga tijilo maa hi zhe no tupohondo tu ugba tu'ulwatagwụ tu ga. 5Aa kaanɛ ga izhɛ, ee suji aŋ, tu n-nduka ma aba, ee beni nu ugba tu'ulwatagwụ, gana na tu go Moses hiɛŋ aŋ. 6Go Moses hiɛŋ Aron, ne Eliaza keeni Itama, miaụŋ-me-eyi mu Aron, Ta 'nyanga ma tukpala o,#10:6 Ta 'nyanga ma tukpala o: Abayiburu oko hiɛŋ, Ta ganga ma ohiuhiu hiŋ tu'urugono, kwo kaa Ta ganga ma tihiŋzhe ti hiŋ tuswamba o. ta ta ma ụkwụla o, ta nda ma kaa du ụcɛnjɛ o, shibwonu hi zhɛ hio 'wo. AGWANGWAMA kaa du zhɛ ba nda isɛbwɛ na tu'ulwa tu ga kpaaŋ. Ama ga miaụŋ-mo-bino hiŋ mu na mɛ shɛ atwa Isrɛl hwɛɛ mɛ cwɛ-u'wo iwɛ ulwa wa AGWANGWAMA na hwoŋni. 7Ta bana ma kaa okwo no odubo udulo tu'ulwatagwụ o, shibwonu hi zhɛ hio 'wo. Iwɛnɛ po o hi dudugwonuo manɛbɛ ma AGWANGWAMA. Aa njɛ ga gana na tu go Moses mbishi aŋ.
Iyi nɛ Ee Shileni Onongbo
8Nazhɛ AGWANGWAMA jɛmɛ n-ndumwa na Aron, bɛɛ hiɛŋ, 9Tu gabụ, ta miaụŋ mụ bụ me eyi, ta na swa ma meni mụ tụ'walụ ta afwafwa o, ta mayaga, na aka na ɛhi zhɛ nu udulo tu'ulwatagwụ o, shibwonu hi zhɛ hio 'wo. I shɛ okpogo unyizo-nom tutu rungwutwonu awaŋnɛ hiŋ hwɛɛ. 10Na manga maa na mapa tuswoswoswo ti iyi tijilo ni iyi nɛ shɛ inɛ yo ohondo keeni tuswoswoswo ti iyi nɛ hashɛganụ sụ ni iyi nɛ hashɛganụ. 11Ahiɛba kaa hi zhɛ hio mbisogono atwa Isrɛl shikpogo shɛ ga AGWANGWAMA peni aŋ tedure no Moses kpaaŋ.
12Nazhɛ go Moses mbishi Aron ne Eliaza keeni Itama, miaụŋ mu Aron mu na mu ta vwɛ, bɛɛ hiɛŋ, Shapa ma ijɛ ɛtɛ ụrụpɛ tiya i vwɛ keeni ụrụpɛ ata ee peni AGWANGWAMA tedure nu ulwa maa hiɛ yɛ iŋ uzawa Ifucingɛ, na bụ'aŋbụ bu utukwu-ụrụpɛ, iwɛnɛ ti yaa shɛ iyi tijilo me tijilo. 13Ya iŋ ma no ofwo tijilo, iwɛnɛ ti yaa shɛ urobwo bu keeni una miaụŋ mụ bụ du, inɛɛ nɛ banɛ nu ụrụpɛ na ee peni AGWANGWAMA tedure nu ulwa, gana ee m peni-unu ibɛ ta.#Liv 6:14-18 14Ama ya ma ukosobu ata ee vwurenji keeni i'unte ɛtɛ ee peni AGWANGWAMA no ofwo elele na hashɛganụ sụ, tụ gabụ, ta miaụŋ mụ bụ me eyi keeni miaụŋ mụ bụ mo o mu na mu namɛ na bụ. Gabụ ee peni iŋ maa i shɛ urubwo bu, ta miaụŋ mụ bụ. Ibɛ shɛ inɛɛ nɛ banɛ na arụpɛ amɛ-olom atwa Isrɛl.#Liv 7:30-34 15Ga a shapɛ i'unte ɛtɛ keeni ukosobu ata ee vwurenji, medenji manɛbɛ ma arụpɛ ata ee peni AGWANGWAMA tedure nu ulwa, maa a shɛkanɛ iŋ AGWANGWAMA. Inɛ ɛtɛ kaa ibɛ zhɛ ya sha inɛ bụ, keeni miaụŋ mụ bụ mu na mu namɛ na bụ, maa i shɛ urobwo bu unyizo-nom, gana na ta AGWANGWAMA peni-unu ibɛ. 16Aka na go Moses hweyigeni iwɛ biywoywo ata bụ ụrụpɛ iwɛwɛ tebiye tebiye, tobwolo bu hwoŋnuo cebe! Baa 'yajɛ isɛbwɛ ne Eliaza keeni Itama a na shɛ miaụŋ mu Aron mu na mụ vwɛ, bɛɛ hiɛŋ aŋ, 17Iwembe po ahiɛ yɛ shɛ iyi ụrụpɛ ata iwɛwɛ no ohwolu ata tijiloo? Gana na ti yaa shɛ iyi tijilo me tijilo, e hi peni iŋ kaa maa hi 'waŋna ulwapɛ tu'ulwatagwụ tu ga kpaaŋ maa kaa hi to ụrụpɛ maa AGWANGWAMA gengeni aŋ iwɛwɛ ya aba.#Liv 6:24-26 18E tecinji shi kaa mehieŋ mi ibɛ na amɛ ohwolu ata tijilo. I ga shɛ kaa tilɛɛ maa hiɛ yɛ iŋ no ohwolu ata tijilo, gana na ti Ngee hi peni-unu ibɛ. 19Ama ga Aron hiɛŋ Moses, Hioko, hwayɛ ga ibɛ ee peni AGWANGWAMA ụrụpɛ wa aba iwɛwɛ keeni ụrụpɛ wa aba tuhwoŋzhingo. Gamba na kaa iwɛ gɛ te vwuteni! Yaa shɛ Ngaa nga yɛ iyi ụrụpɛ ata iwɛwɛ hwayɛ ga, i gɛ zhɛ ya kwulana AGWANGWAMA hŋ? 20Aka na go Moses hwụjɛ iŋ, nazhɛ amɛ ubwa lemi suu.
Iliyochaguliwa sasa
LIVAI 10: RBT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Rubassa Bible © Bible Society of Nigeria, 2008