ỤBANỤ 37
37
Tɛnda ti Ikpɛtɛ Unu-tutwa
(Ụban 25:10-22)
1Gɛ Bɛzalɛl njɛ ikpɛtɛ ɛtɛ nụ ụ'wụ'wụ we ekeshia. Ụnjɛswa ibɛ shɛ imbele i'ɛlɛ iyebi na ashashɛ, uholo ibɛ shɛ ombolo u'ala oko na ashashɛ, uzoto ibɛ shɛ ombolo u'ala oko na ashashɛ. 2Bee sweni iŋ azhɛnarɛya tụrụmbɛɛ, ta amɛ ta aba ibɛ, baa njɛ azhɛnarɛya derere bee peteni ni izhɛmi ibɛ tutu rungwutwonu. 3Nazhɛ baa ndanɛ iŋ tɛkanɛ ti neshi iwɛ akatakpa ibɛ eneshi, tɛkanɛ ti yebi tu namɛ zalụ bu ko, tɛkanɛ ti yebi ti nya tu namɛ zalụ bi yebi. 4Bee shebeni iŋ imbele nụ ụ'wụ'wụ we ekeshia, bee sweni iŋ azhɛnarɛya. 5Bee hwuŋtengeni imbele ɛtɛ na tɛkanɛ ti i'ɛŋbi ikpɛtɛ ɛtɛ, maa a na 'waŋna iŋ ni ibɛ. 6Baa ndanɛ iŋ tu'urugono na azhɛnarɛya tụrụmbɛɛ; ụnjɛswa tuba ụ shɛ imbele i'ɛlɛ iyebi na ashashɛ, uholo tuba ụ shɛ ombolo u'ala oko na ashashɛ. 7Bee jibi azhɛnarɛya baa njɛ iyi-uumwa ya apiambɛ iyebi, nɛ 'yajɛ ụpɛshɛka bụtụ, baa gɛgacanjɛ iŋ nu ukwunanga tu'urugono ta ata zalụ hweehwe, 8ijɛ ɛtɛ uumwa ike namɛ nu ukwunanga uko, inɛ iyebi namɛ nu ukwunanga uyebi, bee cimbengeni iyi-uumwa ɛtɛ maa i shɛ iyi ike no tu'urugono ta ata zalụ hweehwe. 9Iyi-uumwa ɛtɛ kaa berishiji apiambɛ aba na azuba, apiambɛ ata aba ubi tu'urugono ta ata na azuba, o momo pononu shishe, aa ngbaracɛ tu'urugono ta ata.
Tɛnda tu Uteburu iwɛ ibrɛd nɛ Ee Peni Agwatana
(Ụban 25:23-30)
10Baa ndaananɛ uteburu nụ ụ'wụ'wụ we ekeshia. Ụnjɛswa ubwa ụ shɛ imbele i'ɛlɛ iyebi, uholo ubwa ụ shɛ ombolo u'ala oko, uzoto ubwa ụ shɛ ombolo u'ala oko na ashashɛ. 11Bee sweni uŋ azhɛnarɛya tụrụmbɛɛ, bee jibi azhɛnarɛya derere, bee peteni ni izhɛmi ubwa tutu rungwutwonu. 12Baa njɛ akpada tɛjɛlanɛ ti izhɛmi ubwa na azhɛnarɛya tutu rungwutwonu, uholo wa aba ụ shɛ ụbabasụ u'ala uko, bee jibi azhɛnarɛya anya derere, bee peteni ni izhɛmi wa aba tutu rungwutwonu. 13Baa ndanɛ uŋ tɛkanɛ ta azhɛnarɛya ti neshi, bee hwuŋtengeni tɛkanɛ ta ata ne esugwulumi ubwa eneshi no ofwo akatakpa ubwa eneshi. 14Tɛkanɛ ta ata ti cimbengeni to gwumwonu na azhɛnarɛya ata ee peteni ni izhɛmi tutu rungwutwonu, na tɛkanɛ ta ata ɛɛ zhɛ o hwuŋtongono imbele ɛtɛ ɛɛ zhɛ na 'waŋna uteburu ata. 15Bee shebi imbele nụ ụ'wụ'wụ we ekeshia, inɛɛ nɛ ɛɛ zhɛ na 'waŋna uteburu ata, bee sweni iŋ azhɛnarɛya. 16Bee shepi azhɛnarɛya tụrụmbɛɛ baa njɛ iyi-uhwugwa, inɛɛ nɛ ɛɛ zhɛ na patangana ni ihiŋhiŋ uteburu ata, ibɛ shɛ apalụ, na agbamgbam iwɛ iturɛre, no nkwodo mu bwa keeni nkwasha mu bwa mu na ɛɛ zhɛ na sala meni maa o no zwono ni iyi ụrụpɛ tuswa.
Tɛnda tu Uteburu Ụsụtụla
(Ụban 25:31-40)
17Baa ndaananɛ uteburu ụsụtụla na azhɛnarɛya tụrụmbɛɛ. Tudubo bee jibi akatakpa ubwa; tụ ụ'wụ'wụ uteburu ata; to tusumbo tu bwa tu na tɛ shɛ gana okwukwusu ubwa, tɛ shɛ iyi ike nu bwa. 18Shɛ'walụ shɛ na shɛ banɛ ni i'ɛŋbi uteburu ata shɛ namɛ shi cihiŋ. Shɛ'walụ shi uteburu ata ụsụtụla, shɛ tatụ shɛ banɛ na bụ'aŋbụ bu bwa bụ ụzalụ uko, shɛ'walụ shi uteburu ata ụsụtụla shɛ tatụ shɛ banɛ na bụ'aŋbụ bụ ụzalụ uyebi ubwa. 19Ekwepi ubwa atatụ, a na aa njɛ gana shilmond, una una nu ukwukwusu ubwa, tusumbo tu bwa ti cimbeni na a'walụ ubwa oko. Ekwepi ubwa atatụ a na aa njɛ gana shilmond, una una namɛ nu ukwukwusu ubwa, tusumbo tu bwa ti cimbeni na shɛ'walụ shɛ ubwa shi yebi. Gabata baa njɛ iwɛ shɛ'walụ sha ata shi cihiŋ shɛ na shɛ banɛ ni i'ɛŋbi uteburu ata ụsụtụla. 20Uteburu ata ụsụtụla 'yajɛ ekwepi ubwa eneshi, a na aa njɛ gana shilmond, medenji okwukwusu aba, keeni tusumbo ta aba. 21Ukwukwusu uko namɛ tuta ta a'walụ a'walụ, na shɛ'walụ sha ata shi cihiŋ shɛ na shi cimbengeni nu uteburu ata ụsụtụla. 22To okwukwusu aba, ta shɛ'walụ sha aba, a njɛ iŋ maa i shɛ iyi ike nu uteburu ata, kpaaŋ ibɛ i shɛ tudubo ee jibi azhɛnarɛya tụrụmbɛɛ nazhɛ aa njɛ uŋ.
23Na azhɛnarɛya tụrụmbɛɛ baa ndaananɛ asụtụla ecenje, keeni shɛsuka keeni apalụ na maa o no zwono shɛsuka sha ata. 24Ne bimenji ba azhɛnarɛya tụrụmbɛɛ, na shini ụzhɛka ụ'wụtụ baa njɛ uteburu ata, ti i'wɛŋni'wɛŋni ibwɛ kpaaŋ.
Tɛnda tu Utukwu Iturɛre Tuhwoŋzhingo
(Ụban 30:1-5)
25Baa njɛ utukwu iturɛre nụ ụ'wụ'wụ we ekeshia. Ụnjɛswa ubwa ụ shɛ ombolo u'ala oko, uholo ubwa ụ shɛ ombolo u'ala oko, ogongo ubwa hwɛɛ aba eneshi nangwụ, uzoto ubwa ụ shɛ imbele i'ɛlɛ iyebi; mahiuaŋ mu bwa mɛ shɛ iyi ike nu bwa. 26Bee sweni uŋ azhɛnarɛya tụrụmbɛɛ, ta azuba ubwa, ti i'ɛŋbi ibwɛ tutu rungwutwonu, ta mahiuaŋ mu bwa, bee jibi azhɛnarɛya derere bee peteni ni izhɛmi ibwɛ tutu rungwutwonu, 27Baa njɛ tɛkanɛ ta azhɛnarɛya ti yebi derere, bee peteni ni izhɛmi ibwɛ, zalụ hweehwe bi i'ɛŋbi ibwɛ iyebi, maa tɛ shɛ ofwo na oo hwuŋtongono imbele ibwɛ maa a na 'waŋna uŋ. 28Bee shebi imbele ɛtɛ nụ ụ'wụ'wụ we ekeshia, bee sweni iŋ azhɛnarɛya.
Tɛnda ta Manɛbɛ mu Tududugono
(Ụban 30:22-38)
29Nazhɛ baa ndaananɛ manɛbɛ mi tijilo mu tududugono, keeni iturɛre tụrụmbɛɛ, inɛɛ nɛ oo hiŋtotongo ni iyi tuswoswoswo nɛ 'yajɛ ụhiụŋ ụlatụ, bɛ njɛ iŋ gana na ta bụtụ na shɛ bugwoni bi iturɛre ba nda.#Ụban 30:22-38
Iliyochaguliwa sasa
ỤBANỤ 37: RBT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Rubassa Bible © Bible Society of Nigeria, 2008