ỤBANỤ 34
34
E Shebeneni Atayɛ Tụpatakwụ patakwụ Anya
(Ụban 10:1-5; Undwa 10:1-5)
1Nazhɛ AGWANGWAMA hiɛŋ Moses, Shaba atayɛ eyebi patakwụ patakwụ gana a na ala ehiiŋ. N zhɛ ma 'nyata n-ndumwa ma atayɛ ala ehiiŋ ebu bweji la na aba. 2Mama imanjɛ maa munje Ishɛmɛ gɛ Sainai beyi nu uvwungwa, maa twa ne mi ni ihiŋhiŋ ishɛmɛ gɛ. 3Kede bụtụ be elele munje na bụ o, to lono maa a kwụbɛ bụtụ be elele ni ishɛmɛ gɛ no ofwo elele o. To lonono agwụdụ, ni inɛ maa a na yaga ne mbi Ishɛmɛ gɛ o.
4Go Moses shebi ga atayɛ ata tụpatakwụ patakwụ eyebi gana a na ala ehiiŋ; bee suji aŋ baa gbatụ ti'ishijɛ nu uvwungwa dididi, bee munji ni Ishɛmɛ Sainai gana na ta AGWANGWAMA ge peni bu unu.
5Nazhɛ AGWANGWAMA kezhe nu udomu, bee shikeni nu bwa apata, bee enenji izeci ibwɛ tijilo maa, AGWANGWAMA.#34:5 AGWANGWAMA: Zhaga kwụba ti'eshicigono tu 3:14,15. 6Nazhɛ AGWANGWAMA keshici nu umbe Moses, baa ananga, bɛɛ hiɛŋ, Gamba AGWANGWAMA, AGWANGWAMA, na shɛ Agwatana inyɛmɛnyɛmɛ tihioko keeni tulubo ti biye, bɛ njɛ shɛ izɛlɛgwu ni isɛbwɛ tɛnda o, tulubo ti biye keeni tɛcara ti gembi no ofwo mi.#Tɛrɛ 14:18; Nehi 9:17; Shɛzu 86:15; 103:8; 145:8 7Ba untangana tulubo tu bwa ti biye iwɛ atwa igbɛɛ igbɛɛ, baa gangana kaa atwa iyi iwɛ ya aba keeni andwa aba tubwada keeni iwɛwɛ ya aba, ama bi zha shɛ ba ganga kaa bụtụ na n-ndumwa-wụmɛ gadaga o. Bi zhɛ ba pana miaụŋ, ta ajalụ, ta ajalalo keeni anyabɛshɛ ulwapɛ iyi iwɛ nɛ eshi aba njɛ.#Ụban 20:5,6; Tɛrɛ 14:18; Undwa 5:9,10; 7:9,10
8Ibɛ po go Moses njɛ kakayɛ bee ubi eshe ubwa na cɛnjɛ, baa zhɛbɛ bụ. 9Bɛɛ hiɛŋ, Oo AGWANGWAMA, yaa shɛ iwe mi ubu kwụlanɛ gom, asha ma bụ tabwa, maa zhagaga no tu; okwo ta a shɛ atwa na hweteni; iti gengeni iyi iwɛ tu keeni iwɛwɛ tu, maa iti leshiji maa ta sha atwa bụ.
A Ndaananɛ Unu Ufwo Tutwa
(Ụban 23:14-19; Undwa 7:1-5; 16:1-17)
10Nazhɛ AGWANGWAMA hiɛŋ Moses, Hioko unu Ama twa ne E'isrɛl. N zhɛ ma nda iyi tudama ne eshe atwa bụ kpaaŋ, inɛɛ nɛ usara ibɛ ta njɛ shɛ la kwukwuŋ nu unyizo, kwo kaa na ashashɛ anya edenji. Atwa elele zhɛ a kwụba iyi i'wɛtwɛ nɛ Ngɛɛ zhɛ ma nda, Gamba AGWANGWAMA, iwɛnɛ ti iyi nɛ Ngɛɛ zhɛ ma nda na bụ i shɛ iyi inyɛsɛ tụsụma i'wɛtwɛ 'wɛtwɛ. 11No shiyono ahaŋsa bụ nu unu na Ama bụ pana hwayɛ ga. Hioko, N zhɛ mo hi unzongo A'amo, ne Ekenan, nɛ Ɛhit, nɛ Ɛpɛrɛz, nɛ Ɛhiv keeni Ɛjɛbus nu umbe bu. 12Ta na twa-unu na atwa na jɛjɛ na cɛnjɛ ta ata ɛbi zhɛ o, iwɛ aka na ɛɛ zhɛ ma bu shana hwuŋ ugwuru na zhɛ ma bụ ima. 13Hiɛ shɛ hio hwuŋzotongo otukwu-ụrụpɛ aba, bwarataga ma ntatanuwaŋ ma aba kpaaŋ, keeni ashɛra na shɛ tuwa ta aba to o.#Undwa 16:21 14Iwɛnɛ po bɛ shɛ shɛ ba zhɛba tuwa te elele o, AGWANGWAMA na ɛɛ hiɛŋ izeci ibwɛ, Gɛ-isɛbwɛngwɛ, ubwa shɛ Agwatana isɛbwɛngwɛ.#Ụban 20:5; Undwa 4:24; 5:9 15Ta na twa-unu we elele na atwa na jɛjɛ na cɛnjɛ ta ata o, iwɛ aka na ɛɛ zhɛ ma hi suyana hwuŋ na tɛzhɛba tatuwa ta aba maa hi zhe hiɛ yɛ iyi nɛ oo to ụrụpɛ, 16Nazhɛ miaụŋ mụ bụ me eyi mi zhɛ ma zana miaụŋ ma aba mo o, maa e zeriji miauụ mụ bụ me eyi maa a na zhɛba tuwa ta anya edenji.
17Bɛ shɛ shɛ bu mama ndana itɛtɛnuwɛŋ ye elele o.#Ụban 20:4; Liv 19:4; Undwa 5:8; 27:15
18Untangana isene ibrɛd nɛ zasa Ifucingɛ, na amɛ ijitɛ icenje, ɛbi zhɛ ba ya ibrɛd ɛtɛ zasa Ifucingɛ, gana na ti Ngee bi peni-unu, na aka na ee shiri iwɛ ibɛ nu upiana Abib;#34:18 Abib: Zhaga kwụba ti'eshicigono tu 13:4. iwɛnɛ po nu upiana ata abu banɛ la ni Ijipti.#Ụban 12:14-20; Liv 23:6-8; Tɛrɛ 28:16-25
19Iyi elele nɛ bajɛ a'aŋbụ bino bi ibɛ i shɛ inee mi, keeni miaụŋ mi iyimabiga kpaaŋ, inɛ ye elele i shɛ ye eyi, ti yɛu umbe buna keeni ụgwụdụ.#Ụban 13:2 20Ama nụ ụgwụdụ ɛbi zhɛ ba sa yɛu umbe izhinyɛci, yaa shɛ kaa ya bụ kwụlanɛ shɛ maa so, asha bɛ shɛ ba kwụsa i'ilu ibwɛ. Bɛ shɛ ba sa miaụŋ mụ bụ me eyi mu umbe kpaaŋ. Kede bụtụ be elele zhajɛ na agba mi ni i'ɛlɛ yo hondo.#Ụban 13:2,11-16
21Ijitɛ icihiŋ abɛ shɛ ba nda ugondu, ama bɛ shɛ ba ta ụhinjanụ nụ ụjita ucenje; bɛ shɛ ba ta ụhinjanụ na aka tubwada keeni aka iyimɛyɛ tugwubo.#Ụban 20:9,10; 23:12; 31:15; 35:2; Liv 23:3; Undwa 5:13,14 22Bɛ shɛ bo shiyono isene ijitɛ icenje eshe, tụ ụjita tụ'walụ ti hiiŋ ti iyimɛyɛ wit tugwubo, ti isene iyimɛyɛ tijicinje nu ukwunanga uywa.#Liv 23:15-21,39-43; Tɛrɛ 28:26-31 23Kpalụ tatụ etwenyi bụ kpaaŋ shɛ a ulwa nu umbe mu nu uywa we elele, Gamba n shɛ AGWANGWAMA na shɛ Agwatana Isrɛl. 24N zhɛ ma bacɛnga anya edenji nu umbe bu, maa ma kaana tugwungwu tụ bụ ugombo. I zasa bụtụ be elele cɛnjɛ tụ bụ ti zhɛ ta kwulana maa 'yaga tụ na aba bụ, na aka na abụ zhajɛ maa mɛmɛ bɛcinjɛ nu umbe mu na shɛ AGWANGWAMA na shɛ Agwatana bụ karɛ tatụ nu uywa uywa ata o.#Ụban 12:10; 23:14-17; Liv 23:1-44; Undwa 16:1-17
25Bɛ shɛ shɛ bo hiŋtotongo mehieŋ mi iyi ụrụpɛ mu ni Ifucingɛ o. Kede iyi ụrụpɛ isene tɛkashɛka kaa vwɛ maa iyi heleni iŋ o.
26Bɛ shɛ be tecinje iyi tụ'walụ ti hiiŋ ta cɛnjɛ tụ bụ nu umwono mu, Gamba AGWANGWAMA na shɛ Agwatana bụ na. To shitogo yɛu biywoywo no mosubo me bino bwa o.#Ụban 23:19; Undwa 14:21; 26:2-11
27Nazhɛ AGWANGWAMA hiɛŋ Moses 'nyata n-ndumwa mu ga kpaaŋ; iwɛnɛ po unu na Ngaa twa na bụ keeni miaụŋ mi Isrɛl, ubwa 'yajɛ n-ndumwa mu ga hwɛɛ. 28Go Moses namɛ kaa apata na AGWANGWAMA iwɛŋnɛ buhanda keeni ijitɛ buhanda. Bɛ yɛ shɛ iyimɛyɛ, bu swe shi kaa meni o. Nazhɛ bee 'nyeci n-ndumwa mu unu ata tutwa na atayɛ ata tụpatakwụ patakwụ, ibɛ shɛ onu-tupana ata umpwa.
Go Moses Kezhe ni Ishɛmɛ Sainai Ụpɛshɛka Ubwa wa Ta
29Aka na tu go Moses kezhe ni Ishɛmɛ Sainai, baa 'waŋnɛ atayɛ ata tiseyida u tụpatakwụ patakwụ eyebi ni i'ɛle ibwɛ. Go Moses mepi shi kaa maa ụpɛshɛka ubwa wa ta ba, iwɛnɛ ti bɛɛ jimɛ n-ndumwa na Agwatana o. 30Aka na ti ga Aron keeni E'isrɛl kpaaŋ kwụbɛ tụ ụpɛshɛka Moses wa ta, ibɛ po inyɛsɛ shɛ aŋ maa o dongonu bu. 31Ama tuba go Moses suyanɛ aŋ; nazhɛ ga Aron keeni ehiu tu'ulwatagwụ ta ata kpaaŋ gwure pu bwa, go Moses jɛmɛ n-ndumwa na aba. 32Na aba ibɛ, nazhɛ E'isrɛl kpaaŋ dongonu bu, bee peni aŋ unu-tupana ata kpaaŋ, u gata AGWANGWAMA jimɛ nu bwa ni Ishɛmɛ Sainai. 33Aka na tu go Moses hwuweni aŋ n-ndumwa timbiso kpaaŋ, bee urigeni ụpɛshɛka ubwa owowo. 34Ama aka elele tu go Moses zhɛ bo tono pa AGWANGWAMA maa dumanga n-ndumwa nu bwa, bo ushigo owowo ata nụ ụpɛshɛka ubwa, uuwa i ci aka na tu baa banɛ. Aka baa banɛ hwayɛ, bo mbiso atwa Isrɛl iyi elele nɛ Agwatana panɛ bụ unu ibɛ. 35Aka E'isrɛl kwụbɛ ụpɛshɛka Moses, tu'waba tụ ụpɛshɛka ubwa ta ta; go Moses bo urugono ụpɛshɛka ubwa owowo sasana, uuwa i ci aka na ti bee teni na amɛ maa dumanga n-ndumwa na AGWANGWAMA.#2 Kor 3:7-16
Iliyochaguliwa sasa
ỤBANỤ 34: RBT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Rubassa Bible © Bible Society of Nigeria, 2008