Yọọn 7
7
Yisọs Akaa Usọrọ Tabanakịd
1Ke ami amaakeboiyo, Yisọs amaanam isañ akanna Kalili. Anye ikiyemme isaaña ke Yudia, sia mme adaidaha ke atu mme Yuu ekeyeeyem adiwot anye. 2Nte Usọrọ Tabanakịd mme Yuu akekpereke, 3nditọeka Yisọs ideen emaebo anye ate, “Kpọñ Kalili nyʌñ kaa Yudia, nọ mme mbed mfo e-ebaññake ke udo enyʌñ ekekịt mme utom a-afo anamma. 4Awo ndomokeed a-ayemme adido awuọiso awo inamma ñkpọ ke ndịbe. Sia afo anamma mme ñkpọ ami, akpena afo ayaara idem mfo anọ afịd ederimbod!” 5Sia idem nditọeka amọ ikinịmme anye ke akpanikọ.
6Yisọs amaabọọrọ ate, “Ini mmi idiwuọhọ diin, ado amaado ndufo, ini akeedodo ado eti ini inọ ndufo. 7Ederimbod ikemeke adisua ndufo, ado e-ensua miin, sia mmenọ ikọ ntiense mbo ke usʌñ ammọ inenne. 8Ndufo iboiyo ikaa usọrọ ke idem ndufo. Ami ndiikaaha usọrọ, sia ini mmi ikemme diin ayọhọ-ayọhọ.” 9Ke anye amaaketañ ami ama, anye amaatịmme atie ke Kalili.
10Ado ke nditọeka amọ ideen emaekedaaña usọrọ, anye ñko amaadidedịbe akaa, iyakka awo adiọọñọ. 11Ke itie usọrọ ado mme adaidaha ke atu mme Yuu emaeyem anye, enyʌñ ebịp ete, “Anye awo ado-o?”
12Emaetañ uwak ikọ ebaña anye eti-eti ke atu awo. Ubaak awo emaebo, “Anye ado eti awo.”
Ubaak emaebo, “Iyoo, anye ababiaña mme awo.” 13Ado awo ndomokeed ikitañña ikọ ibaña anye anwa-anwa, mbaak mme ikpọawo mme Yuu.
Yisọs Akpeep Ñkpọ ke Itie Usọrọ
14Akedo enanam usọrọ esịm mbakka iba ke Yisọs akewuọ aka aketọọñọ adikpeep ñkpọ ke afe tembịd. 15Idem amaakpa mme Yuu, anam ammọ emaebịp ete, “Awo ami akenam die anie utọ ifiọk ami ke ini anye imiikibọọhọ ukpeebñkpọ?”
16Yisọs amaabọọrọ ammọ ate: “Ukpeebñkpọ mmi intooho miin. Ato anye a-akendọññọ. 17Awo akeedodo a-abeeñeke idem adinam uduak Abasi ayaadiọọñọ me ukpeebñkpọ mmi ato Abasi, me ami ntañ ikọ idem mmi. 18Awo amaatañ ikọ idem amọ, ayem ukpono anọ idem amọ, ado anye a-ayemme ukpono anọ awo a-akedọññọ anye, anye ado awo akpanikọ; inyʌññọ inie abiaña ndomokeed. 19Nte Moses ikinọọhọ ndufo mbed? Ado ndufo ndomokeed inịmme mbed ado! Ntak a-ndufo eyemme usʌñ adiñwot miin-e?”
20Atu awo emaebọọrọ, “Afo amenie dimọn ke idem! Anie awo iyem aduwot fiin?”
21Yisọs amaabo ammọ ate, “Utịppeñkpọ keed ke ami ñkenam ndin afịd ndufo eba ke ñkpaidem. 22Ado sia Moses amaakenyịmme ufọọrọ edʌd inọ ndufo (akpesʌkado idooho nte ke ufọọrọ edʌd aketo Moses, ado aketo mme nsọbom), ndufo efọọrọ ayịn edʌd ke Sabad. 23Adieke ekemeke adifọọrọ ayịn awodeen edʌd ke Sabad mbaak awo adibiat mbed Moses, ntak a-ndufo eyatta esịd ye ami naña nnam nọ idem asọñ awo ke Sabad-a? 24Ndufo ikiibiere ikpe ikeene se ekịt ke anyen, ado ikpe nnen-nnen ikpe.”
Ubakka ke Atu mme Awo ke Ntak Yisọs
25Ke ini ado, usʌk mbon Yeruselem emaebịp ebo, “Idooho awo ammọ e-eyemme adiwot ado ami? 26Ñkọ anye ado ami, asʌk atañ ikọ anwa-anwa, ndin awo inieghe kpak se etañ me enam anye! Nte ado akpanikọ ke ukara ebiere ebo ke anye ado Krais? 27Ado afịd ñnyịn imidiọọñọ nte anye ato, ado Krais amaadi, awo ndomokeed idiidiọọñọke nte anye ato.”
28Ndin ke ini Yisọs akesʌkkọ akpeep ñkpọ ke afe tembịd, anye amaabọñ ke akpọsọñ uyio ate: “Ii, emendiọọñọ miin, emenyʌñ ediọọñọ nte nto, ado ami mbaaha mi ke adudu idem mmi; anye a-akendọññọ miin ado akpanikọ. Ndufo idiọọñọke anye, 29ado ami mmediọọñọ anye sia nto ke anye ndi, ñko anye akendọñ miin.”
30Ammọ emaeyem adimʌm anye idahado, ado sia ini amọ imiikikemme, awo ndomokeed ikituuhọ anye. 31Kpayeado, uwak mme awo e-ekebaaha emaenịm anye ke akpanikọ. Ammọ emaebo ete, “Krais amaadi, anye ayaanam idiọọñọ awak akan se awo ami anam?”
32Ke ini mme Farisi emaekekop ke mme atu awo ekesʌk esuan utọ ikọ ami ebaña anye, mme ñkpoon aku ye mme Farisi emaedọñ mme akpeme tembịd ete ekemʌm anye.
33Ndin Yisọs amaabo: “Ami ndiiba ye ndufo ke etək-etək ini, ndin ñyaatịmme mbịne anye a-akendọññọ miin. 34Ndufo eyaeñyem miin ado idiiñkịtte; ndin itie nte ami mba, ndufo idiikanna idi.”
35Anam mme Yuu emaebịp idem ammọ ete, “Ete ami aduak adika uke nọ ñnyịn imiidikanna ikịt anye? Me anye aduak ika mbịne mbon ñnyịn e-emaekesuana ekedʌñ ke atu mbon Greek inyʌñ ikpeep mbon Greek ñkpọ? 36Nsoo ke awuọñọ ke anye adibo, ‘Ndufo eyaeñyem miin ado ndufo idiiñkịtte miin,’ ye ‘Itie nte ami mba ndufo idiikanna idi’?”
37Ke akpatre ñkpon ñkan usen usọrọ, Yisọs amaawuọ ada anyʌñ atañ ke akpọsọñ uyio ate: “Adieke itọñ asatta awo, yak anye adi ambịne miin adinwọñ mmọọñ! 38Awo akeedodo annịmme miin ke akpanikọ, nte ikọ Ñwed Abasi amaatatañ, idịm mmọọñ uwem ayaasakka ato idem amọ.” 39Anye aketañ ami abaña Sịbidịd a-mbon e-ekenịmme anye ke akpanikọ ekenaaha nte ebọ. Sia tutu akewuọ idahado awo ikinọọhọ awo ndomokeed Sịbidịd diin, ke ntak a-Yisọs imiikidʌkkọ ubọọñ amọ diin.
40Usʌk mbon e-ekekpañña utọñ ekop se anye aketañ emaebo, “Ke akpanikọ awo ami ado Prọfed.”
41Ado usʌk awo emaebo, “Anye ado Krais.”
Kpayeado ubaak awo emaebịp, “Krais akpenam die ato Kalili? 42Nte Ñwed Abasi ibooho ke Krais adiito ubon Defid anyʌñ ato abio Betlehem, idʌñ a-Defid akedʌññọ?” 43Ke ntoro, mme awo emaebakka edudak ke ntak amọ. 44Usʌk awo emaeyem adimʌm anye, ado awo ndomokeed ikituuhọ anye.
Unana Mbuọdidem mme Adadusʌñ mme Yuu
45Ke akpatre mme akpeme tembịd emaetịmme ebịne mme ñkpoon aku ye mme Farisi e-ekebịppe ammọ ebo, “Ntak a-ndufo imiikimʌmmọ anye idi-e?”
46Mme akpeme tembịd emaebọọrọ ete, “Akenaanam awo ndomokeed itañña ikọ ke utọ usʌñ e-ete ami atañña.”
47Mme Farisi emaebọọrọ ete, “Awuọ anye anyʌñ itịn ndufo usʌñ ñko? 48Aba awo ke atu ukara mme Farisi a-anịmme anye ke akpanikọ? 49Iyoo! Sʌk ntʌn atu awo ami imiidiọọñọke ñkpọ ndomokeed ibaña mbed, adooho isuuñọ asịm ammọ.”
50Nikodemọs, a-amaakedaadak aka abịne Yisọs, a-akenyʌññọ ado keed ke atu ammọ amaabịp ammọ ate, 51“Nte mbed ñnyịn a-abiomo awo ikpe ke ini imiibemme iso ikpañ utọñ inọ awo ado, inyʌñ idiọọñọ se anye anam?”
52Ammọ emaebọọrọ ete, “Afo ñko ado awo Kalili? Duuñọ ñkpọ ami ke idem mfo se ndin afo ayaakịt ke prọfed isitooho Kalili.”#7:52 Mme uwak ñwed emaekememịñ ye mme ntiense esed inieghe mme ufañ usʌkkeed tutu asịm edịb Yọọn 7:53–8:11.
53Akem afịd ammọ emaedaaña enyọñọ.
Iliyochaguliwa sasa
Yọọn 7: ICB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
