Yọọn 11
11
Ñkpa Lasọrọs
1Ete keed a-akekereke Lasọrọs amaadọñọ. Anye aketo Betani, idʌñ a-Mmeri ye ayịneka amọ Mmata eketooho. 2(Mmeri ami, a-ayịneka amọ Lasọrọs akedọñọke ado ukem awonwaan a-akefiọññọke Yisọs inem ufịk pefium anyʌñ adat ided amọ akwokko ñkpad amọ.) 3Nditọeka ibaan Lasọrọs emaedọñ utom enọ Yisọs ete, “Abọọñ, awo a-afo amaaha adọdọñọ.”
4Ke ini Yisọs akekoppo anye amaabo, “Udọñọ ami idiikiwuọhọ ke ñkpa. Ado nọ Abasi abọ ubọọñ, Ayịn Abasi ñko abọ ubọọñ ato do.” 5Yisọs amaama Mmata ye nditọeka amọ, Mmeri ye Lasọrọs. 6Ke anye amaakekop ke idem isọññọ Lasọrọs, anye amaasuuk aba ke itie a-anye akebaaha usen iba mfen 7mbemiso anye abo mme mbed, “Yak ñnyịn itịmme ika Yudia.”
8Mme mbed emaebo anye, “Andikpeeb, ke etək-etək ini a-akeboiyoke ko, mme Yuu emaenwana adutọọñ fiin ke itiad, ndin afo ayem itịmme ñka do?”
9Yisọs amaabọọrọ, “Nte idooho awa duob mme iba eba ke uweemeayio? Awo a-asañake ke uweemeayio idiikọbọke iduọ, sia unwana ederimbod ami anam anye akịt usʌñ. 10Ado anye amaasaña ke akonayio akeme adikọbọ nduọ sia unwana ibaaha.”
11Anye amaaketañ ami ama, amaatịmme abo ammọ, “Ufan ñnyịn Lasọrọs adadaiya, ado ami ñyaaka do ñketọi anye.”
12Mme mbed emaebọọrọ anye ate, “Abọọñ akpedo anye adadaiya, idem ayaasọñ anye.” 13Yisọs aketañ abaña ñkpa Lasọrọs, ado mme mbed ekekere ke anye aketañ abaña ñkaña adidaiya idab.
14Ado amaanam Yisọs atañ anọ ammọ inwañ-inwañ ate, “Lasọrọs a-akpa; 15ndin ke ntak ndufo, esịd annem miin ke ñkibaaha do, nọ ndufo enịm ke akpanikọ. Ado yak ñnyịn ika ibịne anye.”
16Ndin Tọmọs, (e-ekenyʌññọ esikoot Didimọs) amaabo mme mbed mbon ñko ate, “Yak ñnyịn ñko ikeene, nọ ikikpa ye anye.”
Yisọs Adọñ Nditọeka Ibaan Lasọrọs Esịd
17Yisọs amaakediwuọ, anye amaakịt ke Lasọrọs amaasesịne ke udi usen inaañ. 18Tọọñọ ke Betani kaa Yeruselem ikiyọhọke itiad iba#11:18 Ñkpọ nte kilomita 3, 19ñko uwak mme Yuu emaekaa adikidọñ Mmata ye Mmeri esịd ke ntak ñkpa ayịneka ammọ. 20Ke ini Mmata akekoppo ke Yisọs asʌk adi, anye amaawuọ akesoobo Yisọs, ado Mmeri amaasuuk aba ke ufọk.
21Mmata amaabo Yisọs, “Abọọñ, akpedo afo amaaba mi ayịneka mmi ikpikikpaaha. 22Ado ami mmediọọñọ mbo ñkọm idahami ke Abasi ayaunọ fiin se afo akpebebịp.”
23Yisọs amaabo anye, “Ayịneka mfo ayaamaana aset.”
24Mmata amaabọọrọ, “Ami mmediọọñọ ke anye ayaaset ke ini adised ke ñkpa ke akpatre usen.”
25Yisọs amaabo anye, “Ami ndo adised ke ñkpa ye uwem. Awo annịmme miin ke akpanikọ ayaadu uwem akpesʌkado a-anye akpaaha; 26ñko awo akeedodo aduuho uwem anyʌñ annịm miin ke akpanikọ idiikpaaha ke nsi-nsi. Nte afo amenịm ami?”
27Anye amaabo Yisọs, “Ii Abọọñ, mmenịm mbo ke afo ado Krais Ayịn Abasi a-anaaha adi ke ederimbod.”
28Ke Mmata amaaketañ ami ama, anye amaadakka akekoot Mmeri ayịneka amọ asịkke ada. Ndin Mmata amaabo Mmeri, “Andikpeeb mmọ mi, asʌk abịp ubaña fiin.” 29Ke ini Mmeri akekoppo ami, anye amaasọsọp adakka akesoobo anye. 30Yisọs akesʌk aba ke itie a-Mmata akesooboke anye, ikidiwuọhọ Betani diin. 31Ke ini mme Yuu e-ekebaaha ke ufọk ye Mmeri edọñ anye esịd ekekịtte naña anye asọsọp adakka awuọ esiin, ammọ emaekeene anye sia ammọ ekekere ke anye aka itie udi adikitua ayịd.
32Ke Mmeri amaakewuọ itie a-Yisọs akebaaha akịt anye, anye amaaduọ ke ukod amọ abo, “Abọọñ, akpedo afo amaaba mi, ayịneka mmi ikpikikpaaha.”
33Ke ini Yisọs akekịtte ke anye ye mme Yuu e-ekesañake ye anye esʌk etua, amaanekke afịna Yisọs ke sịbidịd. 34Anye amaabịp, “Ndufo enịm anye ke mmọọ?”
Ammọ emaebọọrọ, “Abọọñ, di dise.”
35Yisọs amaatua.
36Ado amaanam mme Yuu ebo, “Se naña anye akema anye!”
37Ado usʌk ammọ emaebo, “Nte anye a-akenamma nọ nnan akịt usʌñ ikpikinamma nọ ete ami akuukpa.”
Yisọs Anam Lasọrọs Aset ke Ñkpa
38Esịd amaamaana abʌññọ Yisọs ke anye amaakediwuọ itie udi. Udi akedo abaitiad e-emaekeben itiad ekwe ke inua. 39Yisọs amaabo ammọ, “Iwere itiad ami isio.”
Mmata, ayịneka akpañkpa amaabo, “Abọọñ, akpo amọ atọọñọ aditebe idahami, sia anye ana do usen inaañ.”
40Yisọs amaabo ate, “Ado nte ami ñkitañña inọ ndufo mbo ke ekpenịm ke akpanikọ ndufo eyaekịt ubọọñ Abasi?”
41Ammọ emaewere itiad esio ndin Yisọs amaadịppe anyen ke anyọñ abo ate, “Ete, ami mmukọọm fiin sia afo amekop uyio mmi. 42Ami mmaadiọọñọ ke afo amesikop uyio mmi afịd ini, ado ami ñketañ ami ke ufọn mbon e-ebaññake mi, nọ ammọ enịm ke afo akendọñ miin.”
43Ke Yisọs amaaketañ ami ama, anye amaakoot ke akpọsọñ uyio ate, “Lasọrọs, wuọ di.” 44Akpañkpa amaawuọ adi ye naña ekenyʌñ ewañ anye mbai linen, ye afọñ ke ubọk ye ukod ye iso.
Yisọs amaabo ammọ, “Ikpọk anye afọñ udi, inyʌñ iyaak anye aka.”
Edioomo Adiwot Yisọs
45Uwak mme Yuu e-ekediighe edise Mmeri, ekenyʌññọ ekịt se Yisọs akenam, emaenịm anye ke akpanikọ. 46Ado usʌk ammọ emaekebʌk enọ mme Farisi se Yisọs akenam. 47Ndin mme ñkpoon aku ye mme Farisi emaekoot mbono esob Sanhidrin.
Ammọ emaebịp ebo “Nsoo ke ñnyịn idiinam? Se naña awo ami aka iso anam mme idiọọñọ. 48Ñnyịn ikpiyak anye aka iso ntom, afịd awo eyaenịm anye ke akpanikọ ndin mbon Rom eyaedibọ ñnyịn tembịd ye idịd ñnyịn.”
49Awo keed ke atu ammọ a-akekereke Kaifas, a-akedooho ekamba aku isua ado amaabo, “Ndufo idiọọñọke ñkpọ ndomokeed. 50Ndufo ikịtte ke a-afọn awo keed adikpa nnọọ afịd awo ñkan afịd idịd aditak.”
51Anye ikitañña ami nte ikọ idem amọ, ado nte ekamba aku ke isua ado anye amaatañ prọfesi abo ke Yisọs ayaakpa ke iwuod afịd abio mme Yuu, 52inyʌññọ ido idịd ado ikpọọñ, ado ayaakpa anọ nditọ Abasi e-ekesuanake eyọhọ afịd itie, adibok ammọ nọ ammọ ekappa edo keed. 53Ndin tọọñọ ke usen ado ammọ emaedʌk edioomo naña ekpedat uwem Yisọs.
54Ado amaanam Yisọs ikisiwuọñọke aba isaaña anwa-anwa ke ufọọd mbon Yudia. Anye amaakeba ye mme mbed amọ ke esịd idʌñ a-akereke Ifrem, a-akpereke anaan.
55Ke amaakekpere ini usọrọ mme Yuu e-ekoodo Usọrọ Nsaña Mboiyo, uwak awo emaeto esịdidʌñ ekaa Yeruselem adinam idem ammọ asana ke mbeeñe idem Usọrọ Nsaña Mboiyo. 56Ammọ emaekaa iso eyem Yisọs, ndin naña ammọ ekedaaha ke mme afe tembịd ammọ emaebịp emọ-emọ ete, “Nsoo ke afo akere? Ado nte anye idiidiighe usọrọ ami?” 57Ado mme ñkpoon aku ye mme Farisi emaenọ ewʌhọ ete emaekịt nte Yisọs aba yak edidọkkọ mmimọ nọ ammọ ekemʌm anye.
Iliyochaguliwa sasa
Yọọn 11: ICB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
