Yenesis 44
44
Kọọb Silfa ke Ekpad
1Akema Yosef amaanọ akamaufọk amọ uyio ate: “Dọñ uwak ñkpọ ndidia ke ekpad ideen ado nọ ado se ammọ ekan ebiom, nyʌñ sịn akʌk ke inua ekpad awo keedekeed. 2Ndin sịn kọọb silfa mmi ke inua ekpad akpeedem, dian ye akʌk abakpa amọ.” Anye amaanyʌñ anam se Yosef akebo.
3Ke ayio amaakesiere, ammọ emaedakka edʌk usʌñ unyọñọ ye mme dọñki ammọ. 4Ammọ ikikaaha anyan ikpọñ abio ke Yosef akebooho akamaufọk amọ. “Bịne ammọ ini keed, ndin umaukusịme ammọ, bo ntom, ‘Nsoo inam ndufo eben idiọọk esio usiene eti? 5Nte idooho kọọb ami ke eteufọk mmi asikama anwọñ mmọọñ anyʌñ akama abre idiọñ? Se ndufo enam ado ataa ibak.’ ”
6Ke anye amaakesịme ammọ, anye amaatañ afịd ikọ ami ye ammọ. 7Ado ammọ emaebo anye, “Ntak a-abọọñ ñnyịn atañña mme utọ ñkpọ ami-e? Nsaa ñnyịn-o, nditọufọk mfo edinam ñkpọ a-abaaha ntoro! 8Ñnyịn imaiben akʌk a-ñnyịn ikikịtte ke mme inua ekpad ñnyịn ito ke isọñ Kenan idat usọk fiin. Ndin nsoo ido ntak yak ñnyịn ikpiyịp silfa me kold ke ufọk eteufọk mfo? 9Adieke ekịtte awo keed ke atu nditọufọk mfo nte akama kọọb ado, anye adot ñkpa; ndin ñnyịn se isʌhọ iyaido ifʌn inọ abọọñ mmi.”
10Anye amaabo, “A-anekke afọn, ndin, yak asu naña ndufo etañ. Awo e-ekịtte anye ye kọọb ado ayaakappa ado afʌn mmi; ndufo mbon ako eyaebọkkọ.”
11Ndin ammọ keedekeed emaesọsọp esuuk ekpad ke isọñ enyʌñ etat inua ekpad. 12Akema akamaufọk amaakaa iso adiyem, atọọñọke ke ekamba awo tutu akesịm akpeedem. Ndin emaekekịt kọọb ado ke ekpad Benyamin. 13Ke ntak ami, ammọ emaewai afọñidem ammọ enyʌñ edoot mbiomo ammọ ke mme dọñki ammọ etịmme ekaa abio.
14Yosef akesʌk aba ke ufọk ke ini Yuda ye nditọete amọ ekedʌkkọ edi, ndin ammọ emaeduọññọ ke isọñ ke iso amọ. 15Yosef amaabịp ammọ ate, “Nsoo ke ndufo enam ami? Nte ndufo idiọọñọke ke ami mmekeme adiyaara ñkpọ ñkịt ke ubre idiọñ?”
16Yuda amaabọọrọ. “Nsoo ke ñnyịn idiikan itañ inọ abọọñ mmi? Nsoo ke ñnyịn idiikan itañ? Idiinam die iwọt ke ñnyịn idueghe? Abasi amaayaara ndudue nditọufọk mfo. Idahami ñnyịn ido ifʌn abọọñ mmi, ñnyịn ke idem ñnyịn ye anye e-ekekịtte ye kọọb ado.”
17Ado Yosef amaabo, “Nsaa mmi-o adinam utọ ñkpọ ado! Awo e-ekekịtte ye kọọb ado ikpọọñ adiido afʌn mmi. Ndufo mbon ako, inyọñọ ibịne ete ndufo ke emem.”
18Akema Yuda amaadakka abịne anye akebo, “Dakka nọ ayịnufọk mfo, abọọñ mmi, yak ami ntañ ikọ nnọ abọọñ mmi. Kuuyat esịd ye ayịnufọk mfo, akpesʌkado a-afo adooho ukem ye Fero ke idem amọ. 19Abọọñ mmi amaabịp nditọufọk amọ abo, ‘Nte ndufo emenie ete me ayịneka mfen?’ 20Ndin ñnyịn imaibọọrọ ite, ‘Ñnyịn iminie ete a-amaasọñ, ndin etəkayịn mmọdo e-ekemanna enọ anye ke usọñ amọ. Ayịneka amọ amaakpa, ndin anye ado ukweeñe ayịn ke idịb eka amọ a-asʌhọke, ete amọ anyʌñ ama anye.’
21“Ndin afo amaabo nditọufọk mfo, ‘Iben anye idat insọk miin nọ ami ñkịt anye ke idem mmi.’ 22Ndin ñnyịn imaibo abọọñ mmi ite, ‘Ayịn ado idiikanna ikpọñ ete amọ; adieke akpọññọ anye, ete amọ ayaakpa.’ 23Ado afo amaabo nditọufọk mfo, ‘Ibọhọke akpatre ayịnete ndufo ikeene ndufo adi, ndufo idiikịtte iso mmi aba.’ 24Ke ini ñnyịn ikitịmmeke inyọñ ikikịt ayịnufọk mfo ete ñnyịn, ñnyịn imaidọkkọ anye se abọọñ mmi aketañ.
25“Ndin ete ñnyịn amaabo, ‘Ndufo itịmme ikaa ikidep etək ndidia mfen.’ 26Ado ñnyịn imaibo anye, ‘Ñnyịn idiikanna ika. Ukweeñe ñkpọ ado adieke akpatre ayịnete ñnyịn akaaha ye ñnyịn ke ñnyịn idiika. Ñnyịn ibooho ikịt awo ado iso ibọhọke akpatre ayịnete ñnyịn akaa ye ñnyịn.’
27“Ayịnufọk mfo ete ñnyịn amaibo ñnyịn, ‘Ndufo emediọọñọ ke anwaan mmi akeman nditọ ideen iba annọ. 28Keed ke atu ammọ amaawuọ añkpọñ miin, ndin ami mmaabo, “Ana ado ekewaawai anye mbai-mbai.” Ndin ami ñnyʌññọ ñkịt anye tọọñọ ado. 29Adieke ebenne anye ami ñko eñkpọñ miin, ndin unọmọ akesịm anye, ndufo eyaenam iwuod iwad mmi asọiyọ adʌk udi ke ukuud.’
30“Ndin idahami, adieke ayịn ami imiisañake ye ñnyịn ke ini ami ñnyọññọ mbịne ayịnufọk mfo ete mmi, ndin adieke ete mmi, a-adooho uwem amọ adiana keed ye uwem ayịn ami, 31akịtte ke ayịn ado ibaaha aba, anye ayaakpa. Nditọufọk mfo eyaenam iwuod iwad ete ammọ asọiyọ adʌk udi ke mfʌhọ. 32Ayịnufọk mfo aketie ubiọñ abaña uwem ayịn ado anọ ete mmi. Ami mmaabo, ‘adieke ami mmiibenne anye ntịmme usọk fiin, ami ñyaanie ubiomikpe ke iso mfo, nte ete mmi, ke afịd ayio uwem mmi!’
33“Ndin idahami, mbọk yak ayịnufọk mfo akappa aba mi nte afʌn abọọñ mmi ke itie ayịn ami, nyʌñ yak ayịn ami atịmme anyọñ ye nditọete amọ. 34Ami ndiinam die ntịmme mbịne ete mmi adieke ayịn ami imiibaaha ye ami? Iyoo! Kuuyak ami ñkịt ukuud adiidi ibịne ete mmi.”
Iliyochaguliwa sasa
Yenesis 44: ICB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.