Utom Mme Abọsịd 3

Pita Akọk Mbʌñọ Abeeñe Ebeeñe

1Usen keed Pita ye Yọọn emaekaa tembịd ke ini ubọñ akam, ke ñkanika ita uweemeayio. 2Nte ammọ ekekpereke tembịd, ammọ emaekịt awo a-akemanake mbʌñọ naña eben eka inuaatob tembịd e-ekekoodo Uyaiya Inuaatob, nọ anye atie do abeeñe mme awo se ikikaa tembịd ñkpọ. 3Ke ini anye akekịtte naña Pita ye Yọọn eka tembịd, anye amaabeeñe ammọ akʌk. 4Pita ye Yọọn emaewuuk anyen ese anye, ndin Pita amaabo anye, “Nekke ise ñnyịn.” 5Ndin awo mbʌñọ ado amaanekke ase ammọ, abeeñe idem adibọ ñkpọ nto ammọ.

6Akem Pita amaabo anye, “Ami nnieghe silfa me kold, ado se nnie ke ami unọọ. Ke anyịñ Yisọs Krais awo Nasared, dakka da saña.” 7Ndin Pita amaanyan ubọk nnasia abenne anye ke anyọñ, ndin kpa ataa idahado, ñkpad ye itọñ ukod ammọ emaesọọñ. 8Anye amaatamma ada ke ukod atọọñọ adisaña. Ndin anye amaakeene ammọ adʌk mme afe tembịd, asaaña, ataam anyʌñ atooro Abasi. 9Idem amaanekke akpa mme awo ke ini ammọ ekekịtte naña anye asaña anyʌñ atooro Abasi. 10Ammọ emaetoiyo ke anye ado awo a-akesitieghe ke inuaatob tembịd e-ekoodo Uyaiya Inuaatob, ndin idem amaakpa ammọ abaña se ikitịppe inọ anye.

Pita Atañ Ikọ Anọ mme Atu Awo

11Ke ini awo ado akesʌkkọ amʌm Pita ye Yọọn akama, afịd awo emaefeeñe ekaa Mben Esa Sọlọmọn ke akpọsọñ ñkpaidem. 12Pita akekịt ami, anye amaabo ammọ: “Nditọ Isrel ñnyịn, ntak a-ñkpọ ami ikpaaha ndufo idem-e? Ntak a-ndufo iseeghe ñnyịn nte ebo ke ato ke adudu me eti uwem ñnyịn anam awodeen ami asaña-a?” 13Abasi mme eteete ñnyịn, Ebraham, Aisik, ye Yekọb a-anọ isʌñutom amọ Yisọs ubọọñ. Ndufo emaeyaak anye enọ ete ewot, emaekañ anye ke iso Pailed, akpesʌkado a-Pailed akeyemme adisaana anye ñyaak. 14Ndufo emaesịn Eti ye Adisana Awo, etịmme ebo esaana awodawo eyaak. 15Ndufo emaewot andinọ uwem, ado Abasi amaanam anye aset ke ñkpa. Ñnyịn ido ntiense ibaña ñkpọ ami. 16Awo a-ndufo ekịtte enyʌñ ediọọñọ mi, akop nsọñidem ato mbuọdidem ke anyịñ Yisọs. Mbuọdidem ke anyịñ Yisọs anọ anye nsọñidem, nte afịd ndufo ekịtte.

17“Nditọ Isrel ñnyịn, idahami ami mmediọọñọ ke ndufo ekenam ñkpọ ami ke unana adidiọọñọ ukem naña mbọọñ i-ikarake ndufo ekenam. 18Usʌñ naña Abasi akenam se anye aketañ ato inua afịd mme prọfed asu, abo ke Krais ayaabọ ufen, ado ami. 19Ikappa esịd inyʌñ itịmme ikeene Abasi, nọ ato do efeen mme ndiọiñkpọ ndufo, nọ ini adidemme a-atooho Abọọñ isịm ndufo, 20ñko nọ anye anọ Krais e-ekemekke enịm inọọ ndufo, a-adooho Yisọs. 21Anye ayaaba ke hefịn tutu ini akem a-Abasi adiinọ afịd se anye akenwọñọ ke usen edem ato ke mme ndisana prọfed amọ. 22Sia Moses amaabo, ‘Abọọñ Abasi ndufo ayaasio prọfed a-abaaha nte ami ke atu ndufo. Ana ndufo ekpañ utọñ ekop afịd se anye atañ inọ ndufo. 23Ndin awo imiikpañña utọñ inọ prọfed, eyaebịne anye esio afịd-afịd ke atu mbon ammọ.’

24“Ke akpanikọ, afịd mme prọfed, tọọñọ ke Samwel, e-emaeketatañ ikọ ebaña, emaebak etañ ebaña mme usen ami. 25Ndufo edo mme adiaakpa mme prọfed ado, emenyʌñ esịne ke enwọñọ a-Abasi akenamma ye mme eteete ndufo, a-akebooho Ebraham, ‘Adiito ke ubon mfo afịd awo ke ederimbod ebọ adidiọñ.’ 26Ke Abasi amaakenam isʌñutom amọ Yisọs aset ke ñkpa, anye aketo anọ anye adidiọñ ndufo, ke adinam ndufo ekappa ekpọñ mme ibak usʌñ ndufo.”

Iliyochaguliwa sasa

Utom Mme Abọsịd 3: ICB

Kuonyesha

Shirikisha

Nakili