BaRoma 15
15
Tɛrɛk yin bafidang iyɛ, da ice yin awo
1Iyit fi in se yit gbagba ni inɔɔk atsak, i se gyat ni in sok yit kunanang bayɔng fɛ́ ba se buk-buk ni inɔɔk atsak, in bi sot yit bafi ishim ice yit awo. 2Won kaangan ayɛt yit na a nye ikyɛng itɛrɛk iyɛ sak na afidang, na ban ku nok mo, inɔɔk atsak wu. 3Nek Anet-Isheshek ice wu, da a kin sot nek ice wu awo, awɛt tɛ ba kin di jɛk ye, “Itok bayɔng fɛ́ ba kin da tosong ingɔn, i mi bun naton hom.” 4Nek ngma nkyɔrɔk yɔng fɛ́ ba man jɛk neme, ba kin jɛk ina nek ba ki tees yit mo, nɔng in di bin sot yit na anyɛk ni isot gbagba fi i ki nesek yit ite iyɛ.
5Won Adakunom fɛ́ a nesek anyɛk ni isot gbagba, na a ki nɔɔk yin kabik imoon ice ni irèn yɔng fɛ́ Anet-Isheshek aYeso ki tees yit mo. 6Nɔng i di ki nɔɔk yin Adakunom, Ada aTisa yit aYeso Kristi ízɔk wu, ni iyɛ izining, na kanu kazining.
7Shashang yin bafidang ni mbɔk nfifaa, kyɔn tɛ fɛ́ Anet-Isheshek ki shan yin mo, nɔng ba bin di tere Adakunom. 8Nek in shim in ki tak yin fok, aKristi sot anɛk baYahuda nɔng ba di ki tonong atsak ifɛ̀ Adakunom, nɔng ba di ki tonong ishining kushi fɛ́ ba man nye badakop bá ne, 9nɔng Ícɛn-iduk di ki tere Adakunom nek angmishish wu. I se ni ijɛk fok,
“Nek anɔng, imi bi da tere
nate Ícɛn-iduk;
In bi ra abom itere iyerek ngɔn.”
10Ba tɛ ba fɛ̀ ye,
“Iyin, Ícɛn-iduk, nye yin ifeng
na banet Adakunom.”
11Ba tɛ ba fɛ̀ ye,
“Ngma Ícɛn-iduk,
tere yin aTisa,
won banet ngma kusum,
ba ku tere.”
12AIshaya kin fɛ̀ bà ye,
“Akak bi wuruk ni izɔrɔk aJesi,
ayɔng fɛ́ a bi dorok
nek iya igwɔm Icɛ́n
ngma kusum;
Ícɛn-iduk bi di te iyɛ ni wu.”
13Won Adakunom fɛ́ a nesek ites iyɛ, na a shining ayɛ yin ni ifeng ni kusonong kukyang ni inɔɔk atsak fi i bɛ̀ yin ni wu, nɔng kukyem Kabik aJɛrɛ bin ki shining yin ni ite iyɛ.
ABulus anet itomong Anet-Isheshek sak ni Ícɛn-iduk
14Ábaruneng, imi ice min, in rēn tsɛngtsɛng fok, iyin bɛ̀ yin nggɔn ntek, i bɛ̀ yin irēn makiyi fi i kyem ni i di tees yin bafidang. 15Awɛt imi mi wuruk wɛshɛk in ki jɛk yin nkyɔrɔk nkak, nɔng in ki yiring yin ne, nek itek fi in mi sɛ na Adakunom, 16nɔng ni in di sot anet itomong Anet-Isheshek aYeso sak ni Ícɛn-iduk. Ni in ra kutomong iware kufi ishara ifɛ̀ itek Adakunom, nɔng Ícɛn-iduk bi sot kunang inabak fɛ́ Adakunom shim, bayɔng fɛ́ Kabik aJɛrɛ mi kusu cɛ́l.
17Nek anɔng, in nye kukaa na Anet-Isheshek aYeso ayɛt kutomong fi in tsin ra Adakunom e. 18Nek anɔng, in da shim in cɛɛt naton ikyi ikak awo, tit kutomong fɛ́ Anet-Isheshek mi ra ni bɔk hom. In mi kɔk Ícɛn-iduk kutaa, sak ni ifok ifɛ̀ Adakunom, ayɛt ikyɛng fi in fɛ̀ ni idɔng fi in nye, 19ni irèn nkyɔrɔk ajingjing, ni kutomong ibes fɛ́ kukyem Kabik nye. In tumung e nkum aRushelima in tsin in gorok sak ni mben aIlirikum, in shara ifɛ̀ itek Anet-Isheshek kaakye. 20Ikyɛng fi in mi sok ni iyɛ hom yet fok, in da shara ifɛ̀ itek Anet-Isheshek na narɔ fɛ́ da ba mi ku rēn awo, kɔng in bi tsin in nok narɔ fɛ́ akak mi di ta itis. 21Ke ane, tɛ ba kin di jɛk ye,
“Bayɔng fɛ́ ba man ka ba tak
ikyikak naton wu awo,
ba bi di;
na bayɔng fɛ́ ba man fok awo,
ba bi ku rēn.”
ABulus se ni kuyiring i tse itsen na aRoma
22Nkyɔrɔk fi in di ro ibɛ́ ni yin yɔng. 23Awɛt yɔkɔnɔng fi kutomong hom mi gang abak ka kang, ayet fok in mi sok ayɛ dot in shim in bi in ki di yin, 24in shim in bi got azɔng ni yin, ni irèn hom sak i tse na aSpaniya. In bi te iyɛ in bi got azɔng ni yin, ama fi in ra fɔn ni iyin nfi kizen gyeet, ni sɛ ni di tsa yin ni igbingding kutseet hom sak azɔng.
25Yɔkɔnɔng ana, in se ni irèn sak na aRushelima, in tsin nɔɔk bafi ikuus fɛ́ ba se azɔng ikyɛng fɛ́ ba tusung. 26Nek bafi ikuus fɛ́ ba se na aMasedoniya nɛ bafɛ́ Akaya ba bi iyɛ ikan ayɛt itusung nkyɔrɔk nek igbingding bakan ayɛt bafi ikuus fɛ́ ba se na aRushelima. 27Ba bi iyɛ ikan ni inye anɔng, na atsak e, i se kpaf na ba nye anɔng e. Nek ki Ícɛn-iduk man sɛ kanu kafuba ayɛt nkyɔrɔk kabik fi in yet nfɛ́ baYahuda, i se gyat iba na ba kaba ngma nkyɔrɔk fɛ́ ba bɛ̀ gung na baYahuda. 28Nek anɔng, ama fi in gang kutomong kang, in mi ka ba nabak ngma nkyɔrɔk yɔng fɛ́ ba tusung e, in da yit irèn sak na aSpaniya, in da wat in tabak azɔng in ki di yin ninyɛn. 29Imi rēn fok ki in bin ta azɔng, in bi bin tik ni kushining nnang fɛ́ Anet-Isheshek nesek.
30Ábaruneng, in tsin ra awon ni yin, ni iyerek aTisa yit aYeso Kristi ni ishim fɛ́ Kabik aJɛrɛ nesek, ni di sɛ yin mo na awon na Adakunom, nek igigashang fi in se ne. 31Ra yin awon nek in di hwyet ni bɔk bafɛ́ avit inɔɔk atsak yɔng fɛ́ ba se na aJudiya, nɔng kutomong fi in da tsi in ra na aRushelima bin sɛ ishan na bafi ikuus fɛ́ ba se azɔng, 32nɔng ke Adakunom shim, ni in bin nɔ azɔng narɔ yin ni itɛrɛk iyɛ, ni in sɛ ifɔn azɔng nate yin. 33Won Adakunom fɛ́ a nesek kusot kukyang, na a se gung ni iyin ngma. Anɔng.
Iliyochaguliwa sasa
BaRoma 15: IbaasNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2019 The Nigeria Bible Translation Trust and © 2019 Wycliffe Bible Translators, Inc.
