ALuka 1
1
Itarak kufumung e
1Azɔk aTiyofulus, banet dot mang te nyɛk ba jɛk, ngma nkyɔrɔk fi in kin te nate yit. 2Ba kin jɛk ikyɛng fi iyit kin fok yit, na nu bafi icɛɛt. Iba kin di nkyɔrɔk e, na ayisi bá ni mɛsɛng e, iba kin tɛ ba shara ifɛ̀ Adakunom e. 3Nek anɔng wu, fi in di, i se gyat, in da jɛk ngma nkyɔrɔk fi in kin te, neme ni imɛsɛng e, nek imi mi kuus narɔk e. 4Imi tsin da jɛk e, nɔng ngɔn da rēn atsak ikyɛng fɛ́ ba mang da tees.
Ba tak ibes kutes aYohana anet abatisma
5Ni izen fɛ́ aHiridus kin yet agwɔm mben aJudiya, àware akak kin se, fɛ́ ba kin ku yes aZakariya, a kin yet azining ayɛt áware fɛ́ ba ras ntomong aware ni kukap Abija; abining wu aLizɛbɛtu kin ne ni izɔrɔk aHaruna. 6Ngma ba, ba kin yet batabat e ashon Adakunom, ba berese ntsi, ni itabak aTisa gyatgyat. 7Ba kin bɛ̀ nggon awo, nek aLizɛbɛtu kin yet akuma me; ama anɔng, ngma ba, ba kin tsang kop.
8Atuk akak, aZakariya kin se ni kutomong iware wu ni itu iya Adakunom ntong, nek izen itomong e yɔng kin yet ifubá, 9ntsi kutomong iware, yet ifi barak icang nek ikasa ayɔng fɛ́ a da nɔ narɔ iya aTisa mben, nek ashosh nkɔn ntek, icang kin di kpa ni wu, nek na a nɔ narɔ iya ntong e. 10Fi izen ashosh nkɔn ntek e nye, kudyɛng banet fɛ́ ba tse iya ntong e, kin se ni ira awon atasa.
11AZakariya wat a di atomaza aTisa ku wuruk ashon, a nyeseng ni bɔk iyak kuta ashosh nkɔn ntek e. 12Ni izen fɛ́ aZakariya ku di, a ku te beke, nnyim wat in ku yit. 13Awɛt atomaza me fɛ̀ ni wu, “I bi fok nnyim awo aZakariya; Adakunom mi shan awon ngɔn. Abining ngɔn aLizɛbɛtu da ka tes nggon kamatek e, ngɔn da ka ka te iyerek aYohana. 14Ka bi ki bɛ́ yin ni itɛrɛk iyɛ, banet dot bi nye iyɛ ikan nek kutes ká, 15nek ka bi yet agbat anet ashon aTisa. Ashi anap kɛ ikyɛng ijatang ayi bi nɔ na nu ká awo, ba bi ka ka shining na Kabik aJɛrɛ, na ka ren resek mo nafa nggɔ ká.#1:15 Ke: a mo nafa anyining. 16Ka bi bɛ́ ka tirik nnon aIsrela dot sak na aTisa, Adakunom bá. 17A bi ra kutomong ashon aTisa ayɛt abik, nɛ agap kuri afi aIliya, ka bi tirik ayɛ badada sak ni nnon bá, ka bi tirik bayɔng fɛ́ ba raba ifok ifɛ̀ sak isot banet batek, na anɔng wu fɛ́ a bi nye banet gyat nek aTisa.”#1:17 Ban di yin: AMalakey 4:5.
18AZakariya fɛ̀ nɛ atomaza me, “Na anɛ fi in di ki rēn fok ikyɛng fi ngɔn fɛ̀ deng da shining ɛ? Nek imi yɔng in mi kop, nɛ abining hom.”
19Atomaza me fɛ̀ ni iwu, “Imi wu in yet aGebirel, ayɔng fɛ́ a nyeseng ashon Adakunom, ba di tom sak ni ngɔn, ni in da tak ifɛ̀ itek deng. 20Di! Kanu ngɔn di ki wey gbik, i da kyem i ti cɛɛt awo, ma atuk fi ikyɛng deng shining, nek ngɔn rangɔn dang nɔɔk atsak ni kucɛɛt hom kang, fi ku da shining ni izen fɛ́ ba mi sak.”
21Ni izen e yɔng, kudyɛng banet ren resek amatse, ba tsin tot aZakariya na a wuruk, ba nɔ kudaam fok akyɛ fi i tsi i ku yit gbɔɔt ni itu iya ntong ɛ? 22Ni izen fɛ́ a nɛ wuruk amatse, a kyem a cɛɛt ni iba awo, ba wat ba rēn fok ba mi ku tarak ayisi ni itu iya ntong e, nek iwu woso cɛɛt ni iba ni mbɔk kyɛk, a kyem a tɛ a fɛrɛng awo.
23Ni izen fi izen itomong wu bi igang, a bun ari.
24Ama kizen gyeet, abining wu aLizɛbɛtu sok kafa, a nye nfɛn ntoon na woso nɛsɛk ice wu. 25ALizɛbɛtu fɛ̀, “ATisa mi fok angmishish hom, ni izen ti iyeng, a di tun nsum ayɛt banet.”
A tak ibes kutes aYeso
26Nɛ aLizɛbɛtu se ayɛt kufɛn kufɛ́ karataat ni isok kafa, Adakunom tom atomaza aGebirel sak na aNazaret, ni mben aGalili, 27sak ni ica anamang kakak fɛ́ ba yes ika aMarya, acam akak fɛ́ ba ku yes aYusufu afi izɔrɔk agwɔm aDauda se ni isam ka. 28Atomaza me tse narɔ aMarya, a fɛ̀ ni iwu, “In da te show, aTisa se gung ni ngɔn, ngɔn fi i mi sɛ awɛng narɔ wu.”#1:28 I se na afumung akak fok: Ngɔn bɛ̀ awɛng ayɛt banyining.
29AMarya nɔ kudaam makiyi, nek ifɛ̀ me dɔng, a woso yiring, “Akyɛ kuri ashow yɔng a yet ayɔng ɛ?” 30Nek anɔng, atomaza me fɛ̀ ni wu, “I bi fok nnyim awo aMarya, nek ngɔn mi sɛ awɛng ashon Adakunom. 31Ngɔn da sok kafa, i da tes nggon kamatek e, i da ka ka nɔɔk iyerek aYeso. 32Iwu bi yet aratek, ba bi ku yes Arim Azɔk-Bazɔk. ATisa Adakunom bi ku nɔk kuta isonong ada wu agwɔm aDauda, 33a bi ya igwɔm ni izɔrɔk aYakub ayɛ nɛ ayɛ, igwɔm wu, bi sot vit nkum e.”
34AMarya nye atomaza me irip yɛ, “Na anɛ fi ikyɛng deng da sot ɛ, ni imi tsin ren resek mo ica anamang ɛ?”
35Atomaza me fɛ̀ ni wu, “Kabik aJɛrɛ da bɛ́ naton ngɔn, nawu Azɔk Bazɔk da ka te gip. Nek anɔng, aJɛrɛ me yɔng fɛ́ ba bi tes e, ba bi ku yes Arim Adakunom. 36Di, afi izit ngɔn aLizɛbɛtu yɔng a da tes nggon ayɛt ikop wu, iwu yɔng fɛ́ ba tsang nye fok da a bi tes awo, a yɔng a mi nɔ ni fɛn wu kufɛ́ karataat. 37Nek vit ikyɛng fi i gaat Adakunom.”
38AMarya fɛ̀ ni wu, “mi yet asam aTisa, won ikyɛng fi ngɔn fɛ̀, ni i sot anɔng ni imi.” Atomaza me ma tseng.
AMarya tse itsen narɔ aLizɛbɛtu
39Ayɛt nnom e yɔng, aMarya kana nye, a yit irèn ziri ziri sak ni wɔp ice ihwyanang aJudiya, 40na tsin nɔ ari aZakariya, a te show aLizɛbɛtu. 41Ni izen fɛ́ alizɛbɛtu fok ite ashow aMarya, nggon afaa wu te nyamang, aLizɛbɛtu sɛ ishining na Kabik aJɛrɛ. 42A ta kutɔ! A kpa cɛɛt yɛ, “Awɛng se gung ni ngɔn ayɛt banyining ngma, awɛng se gung ni nggon fi i da tes! 43Akyɛ de i di bɛ́ na awɛng yong anɔng ɛ, fi nggɔ aTisa hom di ki bɛ́ itsen ɛ? 44Ni izen fi in fok ashow ngɔn, kaban nggon fɛ́ ka se nafa min te nyamang nek iyɛ ikan. 45Awɛng se gung nɛ abining yɔng, fɛ́ a mi nɔɔk atsak, fok ngma ikyɛng fɛ́ aTisa mi fɛ̀ ni wu da shining!”
Abom itere fɛ́ aMarya ra Adakunom e
46Ama anɔng, aMarya fɛ̀,
“In tsin tere aTisa ayɛt iyɛ hom,
47in bi iyɛ ikan sak na
Adakunom Anet-Isheshek hom,
48nek iwu mi yiring ni imi
ngma ni kurat fi in bɛ̀ tɛ asam wu.
Di nkum yɔkɔnɔng sak ashon,
ngma nzam azatse
di ki yes anet awɛng.
49Nek Azɔk-Bazɔk mi di nye
agbat ikyɛng
iyerek wu se jɛrɛ.
50Angmishish wu,
se sak na bayɔng
fɛ́ ba foos nnyim wu,
nkum kuzam ku kà sak ni ku yá.
51A mi ras agbat-agbat ntomong
ni kubɔk wu,
a sharatat bayɔng fɛ́ ba foos ni ice,
ni ikyɛng fɛ́ ba bɛ̀.
52A mi tisik bágwɔm na ata igwɔm bá,
a mi sok garang bayɔng fɛ́
ba ka ba byɛs.
53A mi shining bafi nzong ni ihwya,
a mi ro barum ba tseng,
ni mbɔk nkot.
54A mi gbinding asam wu aIsrela,
a mi yiring ni wu,
a tonong angmishish wu
sak na banet wu.
55Nek ikyɛng fɛ́ a ki mang fɛ̀
na badakop yit,
sak ne aIbrahim,
ni izit wu ayɛ vit igang e.”
56AMarya nye nfɛn ntaat azɔng na aLizɛbɛtu, a da nɛ bun ari.
Kutes aYohana anet abatisma
57Ni izen, fi izen nye fɛ́ aLizɛbɛtu da nɔ wu, a tes nggon kamatek e. 58Bayɔng fɛ́ ba se bakat ni wu, na bafi izit wu, nye iyɛ ikan makiyi, fɛ́ ba fok yɛ a mi nɔ wu, ba ku sɛ mo ifeng nek ikyɛng itek fɛ́ aTisa ku nye ne.
59Ama fi nggon e shining nkɔs nkara, ba nyim, nɔng ba da ka ka nye katse, ba bin ka ka bɔ mo iyerek kpaf ti ifɛ́ ada ka aZakariya. 60Awɛt nggɔ nggon e, fɛ̀ ni iba awey, “Ba da ka ka yes aYohana.”
61Ba fɛ̀ ni wu, “Vit afi izit yin akak fɛ́ a bɛ̀ kuri iyerek deng.”
62Ba kpa risim ada me ni mbɔk, yɛ na a tak kuri iyerek fi iwu shim a nɔɔk nggon e. 63Ada me fɛ̀, na ba ku nɔk kukon ijɛk, a di jɛk ide yɛ, “Iyerek ka yet aYohana.” Ikyɛng e te kaangan yɔɔt. 64Ayɛt izen izining, kanu wu tarak, ilem wu bisik, a kpa cɛɛt, na tere Adakunom. 65Anyim yit kaangan fɛ́ a se azɔng, banet tseng ni kucɛɛt e, ngma ni mben fi in se ni ice ihwyanang aJudiya. 66Ngma ayɔng fɛ́ a fok ifɛ̀ me, na ku te yɔɔt, na nye, “Nggon e kang da yet akyɛ kuri nggon ɛ?” Nek kubɔk aTisa se naton ka.
Abom aZakariya
67Ba se na anɔng, Kabik aJɛrɛ wat ka shining aZakariya, a kpa taas ibes,
68“Iratek ni isot ifɛ́ aTisa
Adakunom afi aIsrela,
nek a mi bɛ́
a sheshek banet wu.”
69A mi tun Anet-Isheshek yit,
ni izɔrɔk asam wu
agwɔm aDauda
70(tɛ fɛ́ a kin di cɛɛt
na batan aJɛrɛ wu, bafɛ́ yame),
71a bi ki sheshek yit,
ni mbɔk bafi ifup ni yit,
nɛ ni bɔk ngma bayɔng
fɛ́ ba ki ra yit.
72Na anɔng wu fɛ́
a di ki tonong angmishish
fɛ́ a bɛ́ sak na badakop yit.
A di yiring ni kushi aJɛrɛ
fɛ́ a ki mang nye,
73kushi fɛ́ a kin nye
adakop yit aIbrahim ne,
74fok iwu bi ki shan yit
ni bɔk bafi ifup ni yit,
nɔng in da ku ya yit
ntong vit nnyim,
75nɔng in da sot yit
Jɛrɛ ashon wu,
nkum kutset yit.
76“Wɛt ngɔn, nggon in,
ba da ka yes atan afɛ́ Azɔk-Bazɔk;
nek ngɔn da tseng ashon aTisa,
i da nye irèn nek iwu,
77ngɔn bi taas banet wu fok,
Adakunom bi ka ba fuut anɛn bá,
na ma ka ba shan.
Fi ines ni irèn ifuut anɛn bá.
78Nek anɔng wu, kudot angmishish
fɛ́ Adakunom yit bɛ̀,
fi i sak mgbey kunom adiding,
fi in bi ne azanɛn.
79In bi ron sak naton bayɔng
fɛ́ ba se ayɛt nhwyi,
na naton bayɔng fɛ́
nawu iku mi ka ba te gyip,
a bi ki tonoso yit irèn
sak isɛs kukyang.”
80Nggon e rasak, ka te agap ayɛt abik; ka sot ayɛt ayit, sak izen fɛ́ a nɛ tonong ice wu ni dɛt sak nɛ banet aIsrela.
Iliyochaguliwa sasa
ALuka 1: IbaasNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2019 The Nigeria Bible Translation Trust and © 2019 Wycliffe Bible Translators, Inc.
