AYohana 19

Ba Tsɛɛt aYeso Ishɔt Iku Itegak

1Ama anɔng, aBilatus sok aYeso, a fɛ̀, ne ba ku tsot ne ahwyereng. 2Batsom e, bat abong igwɔm afi itsitsan, ba ku te ne ni ice. Ba tɛ ba ku te, kugboo kukpin kukak kugyigyel. 3Ba woso tsees narɔ wu, ne ba nye ni wu, “Kutset agwɔm baYahuda ni ku sot kusɔɔp!” Ne ba ma ku rus kufok.

4ABilatus tɛ a wuruk sak amatse, a tse a fɛ̀ ne baYahuda me, “Fok yin, imi yɔng, in da ki tun yin, aYeso me, in shim, ni i rēn yin, fok da imi ku se ni inɛn ikikak fi ishɔt da ku ya mo awo.” 5Izen fɛ́ aYeso wuruk, ne abong itsitsan e ni ice wu, ni kugbat ikpin kusɔp, kugyigyel e, ni irɔm wu. ABilatus fɛ̀ ni ba, “Di yin anet e yo!”

6Ni izen fɛ́ àware, nɛ bafi itosok karɔ iya mben e ku di, ba ta nkun ye, “Ne ba tekak iwu! Ne ba tekak iwu!”

ABilatus fɛ̀ ni iba, “Tseng yin ni iwu, ikyɛng yin, a da tsi i ku tekak yin ni mbɔk yin. Nek imi, ku se ni inɛn ikikak fi ishɔt da ku ya mo awo.”

7BaYahuda me, fɛ̀ ni iwu, “Iyit bɛ̀ yit ntsi yit, ntsi me tonong, fok i se gbing-gbing ne a ku, nek a kok ice wu, fok iwu yet nggon Adakunom.”

8Izen fɛ́ aBilatus fok kucɛɛt e yɔng, inyim ban ku yit. 9A tɛ bun sak ayɛt agbis e, a rip aYeso ye, “Ngɔn yet anet akɛ?” Awɛt aYeso te yuu, dan fɛ̀ ikikak. 10Nek anɔng, aBilatus fɛ̀ ni iwu, “Ngɔn rangɔn dan cɛɛt ni imi yɛ? Ngɔn rēn fok, imi bi ice, fi in da sak ba da bisik, ke ni in te, ba da tekak awɛ?”

11AYeso fɛ̀ ni iwu, “Ngɔn bi ice ikikak naton hom awo, tit nek Adakunom wu, fɛ́ a mi da nɔɔk ide naton min, nek anɔng, ayɔng fɛ́ a di nabak ni bɔk ngɔn, iwu fɛ́ a da wat ni inɛn.”

12Nkum fɛ́ aBilatus fok anɔng, a kpa tsɛt irèn, fɛ́ a di ki hwyet ne aYeso, awɛt baYahuda, ya kashon ni itang nkun ne ba nye, “Ki ngɔn hwyet ne anet yong, idɔng tonong fok, ngɔn yet afidang aKaisar agwɔm aRoma awo. Nek ngma anet fɛ́ a yes ice wu agwɔm, a tsin tsɛt icuna ne aKaisar.”

13Izen fɛ́ aBilatus fok anɔng, a wuruk ne aYeso sak amatse, a tse a sonong ni kuta isonong ishɔt wu, fɛ́ ba yes iko, karɔ fɛ́ ba bas ne ata. Ba yes ni ilem baYahuda ye, aGabata. 14Kunom e yɔng, kin yet kunom inye nkyɔrɔk nfi izen amok aPasova gyam. Izen e kin se bakat, ka tɛ inom.

ABilatus fɛ̀ ne baYahuda me, “Nga yin agwɔm yin.”

15Ba kpa tang nkun ye, “Tseng yin ni iwu, tsi fɛt yin iwu! Tsi tekak yin iwu ni kum!”

ABilatus fɛ̀ ni iba, “I shim, itekak yin, agwɔm yin ɛ?”

Agbat àware me fɛ̀ ni iwu, “Iyit bɛ̀ yit agwɔm azizining kyɛk, ayet aKaisar agwɔm aRoma.”

16ABilatus ma ka ba nabak aYeso ne ba tse ba tekak.

Itekak e

Nek anɔng, batsom e tseng ne aYeso. 17AYeso wuruk ni iwɔp e, a mi fanang kukum itekak wu, sak narɔ fɛ́ ba yes ika, karɔ akup ice banet. Ba yes ika ni ilem baYahuda ye aGolgota. 18Azɔng fɛ́ ba tse, ba ku tekak mo, nɛ banet bakak bafaa, azining ni bɔk iyak wu, akak ni bɔk imen wu, aYeso nate ba.

19ABilatus te ne ba jɛk, ikyɛng fi i sak ba ku tekak mo. Ikyɛng fɛ́ a jɛk yet, “AYeso anet aNazaret, agwɔm baYahuda.” 20BaYahuda dot fa ijɛk e, nek karɔ fɛ́ ba di tekak aYeso me kin se bakat ni kuwɔp, ba kin jɛk ijɛk e ni ilem baYahuda, aLatin, aGirik. 21Agbat àware baYahuda me fɛ̀ ne aBilatus ye, “I bi jɛk ye, ‘Agwɔm baYahuda awo,’ jɛk ye, ‘Anet yong nye a fɛ̀ fok, iwu yet agwɔm baYahuda.’ ”

22ABilatus fɛ̀ ni iba, “Ikyɛng fi in mi jɛk, ide de fi in mi jɛk.”

23Ama fɛ́ batsom e, mi gang itekak aYeso, ba sok nkpin wu, ba kaba ina nasa na naas, kaangan ba ne kasa kafuu. Ba tɛ ba sok kukpin wu kufe ayɛt e, fi ku se vit itos, fɛ́ ba bat iko gbol sak aben.

24Ba fɛ̀, “In bi sarak yit iko awo, won in di barak yit icang ni ko, in da di yit angan wu a da ya iko e.”

Ikyɛng deng te anɔng, nɔng ba bin di shining ikyɛng fɛ́ ba ki mang jɛk ni fumung aJɛrɛ ye,

“Ba kabasa nkpin in nate ba,

nɛ ba di bara icang

ni kukpin ayɛt hom,

nɔng ba bin di,

ayɔng fɛ́ a da ya iko.”

Ikyɛng e deng fɛ́ batsom e kin nye dɔng.

25Banet fɛ́ ba se ni nyeseng bakat ni kukum itekak aYeso me ba kin yet, nggɔ wu, nɛ banganyining nggɔ wu; aMarya abin aKilopas, nɛ aMarya afɛ́ aMagadala. 26Izen fɛ́ aYeso di nggɔ wu, nɛ afi-imɛɛs wu yɔng, fi iwu shim ni nyeseng bakat azɔng, a fɛ̀ ni nggɔ wu, “Aneng, di nggon ngɔn ka” 27A ma fɛ̀ ne afi-imɛɛs wu me, “Di nggɔ ngɔn yo.” Nkum atuk e yɔng sak ashon, afi-imɛɛs e wat a tseng ni iwu sak ari wu.

Iku aYeso

28Ama anɔng, ne aYeso mi rēn fok kutomong wu mi gang, a fɛ̀, “Iyɛ ingash di daam.” A fɛ̀ anɔng, nɔng ikyɛng fɛ́ ba ki mang jɛk ni fumung aJɛrɛ di shining. 29Ashi ajatang akak kin se ni ite tsik azɔng, ni wang, ba bɔ ina ni ikyɛng ikak fi ise fungam, ba tubuk ina nikon ahisop, ba ku te ne na nu. 30Ama fɛ́ aYeso bamang ashi me, a fɛ̀, “Ba mi gang!” Ama anɔng, a te gup ice wu, a kɔrɔk nsong wu.

31Kunom e yɔng kin yet, kunom inye nkyɔrɔk gyam nek Atuk aSabat. Nek nggɔn baYahuda, da in shim nkom ni in irēn resek mo na akum itekak sak atuk aSabat awo. ATisa aSabat yet agbat inom, nek anɔng wu fɛ́ a sak bakɔk-ashon baYahuda tsɛt aBilatus a ka ba nɔɔk irèn, ne ba se ba di bushung atak banet e, nɔng ba se ba di tisik ni nkom e. 32Nek anɔng wu fɛ́ batsom e, tse ba di bushung atak anet afi imɛsɛng e, nɛ afɛ́ afaa me. 33Awɛt ni izen fɛ́ ba ta narɔ aYeso, ba bushung atak wu awo, nek ba di a mi tsang ku. 34Tit, atsom azining fɛ́ a tubuk ku kufam aYeso ni kukɔn, karɔ me wat ka kpa teng nasok nɛ ashi.

35Anet yong fɛ́ a kin di ikyɛng e deng, iwu fɛ́ a tak ifɛ̀ me, ifɛ̀ wu me yet atsak, iwu rēn fok kucɛɛt e yet atsak, nek anɔng fɛ́ a tsin ki taas yin mo, nɔng iyin da bin di nɔɔk yin atsak ba. 36Ikyɛng deng te anɔng, nɔng ikyɛng fɛ́ ba ki mang jɛk ni fumung aJɛrɛ, i se i di shining ye: “Vit kukup wu kukak fɛ́ ba but.” 37Tɛ fɛ́ ba jɛk narɔ kakak ni fumung aJɛrɛ ye, “Ba bi di, ayɔng fɛ́ ba ku tubuk.”

Kunɛt aYeso

38Ama anɔng, aYusufu afi iwɔp Arimatiya, fɛ́ a yet afi ikuus aYeso afi inɛt, nek a foos inyim bakɔk-ashon baYahuda, a tse ra awon ne aBilatus, ye ne a ku nɔɔk irèn i sok kukom aYeso, nɛ a tse a nɛt. Abilatus ku nɔɔk irèn, a tse sok iko, a tseng ni iko. 39ANikodimos, anet yɔng fɛ́ a kin tse narɔ aYeso ne tuk, a tseng gung nɛ aYusufu, aNikodimos kin bereng nkpe ikan nfi nkɔn ntek, fɛ́ ba nye ina ne amur, nɛ alos, kudot na kin se bakat ibit a shining. 40Iba bafaa ba sok kukom aYeso, ba sok nkpe ikan nfi nkɔn ntek nɛ nkpin alinɛn nkan, ba di kunung kukom e, ba nye kpaf ti nggɔn ba nfi baYahuda di se. 41Narɔ fɛ́ ba di tekak aYeso me, igɔɔt ikak se azɔng. Azɔng ni igɔɔt e yɔng, kurɛk kukak kufas se azɔng, fɛ́ da ba ki mang di nɛt akak awo. 42Nek kunom e kin yet kunom inye nkyɔrɔk gyam nek aPasova baYahuda, nek kurɛk e se bakat fɛ́ ba di nɛt aYeso azɔng.

Iliyochaguliwa sasa

AYohana 19: IbaasNT

Kuonyesha

Shirikisha

Nakili