AYohana 18

Ba Tekap aYeso

1Ama fɛ́ aYeso mi gang ira awon e, iwu nɛ bafi imɛɛs wu, ba tse ba tat kukyɛk aKidiron. Ni nyi kuyɔng e, igɔɔt ikak di se fɛ́ ba di tuus nakon ifat, aYeso tse azɔng nɛ bafi imɛɛs wu. 2AJudas yɔng fɛ́ a da rɛp aYeso, a tsang rēn karɔ me yɔng, nek aYeso mi di mɛɛ ne ba nyis azɔng nɛ bafi imɛɛs wu. 3Nek anɔng, aJudas sok kudyɛng banet itsom, nɛ bafi itosok karɔ iya mben fɛ́ agbat àware, nɛ BaFarasi ka ba tom; Ngma ba, ba tse azɔng ni igɔɔt e, ba berese agaramun, nɛ ákon irong, nɛ ares itsom.

4AYeso mi tsang rēn ngma ikyɛng fi i da te ni wu, nek anɔng, a wuruk sak amatse, a ka ba rip, “Angan wu fi itsɛt yin ɛ?”

5Ba fɛ̀ ni wu, “In tsɛt yit aYeso anet aNazaret.”

AYeso fɛ̀ ni ba, “Imi wu in yet iwu.” (AJudas anet irɛp wu me se ni nyeseng azɔng gung ni iba.) 6Izen fɛ́ aYeso fɛ̀ ni iba ye, “Imi wu in yet iwu,” ba serek amirima, ba kpas aben.

7AYeso tɛ a ka ba rip ye, “Angan wu fi iyin tsɛt yin ɛ?”

Ba fɛ̀ ni wu, “AYeso anet aNazaret.”

8AYeso fɛ̀ ni iba, “In mi fɛ̀ ni yin, Imi wu anɛ, kɛ ayet Imi wu fi i tsin di tsɛt yin, ni won in banet ba ne ba tseng.” 9A fɛrɛng anɔng, nɔng kucɛɛt fɛ́ a kin fɛ̀, di shining, “Ada, ayɛt banet fi ngɔn mi di nɔɔk, vit azining fɛ́ a mi wey.”

10Awɛt aSiman Bitrus fɛ́ a se na awal, a kɔrɔk iwu, a di tɛmɛng asam agbat àware, a ku tun kuto ibɔk iyak. (Iyerek asam e yet aMalkus.)

11AYeso fɛ̀ ne aBitrus, “Te sɔɔn awal ngɔn ni bas wu! Ngɔn di ti, in da sɔ ne aridɛ fɛ́ Ada di nɔɔk awɛ?”

Ba tse ne aYeso ashon Anas

12Agbat bafi itsom e, nɛ banet wu, ngma banet itosok karɔ iya Adakunom ntong baYahuda tekap aYeso, ba ku rosom. 13Ba tin tse ni wu ashon Anas, iwu yet atek aKayafas. AKayafas wu fɛ́ a kin yet agbat àware afi iyɛ me dɔng. 14Iwu aKayafas wu fɛ́ a kin nɔɔk bakɔk-ashon baYahuda itabak fok, i wat gyat anet azining ne a ku aza banet kusum.

Nanan fɛ́ aBitrus tin nye

15ASiman aBitrus, nɛ afi-imɛɛs wu akak, ba teng ba di kuus aYeso ama. Afi-imɛɛs e me yɔng, tsang rēn agbat àware me, nek anɔng wu fɛ́ ba ku won mo a di kuus aYeso sak atasa agbat àware me. 16ABitrus di wey ni nyeseng amatse, ne tisi kasa me. Afi-imɛɛs e me yɔng, fɛ́ agbat àware ku rēn e, a tɛ bun, a tse a fɛrɛng ne kanamang fɛ́ ka yet kafi itosok katisi me, a da ne a di nɔ ne aBitrus.

17Kanamang fɛ́ ka se ni itot katitu me, rip aBitrus ye, “Ngɔn yet azining ayɛt bafi imɛɛs anet e yong awɛ?”

ABitrus fɛ̀ ni ka, “Awey yo! Imi di se awo.”

18Karɔ me kin se cere, nek anɔng, basam ari me, nɛ banet itosok karɔ iya mben, ba fɛp kurong, ba nyeseng azɔng, ba se ni ifos e. ABitrus tse nyeseng azɔng narɔ ifok kurong e ba.

Agbat-agbat àware nyes aYeso nrisim

19Agbat àware me, nyes aYeso irisim naton bafi ikuus wu, ni kuri itees fɛ́ a raas.

20AYeso fɛ̀ ni wu, “Imi mi taas kazatse ncɛɛt weshek. Imi mi tees banet izen dot narɔ iya Adakunom ntong, nɛ na narɔ inyis baYahuda, vit ikyɛng fi imi ra ni nɛt. 21Akyɛ fi i sak i di nye mo irisim ɛ? Rip banet fɛ́ ba mi foos kucɛɛt hom, nɛ ba da tak. Iba rēn ikyɛng fi in mi ka ba taas.”

22Ni izen fɛ́ aYeso fɛrɛng anɔng, azining ayɛt bafi itosok karɔ iya mben e, fɛ́ a se ni nyeseng azɔng, a rus aYeso, ama fɛ̀ ni wu, “Anɔng fi ngɔn da cɛɛt ne agbat àware ɛ?”

23AYeso fɛ̀ ni wu, “Ki in mi nye kucɛɛt kukak kumaan e, ni di tonong kabak inɛn e. Ki kucɛɛt fi in fɛ̀ yet atsak, akyɛ sak fi i di rus ɛ?” 24Anas sak ne ba tseng ni wu ni rosom, sak ashon aKayafas agbat àware.

Nanan aBitrus ifɛ́ afaa, nɛ ifɛ́ ataat

25Ne aSiman Bitrus mo ni nyeseng narɔ ifok kurong. Bakak ayɛt banet e, fɛ̀ ni wu, “Ngɔn yet azining ayɛt bafi imɛɛs anet yɔng awɛ?”

A tɛ ton wu ye, “Awey yo! Imi di se awo.”

26Azining ayɛt basam agbat àware me, fɛ́ ayet afi izit anet yɔng fɛ́ aBitrus kin ku tɛmɛng kuto, fɛ̀ ni wu, “Ayet ngɔn wu fi in kin da di, ni igɔɔt gung ni wu awɛ?” 27ABitrus tɛ a bang ya nanan, kpaf ni izen e yɔng, atsanyon kpa tɛp.

AYeso ashon aBilatus

28Bop nadiding, ba wuruk ne aYeso ari aKayafas sak i tse ni wu ne agbis aGwɔmna aRoma. BaYahuda me raba dan nɔ ne agbis e ice ba, ye nek fok ba shim ba won ice ba jɛrɛ, nɔng ba bin se ba di ya nayak iyiring ne amok aPasova. 29Nek anɔng, aBilatus wuruk amatse, a ka ba se, a ka ba rip, “Iyin te yin kukun anet yong naton akyɛ?”

30Ba fɛ̀ ni wu, “Kɛ anet yɔng fɛ́ a yet afi inɛn awo, kɛ vit ikyɛng fi i sak in ku kɔk yit sak ashon ngɔn.”

31ABilatus fɛ̀ ni ba, “Tseng yin ni wu, i da tsi i ku ra yin ishɔt ikyɛng yin, kuri ifi ntsi yin.”

Awɛt baYahuda me fɛ̀ ni wu, “Vit iyit ne agap itsɛɛt ishɔt iku.” 32Ikyɛng deng te anɔng, nɔng aYeso bin ku kpaf ti fi iwu kin fɛ̀ a bi ku.

33ABilatus tɛ bun ayɛt agbis e, a yes aYeso, a ku nye ku rip ye, “Ngɔn wu fi i yet agwɔm baYahuda me yɛ?”

34AYeso fɛ̀ ni wu, “Irip e yeng, yet ifi ice ngɔn na, ke i yet iyɔng fɛ́ ba fɛ̀ ni di rip ɛ?”

35ABilatus fɛ̀ ni wu, “A da se ti imi yet afɛ́ aYahuda me akak ɛ? In fɛ̀ kɛ ayet banet ngɔn, nɛ agbat àware fɛ́ ba da kɔk sak ashon in awɛ. Di tak, akyɛ de fi ira yɛ?”

36AYeso fɛ̀ ye, “Igwɔm inaan yet ifɛ́ azatse kang awo. Kɛ igwɔm inaan fi i yet ifɛ̀ azatse kang, kɛ bafi ikuus hom tsot itsom, nɔng ba bin rone baYahuda ba di tekap. Awey, igwɔm in yet ifɛ́ azatse awo.”

37ABilatus tɛ fɛ̀ ni wu, “A sot ngɔn yet agwɔm a?”

AYeso fɛ̀ ni wu, “Ngɔn tak gyat, nek imi yet agwɔm. Ikyɛng fi isak ba di tes mo dɔng, nek anɔng fi isak, in di bɛ́ azatse, nɔng in da bin taas atsak. Ngma ayɔng fɛ́ ayet afɛ́ atsak, di foos.”

38ABilatus fɛ̀ ni wu, “Akyɛ de i yet atsak ɛ?” Ama kucɛɛt e, aBilatus tɛ wuruk sak amatse, sak narɔ baYahuda me, a fɛ̀ ni ba, “Da imi se anet yong, ni inɛn ikikak fi ishɔt da ku ya mo awo. 39Ngma ne anɔng, iyin bɛ̀ yin, nggɔn yin, fɛ́ ki izen amok aPasova nye, ni in ki tun yin, afi inyang azining. Kɛ, iyin shim yin, in ki tun yin ‘agwɔm baYahuda,’ yɛ?”

40Ba ta nkun ye, “Awey, iyit shim yit awo! Ki tun yit aBarabas ningya!” (ABarabas e, kin yet akpatang.)

Iliyochaguliwa sasa

AYohana 18: IbaasNT

Kuonyesha

Shirikisha

Nakili