AYohana 13
13
AYeso kusu atak bafi imɛɛs wu
1Nɛ ngmash nɛ ba ra amok aPasova, aYeso mi rēn gyam fok izen mi nye, fɛ́ a da won kazatse kang, sak ibun narɔ Ada wu. Nek aYeso mi tonong ishim, sak nɛ bafuu fɛ́ ba se azatse kang, a ka ba tonong ishim wu sak ni igang e.
2Nawuwuri, aYeso nɛ bafi mɛɛs wu se ni iya nayak atuk, nɛ aShetan mi tsang te ni iyɛ aJudas aIskariyoti arim aSiman, fok na wey na aYeso. 3AYeso rēn gyam fok Ada wu, mi nɔɔk kaaki ikyɛng ni bɔk wu, a tɛ rēn fok iwu ne narɔ Adakunom, a bi tɛ bun sak narɔ wu; 4Nɛ ba tsin ren yas, aYeso dorok tsik, a tun kunyin kpin wu, a sok icɛk ikpin, a rosom nɛ awit wu. 5Ama anɔng, a korok ashi ni itsɛn iratek, a kpa di kusu atak bafi imɛɛs wu, nɛ di kuus iyɛs e, ni icɛk ikpin e yɔng fɛ́ a rosom nɛ awit wu.
6Fɛ́ a ta narɔ aSiman Bitrus, a fɛ̀ ni wu, “ATisa min, ngɔn shim i di kusu imi atak ɛ?”
7AYeso fɛ̀ ni wu, “Ngɔn da kyem i rēn ikyɛng fi in se nɛ yɔkɔnɔng awo; azeng sak ashon, i bi ni i rēn gyat.”
8ABitrus fɛ̀ ni wu, “Ka awɛy! Ngɔn di ki kusu imi atak awo.”
AYeso tɛ fɛ̀ ni wu, “Kɛ da in da kusu atak awo, ikikak di moon ni ngɔn awo.”
9ASiman aBitrus fɛ̀ ni wu, “Nkum atak kyɛk awo, di kusu mbɔk ni ice ngma kusum!”
10AYeso fɛ̀ ni wu, “Anet fɛ́ a mi so, tsɛt ikusu atak kyɛk, kurɔm wu se cɛl. Iyin se yin cɛl da ngma yin awo.” 11Nek iwu rēn anet fɛ́ a da wey ni wu, nek anɔng wu fɛ́ a di fɛ̀, da ngma yin fi i se yin cɛl awo.
12Ama fɛ́ a mi gang i ka ba ikusu atak, a sok anyin kpin wu a te, a da tɛ bun narɔ isonong wu. A ma ka ba nye irip, “Iyin rēn in ikyɛng fi i sak, in ki nye yin anɔng ɛ?
13“Iyin di yɛs yin, ‘Anet Itees’ nɛ ‘ATisa’ ifɛ̀ yin yet atsak, ikyɛng fi imi yet yɔng. 14Ki imi fi in yet aTisa yin nɛ Anet Itees yin, in ki kusu yin atak, i se kpaf, ni kusu yin bafidang e bà 15Imi mi ki tonong yin ikyɛng ira, nɔng iyin da ra yin bafidang e bà, kpaf ti fi imi ki ra yin e. 16Won in ki tak yin atsak, vit asam fɛ́ a wat atekari wu ni iratek, vit atom fɛ́ a wat anet fɛ́ a ku tom. 17Yɔkɔnɔng fi i mi rēn yin nkyɔrɔk nang, i da sɛ yin iyɛ ikan ki i nye yin ina.
AYeso tak ibes anet fɛ́ a da wey ni wu
18“Da in tsin cɛɛt kucɛɛt kang naton yin ngma awo; Imi rēn kuri banet fin kasa. Wɛt nek ikyɛng fɛ́ ba man jɛk ni fumung ajɛrɛ di shining: ‘Ayɔng fɛ́ a tsin yas ni itsɛn izining ni imi, a mi sot anet ifà ni mi.’
19“In tsin ki tak yin gyam dan ni ite, nɔng ni izen fi i bi te, i bi nɔɔk yin atsak fok imi wu in yet Ayɔng e mɛɛ. 20Won in ki tak yin atsak, kaakyɛ anet fɛ́ a shan anet fi in ku tom, Imi wu fɛ́ anet e di shan; kaakyɛ anet fɛ́ a di shan imi, a shan Ada hom fɛ́ a di tom.”
21Ama fɛ́ aYeso mi gang kucɛɛt e yɔng, iyɛ wu beseng makiyi, a wat a tarak ifɛ̀ me wɛshɛk, yɛ, “Won in ki tak yin atsak, azining ayɛt yin, da tsɛ a di rɛp.”
22Bafi imɛɛs wu kpa kana yɛrɛ, vit dan rēn anet fɛ́ a di cɛɛt naton e. 23Azining ayɛt ba, fɛ́ aYeso dung di te iyɛ ni wu, a se ni sonong, a mi te yɛndɛng ni kufam wu. 24ASiman aBitrus ku te kyɛbɛt, a fɛ̀ ni wu, “Ku rip angan wu fɛ́ a di cɛɛt e.”
25Nek anɔng, anet e ban te yɛndɛng ni fam aYeso, a ku rip yɛ, “ATisa, angan wu ɛ?”
26AYeso tɛ fɛ̀, “Ayet ayɔng fi in da ku nɔɔk icɛk akpam, ama fi in sok iye ayɛt itsɛn.” Yɔng a sok icɛk akpam, a sok a nɔɔk aJudas aIskariyoti arim aSiman. 27Nizen fɛ́ aYahuda shan icɛk akpam e, aShetan wat a ku nɔ.
AYeso fɛ̀ nɛ aYahuda me, “Ikyɛng fi i shim i nye, tsi nye ide ziri ziri!” 28Ayɛt bayɔng fɛ́ ba se narɔ iyak e, vit akak ba fɛ̀ a kyem a rēn ikyɛng fi i sak aYeso di fɛ̀ ni wu anɔng. 29Nek aJudas wu fɛ́ a yet anet iberese amala itsɔm bá, bakak ba yes gyang, aYeso tsin ku taas fok, na a tsɛ na shan ikyɛng fɛ́ ba da ya amok e, kɛ na a tsɛ nɔɔk bakan iyin ikyɛng ayi. 30Ama fɛ́ aYahuda shan icɛk akpam e, a wuruk amatse. Izen e yɔng, kin se natuk.
AYeso tak ibes nanan fɛ́ aBitrus da nye
31Ama fɛ́ aYahuda mi tseng, aYeso fɛ̀ ni ba, Yɔkɔnɔng wu fɛ́ Arim Anet mi sɛ iratek, Adakunom mi sɛ iratek nek iwu. 32Kɛ Adakunom sɛ iratek nek iwu, Adakunom da tonong Ari me iratek ice wu, a da ku nɔɔk izɔk izen izining.
33Nnon yin, in da sot ni iyin nfi kizen hyiit. I di ki tsɛt yin, kyɔn ti in kin di tak bakɔk-ashon baYahuda, nek anɔng in tsin ki tak yin yɔkɔnɔng: “Karɔ fi in di ki tseng, iyin da kyem i tse yin awo.
34“In tsin ki nɔɔk yin agbat ifɛ̀ ifas: Shim yin bafidiin. Kyɔn ti imi ki shim yin, anɔng wu i da shim yin bafidiin bá. 35Nɛ anɔng wu ngma banet da rēn, fok iyin yet yin bafi ikuus hom, ki i shim yin bafidiin.”
36ASiman aBitrus ku rip yɛ, “ATisa, ngɔn da tseng sak akɛ?”
AYeso fɛ̀ ni wu, “Karɔ fi in tsin di tseng, ngɔn da kyem i di kuus mo yɔkɔnɔng awo, i bi ni i di kuus mo azeng sak ashon.”
37ABitrus fɛ̀ ni wu, “ATisa, akyɛ da rone, in da kuus mo yɔkɔnɔng ɛ? In da mees kutset yin nek ngɔn.”
38AYeso fɛ̀ ni wu, “Ngɔn da kyem i mees, kutset ngɔn nek imi yɛ? Won in da tak atsak, dan atsanyon nɛ a tɛp, ngɔn da nye nanan in, kataat!
Iliyochaguliwa sasa
AYohana 13: IbaasNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2019 The Nigeria Bible Translation Trust and © 2019 Wycliffe Bible Translators, Inc.
