Genesis 49
49
Ang Katapusan nga Pamilinbilin ni Jacob
1Si Jacob nagtawag sang iya mga anak nga lalaki kag nagsiling, “Magtipon kamo sing tingob, kag sugiran ko kamo kon ano ang mahanabo sa inyo sa palaabuton:
2“Tilipon kamo kag magpamati, mga anak ni Jacob,
pamati kamo sa inyo amay nga si Israel.
3“Ruben, panganay ko nga anak, ikaw ang akon kusog,
kag ang nahauna nga anak sang akon pagkalalaki,
ang labing bugalon kag labing makusog sa akon mga anak nga lalaki.
4Kaangay ikaw sang nagahuganas nga baha,
pero indi ikaw ang manginlabing importante,
kay nagpakighilawas ka sa akon babayi.
Gindagtaan mo ang akon katre, kay ginsakaan mo ini!
5“Si Simeon kag si Levi mag-ulotod,
ginagamit nila ang ila mga hinganiban sa pagpamintas.
6Indi ako magbuylog sa ila tago nga mga plano,
indi ako magsimpon sa ila mga pagtilipon,
kay nagpatay sila sang mga tawo sa ila kaakig,
kag nagpamiang sila sang mga baka nga toro sa ila kalingawan.
7Pakamalauton ang ila kaakig, tungod kay tama ini kabangis,
kag ang ila kasingkal, tungod kay ini tama kapintas,
palaptahon ko sila sa bug-os nga duta sang Israel,
paalaplaagon ko sila sa mga Israelinhon.
8“Juda, ang imo mga utod magadayaw sa imo.
Ginakuga mo ang imo mga kaaway,
ang imo mga kautoran magasaludo sa imo.
9Si#Num. 24:9; Bug. 5:5. Juda kaangay sang isa ka leon.
Ginapatay niya ang iya tulokbon kag nagabalik sia sa iya palanaguan,
nagauntayan sia kag nagaluko,
kag wala sing may nagapangahas sa pagtublag sa iya.
10Si Juda magauyat sang harianon nga setro,
ang iya mga kaliwat magagahom sa gihapon.
Ang mga pungsod magahatag sa iya sing dulot
kag magasaludo sa pagtuman sa iya atubang.
11Ginahigot niya ang iya tinday nga asno sa balagon sang ubas,
sa pinakamaayo gid nga mga balagon,
ginalabhan niya ang iya mga bayu sa bino nga mapula subong sang dugo.
12Ang iya mga mata nagapula tungod sa pag-inom sang bino,
ang iya mga ngipon maputi sa pag-inom sang gatas.#49:12 Ang iya mga mata…gatas: ukonAng iya mga mata mas mapula sang sa bino, ang iya mga ngipon mas maputi sang sa gatas.
13“Si Zabulon magaestar sa higad sang dagat,
ang iya baybayon mangindungkaan sang mga sakayan,
ang iya duta magalambot tubtob sa Sidon.
14“Si Isacar indi maglabaw sang sa asno,
nga nagaluko sa tunga sang iya mga hampilo.
15Pero nakita niya nga ang palahuwayan maayo,
kag ang duta makaluluyag.
Gani, ginhanda niya ang iya abaga sa pagpas-an sang dalal-on,
kag ginpilit sia sa pag-obra subong isa ka ulipon.
16“Si Dan magagahom sa iya mga tawo.
Manginkaangay sila sang iban nga mga tribo sang Israel.
17Si Dan mangin-isa ka man-og sa higad sang dalan,
isa ka dalitan nga man-og sa higad sang banas,
nga nagabuntog sang tikod sang kabayo,
agod ang nagasakay mahulog nga nagatingkaya.
18“Nagahulat ako sa imo pagluwas, O Ginoo.
19“Si Gad pagasalakayon sang grupo sang mga kawatan,
pero pagabalusan niya kag lagson sila.
20“Ang duta ni Aser magapatubas sing manamit nga mga kalan-on.
Magapatubas sia sing kalan-on nga bagay sa hari.
21“Si Neftali isa ka usa nga nabuy-an,
nga nagabata sing matahom nga mga tinday.#49:21 Si Neftali isa…tinday: ukonSi Neftali isa ka magapa nga kahoy nga nagapananga sang matahom.
22“Si Jose kasubong sang isa ka asno nga talunon sa tupad sang tuboran,
talunon nga tinday sang asno sa kilid sang bakulod.#49:22 Si Jose…bakulod: ukonSi Jose kaangay sang kahoy sa tupad sang tuboran, mabungahon nga kahoy nga nagagapa sa may pader.
23Ang iya mga kaaway nagasalakay sa iya sing mapintas,
ginalagas nila sia nga may mga pana kag mga baslay.
24Pero ang iya pana nagapadayon nga mabakod,
kag ang iya mga butkon ginapabakod
sang gahom sang Gamhanan nga Dios ni Jacob,
sang Manugbantay sang karnero, ang Tagapangapin ni Israel.
25Ang Dios sang imo amay amo ang nagabulig sa imo,
ang Dios nga Makagagahom nga nagabendisyon sa imo,
sang mga bugay sang ulan halin sa ibabaw,
kag sang madalom nga mga tubig sa idalom sang duta,
mga kaayuhan halin sa madamo nga mga kasapatan kag mga kabataan,
26mga kaayuhan halin sa uyas kag mga bulak,
mga kaayuhan halin sa dumaan nga mga bukid.#49:26 Ang isa ka dumaan nga pagbadbaddumaan nga mga bukid; sa Hebreoakon mga katigulangan.
Mga butang nga nagahatag kalipay halin sa mga bakulod nga wala sing katapusan.
Kabay nga matungtong ini nga mga kaayuhan sa ulo ni Jose,
sa agtang sang isa nga napain sa iya mga utod.
27“Si Benjamin kasubong sang isa ka lobo nga nagapamatay,
adlaw kag gab-i nagapamatay sia kag nagapanukob.”
28Amo ini ang dose ka mga tribo sang Israel, kag amo ini ang ginsiling sang ila amay sa ila samtang nagahambal sia sang nagakabagay nga pamilinbilin sa tagsatagsa sa ila.
Ang Pagkapatay kag Paglubong kay Jacob
29Dayon si Jacob nagpamilinbilin sa iya mga anak nga lalaki, “Karon nga madali na lang ako mapatay kag magbuylog sa akon mga pariente, ilubong ako upod sa akon mga ginikanan sa kweba nga yara sa uma ni Efron nga Hethanon, 30sa#Gen. 23:3-20. Macpela, sa nasidlangan sang Mamre, sa duta sang Canaan. Si Abraham nagbakal sini nga kweba kag uma kay Efron nga Hethanon agod himuon nga lulobngan. 31Didto#Gen. 25:9-10; Gen. 35:29. nila ginlubong si Abraham kag ang iya asawa nga si Sara, si Isaac kag ang iya asawa nga si Rebeca, kag didto ginlubong ko si Lea. 32Ang uma kag ang kweba sa sini nga duta ginbakal sa mga Hethanon. Ilubong ninyo ako didto.” 33Sang#Bin. 7:15. makatapos si Jacob pamilinbilin sa iya mga anak, naghigda sia kag napatay.
Iliyochaguliwa sasa
Genesis 49: MBBHIL12
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Maayong Balita nga Biblia © Philippine Bible Society, 2012