Exodo 28
28
Ang mga Bayu para sa mga Pari
(Exo. 39:1-7)
1“Karon ipatawag mo si Aaron nga imo utod kag ang iya mga anak nga lalaki nga amo sanday Nadab, Abiu, Eleazar, kag Itamar. Painon mo sila halin sa mga tawo sang Israel, agod magaalagad sila sa akon subong mga pari. 2Himuan mo si Aaron nga imo utod sing mga bayu nga iya sang pari, nga may pagkahalangdon kag katahom. 3Singganon mo ang tanan nga mga mananahi nga ginhatagan ko sing abilidad sa pagpanahi, sa pagtahi sang mga bayu ni Aaron, agod mahalad sia sa pag-alagad sa akon subong nga pari. 4Amo ini nga mga bayu ang ila pagahimuon: hapin sa dughan, isa ka bestidora, isa ka sutana, isa ka binordahan nga bayu, isa ka turban, kag isa ka wagkos. Maghimo sila sing mga bayu nga iya sang pari para kay Aaron nga imo utod kag sa iya mga kaanakan nga mga lalaki, agod nga magaalagad sila sa akon subong nga mga pari. 5Ang mga mananahi maggamit sang bulawan nga hilo, asol, granate, kag pula nga delana, kag lino nga mapino.
6“Maghimo sila sang bestidora nga nahimo sa asol, granate, kag pula nga delana, bulawan nga hilo, kag mapino nga nagakunotkunot nga lino nga nabordahan. 7May duha ini ka terante nga sarang mahugot kag naangot ini sa naibabaw nga bahin sang bestidora. 8Ang paha nga hinabol sing matahom nahimo sa amo man nga mga materyal igaangot sa bestidora agod mangin-unay sa sini. 9Magkuha ka sing duha ka mga bato nga kornalina kag isinsil sa sini ang mga ngalan sang dose ka mga anak ni Jacob. 10Ang anom ka mga ngalan sa isa ka bato, kag anom pa gid sa isa ka bato, suno sa pag-alagisod sang ila pagkatawo. 11Sa abilidad sang platero ipasinsil mo sa duha ka mga bato ang mga ngalan sang mga anak ni Jacob, kag itakod mo ang mga bato sa mga balayan nga bulawan. 12Itakod mo ini sa duha ka mga terante sang bestidora sa pagpahanumdom sang dose ka mga tribo sang Israel. Sa sini nga paagi si Aaron magadala sa iya mga abaga sang ila mga ngalan, agod ako, ang Ginoo, magdumdom sa gihapon sang akon mga katawhan. 13Maghimo ka sing duha ka mga balayan nga bulawan, 14kag duha ka mga kulintas nga puraw nga bulawan nga linubag kaangay sang lubid, nga imo iangot sa mga balayan.
Ang Hapin sa Dughan
(Exo. 39:8-21)
15“Maghimo ka sing hapin sa dughan agod gamiton sang Pinakamataas nga Pari sa paghibalo sang akon kabubot-on. Bordahan mo ini sang mapino kaangay sang bestidora. Himuon mo ini sa bulawan, asol, granate, kag pula nga delana, bulawan nga hilo, kag mapino nga nagakunotkunot nga lino. 16Kinahanglan kwadrado ini kag doble sing pilo, siyam ka pulgada ang kalabaon, kag siyam ka pulgada ang kalaparon. 17Takdan mo ini sing apat ka kubay sang malahalon nga mga bato. Sa nahauna nga kubay, ibutang mo ang rubi, topasio, kag karbunklo; 18sa ikaduha nga kubay, esmeralda, sapiro, kag diamante; 19sa ikatlo nga kubay, mga hasinto, agate kag ametista; 20kag sa ikaapat nga kubay, berilo, kornalina, kag haspe, kag itakod mo ini sa mga balayan nga bulawan. 21May dose ka malahalon nga mga bato nga sa sini nasinsil ang mga ngalan sang mga anak ni Jacob. Pagaisinsil ini kaangay sang selyo, kag ang kada isa may ngalan nga nagatiglawas sang dose ka mga tribo sang Israel. 22Maghimo ka sang mga kulintas nga puraw nga bulawan nga linubag kaangay sang lubid para sa hapin sa dughan. 23Maghimo ka sing duha ka mga singsing nga bulawan kag iangot mo ini sa ibabaw nga mga pamusod sang hapin sa dughan. 24Itakod mo ang duha ka mga lubid nga bulawan sa duha ka mga singsing. 25Itakod mo ang duha ka punta sini sa duha ka mga balayan, kag sa sini nga paagi itakod mo sa mga terante, sa atubangan nayon sang bestidora. 26Dayon maghimo ka sing duha ka mga singsing nga bulawan kag itakod mo ini sa idalom nga mga pamusod sang hapin sa dughan, sa nasulod nayon nga sidsid sang bestidora. 27Maghimo ka pa gid sing duha ka mga singsing nga bulawan kag itakod mo ini sa idalom nga bahin sa atubangan nayon sang duha ka mga terante sang bestidora, malapit sa sidsid kag sa ibabaw nayon sang paha nga hinabol sing maayo. 28Higtan sing asol nga lubid ang mga singsing sang hapin sa dughan kag ang mga singsing sang bestidora, agod ang hapin sa dughan mahamtang sa ibabaw sang paha kag indi ini mapalos.
29“Kon magsulod si Aaron sa Balaan nga Duog isuksok niya ining hapin sa dughan nga nasinsilan sang mga ngalan sang mga tribo sang Israel, agod nga ako, ang Ginoo, magdumdom sa gihapon sang akon mga katawhan. 30Ibutang#Num. 27:21; Deut. 33:8; Esd. 2:63; Neh. 7:65. mo sa sulod sang hapin sa dughan ang Urim kag Tumim,#28:30 URIM KAG TUMIM: Duha ka mga butang nga ginagamit sang pari sa paghibalo sang kabubot-on sang Dios. Indi gid mapat-od kon paano ini gingamit. agod manginyara sila sa dughan ni Aaron kon sia magkadto sa akon balaan nga presensya. Sa sina nga mga tinion kinahanglan nga iya isuksok pirme ang hapin sa dughan agod iya mahibaluan ang akon kabubot-on para sa mga katawhan sang Israel.
Ang Iban nga mga Bayu sang mga Pari
(Exo. 39:22-31)
31“Maghimo ka sing sutana nga puro delana nga asol nga nagalabaw sa bestidora. 32Sa tunga sini butangan mo sing liab para sa ulo. Ang liab may aporo sa palibot nga hinabol, pareho sang liab sang kamesita nga panit, agod nga indi ini magisi. 33Sa#Sir. 45:9. iya sini naidalom nga sidsid himuan mo sing granada nga asol kag delana nga granate, kag pula sa palibot, nga ginabal-utan sang mga kampanilya nga bulawan, 34agod nga may mga nagaidas nga bulawan nga mga kampanilya kag mga granada sa palibot sang iya naidalom nga sidsid. 35Isuksok ini ni Aaron kon sia mag-alagad subong pari. Kon magsulod sia sa akon presensya sa Balaan nga Duog ukon kon maggwa sia, mabatian ang kilingkiling sang mga kampanilya kag indi sia mapatay.
36“Maghimo ka sing puni nga puraw nga bulawan, kag isinsil mo sa sini, ‘Nahalad sa Ginoo.’ 37Ihigot mo ini sa atubangan sang turban nga may asol nga lubid. 38Isuksok ini ni Aaron sa iya agtang, kag paagi sini makuha ang tanan nga mga kasal-anan nga nahimo sang bisan ano nga paghalad nga ginhalad sang mga tawo sang Israel sa akon. Isuksok ini pirme ni Aaron sa iya agtang, agod mahamuot ako sa mga halad.
39“Maghabol ka sing bayu ni Aaron nga nahimo sa lino nga mapino, kag maghimo ka sing turban nga lino nga mapino, kag isa man ka wagkos nga nabordahan.
40“Maghimo ka sing mga bayu, mga wagkos kag mga gora para sa mga anak nga lalaki ni Aaron, agod magahatag ini sa ila sang pagkahalangdon kag pagkatahom. 41Ipasuksok mo ini nga mga bayu sa imo utod nga si Aaron kag sa iya mga anak. Dayon imo sila ordinan kag ihalad paagi sa paghaplas sa ila sang lana sang olivo, agod mag-alagad sila sa akon subong nga mga pari. 42Himuan mo sila sing lino nga mga karsonsilyo, nga ang iya kalabaon halin sa hawak tubtob sa paa, agod nga indi sila mabihangan. 43Kinahanglan isuksok ini pirme ni Aaron kag sang iya mga anak nga lalaki kon sila magsulod sa Tolda sang akon presensya ukon magpalapit sila sa altar sa pag-alagad subong mga pari sa Balaan nga Duog, agod nga indi sila mabihangan kag mapatay. Amo ini ang pagsulondan nga wala sing katapusan para kay Aaron kag sa iya mga kaliwat.
Iliyochaguliwa sasa
Exodo 28: MBBHIL12
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Maayong Balita nga Biblia © Philippine Bible Society, 2012