Mga Binuhatan 23
23
1Gintulok ni Pablo sang tadlong ang mga katapo sang Konseho kag ginsingganan, “Mga utod ko! Kon nahanungod sa akon pagkabuhi, matinlo ang akon konsensya sa atubang sang Dios tubtob sa sini nga adlaw.” 2Ginsugo sang Pinakamataas nga Pari nga si Ananias ang mga nagatindog malapit kay Pablo nga dapalon sia. 3Nagsiling#Mat. 23:27-28. si Pablo sa iya, “Dapalon ka gid sang Dios, hipokrito! Nagapungko ka dira sa paghukom sa akon suno sa Kasugoan, pero ginalapas mo man ang Kasugoan sa imo pagsugo nga dapalon ako!”
4Ang mga tawo nga malapit kay Pablo nagsiling sa iya, “Ginainsultohan mo ang Pinakamataas nga Pari sang Dios!”
5Si#Exo. 22:28. Pablo nagsabat, “Wala ako makahibalo, mga utod, nga sia ang Pinakamataas nga Pari. Ang kasulatan nagasiling, ‘Indi ka maghambal sing malain batok sa nagagahom sang inyo mga tawo.’”
6Sang#Bin. 26:5; Fil. 3:5. makita ni Pablo nga may grupo sang mga Saduceo kag mga Fariseo nga nagatambong didto, nagsinggit sia sa mga katapo sang Konseho, “Mga utod! Isa ako ka Fariseo, anak sang mga Fariseo. Yari ako karon nga ginahukman tungod kay nagalaom ako nga may pagkabanhaw!”
7Sang mahambal niya ini, nagbinaisay ang mga Fariseo kag ang mga Saduceo, kag may pagbinahinbahin sa ila. (8Kay#Mat. 22:23; Mar. 12:18; Luc. 20:27. ang mga Saduceo nagasiling nga wala sing pagkabanhaw, kag wala sing mga anghel ukon mga espiritu, pero ang mga Fariseo nagapati sini tanan.) 9Dayon nagbaskog pa gid ang pagsininggit. May mga manunodlo sang Kasugoan nga mga katapo sang partido sang mga Fariseo nga nagtindog kag nagpamatok gid nga nagasiling: “Wala kami sing may makita nga sala sa sini nga tawo! Ayhan may nagpakighambal sa iya nga isa ka espiritu ukon isa ka anghel!”
10Nag-init pa gid ang pagbinaisay sa bagay nga hinadlukan ang kumander nga basi hulogniton nila si Pablo. Gani iya ginmanduan ang iya mga soldado nga magpanaog kag agawon si Pablo sa ila kag dalhon sia sa baraks.
11Sang madason nga gab-i nagtindog ang Ginoo sa tupad ni Pablo kag nagsiling, “Magpakaisog ka! Nagpanaksi ka sa akon diri sa Jerusalem, gani kinahanglan nga magpanaksi ka man sa Roma.”
Ang Plano sa Pagpatay kay Pablo
12Sang pagkaaga, nagtipon ang iban nga mga Judio kag nagplano sang ila pagahimuon. Nagpanumpa sila nga indi sila magkaon ukon mag-inom tubtob nga mapatay nila si Pablo. 13Sobra sila sa kwarenta nga ululupod nagplano. 14Sa tapos sini nagkadto sila sa pangulo nga mga pari kag sa mga katigulangan sang mga Judio kag nagsiling, “Nagpanumpa kami nga indi kami magkaon tubtob mapatay namon si Pablo. 15Gani kamo kag ang Konseho magpadala sing sulat sa kumander nga Romanhon nga ipadala si Pablo diri sa inyo, kag magpakunokuno kamo nga ang inyo tuyo amo ang pag-usisa sing maid-id nahanungod sa iya. Pero mahanda kami agod patyon namon sia sa wala pa sia makaabot diri.”
16Ugaling ang anak nga lalaki sang utod ni Pablo nga babayi nakabati sang ila plano. Gani nagkadto sia sa baraks kag ginsugiran niya sini si Pablo. 17Dayon gintawag ni Pablo ang isa sang mga opisyales kag nagsiling sia sa iya, “Dalha ini nga pamatan-on sa kumander, kay may inugsugid sia sa iya.” 18Gindala sang opisyal ang pamatan-on sa kumander kag nagsiling, “Gintawag ako sang binilanggo nga si Pablo kag nagpangabay sia nga dalhon ko ining pamatan-on sa imo, tungod kay may inugsugid sia sa imo.”
19Gin-uyatan sang kumander ang kamot sang pamatan-on kag gindala sia nga silahanon lang kag ginpamangkot, “Ano bala ang inugsugid mo sa akon?”
20Nagsabat ang pamatan-on, “Ginkaisahan sang mga pangulo sang mga Judio nga buas pangabayon ikaw nga dalhon si Pablo sa Konseho. Magapakunokuno ang Konseho nga ang ila tuyo amo ang pag-usisa pa gid sing maid-id nahanungod kay Pablo. 21Pero indi ka magpasugot sa ila tungod kay may sobra sa kwarenta ka mga tawo nga nagahukmong kag nagahulat sa pagpatay sa iya sa dalanon. Ini sila nagpanumpa nga indi magkaon ukon mag-inom tubtob nga mapatay nila si Pablo. Handa na sila kag nagahulat na lang sang imo pamat-od.”
22Nagsiling ang kumander, “Indi ka gid magpanugid kay bisan sin-o nga ginsugiran mo ako sini.” Kag ginpalakat niya ang pamatan-on.
Ginpadala si Pablo kay Gobernador Felix
23Sa gilayon ginpatawag sang kumander ang duha sang iya opisyales kag ginsingganan, “Ihanda ninyo ang 200 ka mga soldado sa pagkadto sa Cesarea. Dala man kamo sang setenta ka mga manugkabayo kag 200 ka mga soldado nga mga manugbangkaw, kag maghanda kamo sa paglakat sa mga alas nwebe karon nga gab-i. 24Dala man kamo sang mga kabayo nga pagasakyan ni Pablo kag dalha ninyo sia kay Gobernador Felix nga wala sang sablag. 25Dayon nagsulat ang kumander sining masunod:
26“Ako, si Claudio Lisias nagaabiabi sa imo Halangdon nga Gobernador Felix. 27Gindakop sang mga Judio ini nga tawo kag kuntani patyon nila sia. Nahibaluan ko nga isa sia ka banwahanon sang Roma, gani nagdala ako sang mga soldado kag gintabangan sia. 28Luyag ko mahibaluan kon ano ang ila panumbongon batok sa iya, gani gindala ko sia sa ila Konseho. 29Nausisaan ko nga wala sia sing may nahimo nga butang nga bagay patyon ukon bilangguon. Ang ila panumbongon batok sa iya may kaangtanan sa mga pamangkot nahanungod sa ila kaugalingon nga kasugoan. 30Kag sang ginsugiran ako nga nagplano ang mga Judio sa pagpatay sa iya, sa gilayon nagpamat-od ako nga ipadala sia sa imo. Ginsingganan ko ang mga nagsumbong sa iya nga dalhon nila sa imo ang ila panumbongon batok sa iya.”
31Gintuman sang mga soldado ang mga ginmando sa ila. Ginkuha kag gindala nila si Pablo sa sadto nga gab-i sa Antipatris. 32Sang madason nga adlaw ang mga soldado nga nagalakat lang nagbalik sa baraks, kag ginbilin nila ang mga soldado nga nagasakay sa kabayo sa pagpadayon sa pag-upod kay Pablo. 33Gindala nila sia sa Cesarea kag ginhatag nila ang sulat sa Gobernador kag gintugyan si Pablo sa iya. 34Ginbasa sang Gobernador ang sulat kag ginpamangkot niya si Pablo kon taga-diin sia nga probinsya. Sang mahibaluan niya nga taga-Cilicia si Pablo, 35nagsiling sia, “Bistahon ko ang imo kaso kon mag-abot ang mga nagsumbong sa imo.” Dayon nagmando sia nga didto ibutang si Pablo sa palasyo ni Herodes kag pabantayan.
Iliyochaguliwa sasa
Mga Binuhatan 23: MBBHIL12
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Maayong Balita nga Biblia © Philippine Bible Society, 2012
