Rom 3
3
1Ku na Judai ënɔɔnë, wär wɛ̈ɛ̈r en kɔc akuöc? Ku cuɛ̈l, piathdɛn bï bɛ̈ɛ̈i akou? 2Piathden adït në cök ëbɛ̈n. Ku cöök dït, kï, tɛ̈ɛ̈u cï wël ke Nhialic tääu ë Judai cin. 3Ku na ciɛk dɛ kɔc kɔ̈k kuc käŋ döt, eeŋö däŋ? Kuny kuc kek käŋ döt, bï ŋïny ŋicë Nhialic käŋ döt tɔ cïn naamde? 4#Diɛt 51:4 (LXX). Acï bï aa yen! Yeka, tɔ Nhialic ee yic, ciɛk an, ye raan ëbɛ̈n alueeth, acït man cï e gɔ̈ɔ̈r an:
“Luɔi bï yï tɔ piɛthpiɔ̈u në wël lueel,
Ku luɔi bï yïn kɔc tiaam të guiirë löŋdu.”
5Ku na rac de wopiɔ̈ɔ̈th, të cï en piath ë Nhialic piɔ̈u nyuɔɔth, buk ŋö lueel? Rac Nhialic, të cï en kɔc luöi këtuc ë agɔ̈th? (Yɛn jam cït man ë raan tei.) 6Acï bï aa yen! Të nu yen, ke Nhialic duëër löŋ de piny nɔm guiir adï?
7Të cï yic de Nhialic rɔt ŋuak në luenhdï, ago aa këde dhuëëŋde, eeŋö ŋootë löŋdï ke guiir, acä ciët raan ë kërac looi? 8Ku eeŋö cïï wok kërac ee looi, ke këpiɛth bï bɛ̈n? Cït man cï wo cäk thook, an, yok lueel, ku ye kɔc kɔ̈k ŋak an, Yok lueel. Kɔc luel en aröŋkï në gääk bï ke gɔ̈k.
Acïn Raan Piɛthpiɔ̈u
9Jɔ aa ŋö? Wärkï keek ë piath? Ei, acie yen! Wok ë kɔc kɔn nyuööth, Judai ayï Girikii, nɔn rëër kek ë këracic kedhie. 10#Diɛt 14:1-3 (LXX); Diɛt 53:1-3 (LXX). Acït man cï ë gɔ̈ɔ̈r, an,
“Acïn raan piɛthpiɔ̈u nu, acïn raan tök,
11Acïn raan ŋic käŋ, acïn raan ee Nhialic kɔɔr,
12Acïk röt yal wei kueer kedhie,
acïk aa kɔc baaŋ kedhie,
Acïn raan ë këpiɛth looi, acakaa raan tök aliu.
13 #
Diɛt 5:9 (LXX);
Diɛt 140:3. Rölden ee raŋ ɣɔ̈ɔ̈r nɔm,
Ayek jam ëruëëny ë keliëp,
Wurïï de karɛc anu ë kethook thïn,
14 #
Diɛt 10:7 (LXX). Acïk thook thiäŋ ë läm rac ku kɛcdepiɔ̈u,
15 #
Yith 59:7,8. Aŋickï kat arëët në lëu bï kek riɛm lëu,
16Riääk kekë mumdenɔm anukï ë kuɛɛrken yiic,
17Kueer ë mät acïk guɔ kuc,
18 #
Diɛt 36:1. Ayek nyïïn ciën riëëu de Nhialic.”
19Na ënɔɔnë, aŋicku, an, kë lueel löŋ, aye lɛ̈k kɔc rɛ̈ɛ̈r ë löŋic ke kɔc ë ke bï kethook ruɔɔt kedhie, ago piny nɔm ëbɛ̈n yiëk yeth gääk ë Nhialic nɔm. 20#Diɛt 143:2; Gal 2:16. Acïn raan töŋ bï tɔ piɛthpiɔ̈u ë yenɔm në luɔi de löŋ, ee löŋ yen ë bïï ŋïny de kërac.
Kueer ye Wo tɔ Piɛthpiɔ̈ɔ̈th ë Nhialic
21Ku ënɔɔnë piathëpiɔ̈u bɔ̈ tëde Nhialic acï tïc, ku liu löŋ thïn, ku löŋ kekë tït ayek cäätɔɔ në yen. 22#Gal 2:16. Yen aye piathëpiɔ̈u bɔ̈ tëde Nhialic në gäm de Yecu Kërtho, bï tëde kɔc kedhie, ku bï ë kɔc gup kedhie, kɔc gäm, ku acïn puny ee kɔc pɔ̈ɔ̈c yiic: 23kɔc acïk kërac wööc kedhie, ku dɛkï në dhuëëŋ de Nhialic. 24Ku aye ke tɔ piɛthpiɔ̈ɔ̈th youyou në dhuëëŋ de yenpiɔ̈u në wëër cï ke wɛ̈ɛ̈r bei ë Kërtho Yecu yic, 25raan cïï Nhialic tääu ë kɔc nïïm an, bï aa kë bï Nhialic luk, në gäm bï kɔc riɛmde gam. Kënë ee nyuöth nyooth en piath ë yenpiɔ̈u, ɣɔn pɛ̈l en karɛc cï looi thɛɛr, në liɛɛr ë yenpiɔ̈u, 26ku ye nyuöth nyooth en piath ë yenpiɔ̈u ënɔɔnë, nɔn ee yen bɛ̈ny ee löŋ tiiŋic,#3:25-26: në riɛmde; nɔn në thondɛn cï yen thou. ku ye bɛ̈ny ee raan gam Yecu tɔ piɛthpiɔ̈u ayadäŋ.
27Lɛc duëër raan rɔt leec akou ënɔɔnë? Aliu, aye nyai. Në löŋou? Në löŋ de luɔi? Acie yen, në löŋ de gäm, yen aa nyiɛɛiyë ye. 28Agoku jɔ lueel an, Raan aye tɔ piɛthpiɔ̈u në gäm, të liiuwë luɔi de löŋ thïn. 29Ku ye Nhialic de Judai kapäc? Cie Nhialic de Juöör ayadäŋ? Ɣɛɛ, ee këde Juöör ayadäŋ,
30 #
Nyöŋ 6:4; Gal 3:20. Luɔi ee yen Nhialic töŋë, Raan bï kɔc cï cueel tɔ piɛthpiɔ̈ɔ̈th në gäm, ku tɔ kɔc kënë cueel piɛthpiɔ̈ɔ̈th në gäm ayadäŋ. 31Ënɔɔnë, yok löŋ tɔ cïn naamde në gäm? Ei! Acie yen, wok tɔ löŋ kääc apiɛth.
Iliyochaguliwa sasa
Rom 3: dip-JPB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible in Jieeng de Padang © The Bible Society in South Sudan, 2011.
