Rom 16
16
Thiëc
1Wek lɛ̈k nyankënëda, raan ee ɣön ë Nhialic luööi ɣön ë Nhialic nu Kenkuria. 2An, bäk nyuööc ë baŋ de Bɛ̈nydït, ë nyuuc röŋ ke kɔc ɣerpiɔ̈ɔ̈th, ku bäk kony të de yen kë bï kɔɔr tëde week, ee raan cï kɔc juëc kony, ayïk ɛn ayadäŋ.
3 #
Luɔi 18:2. Thiëckï Pirithila kekë Akula kɔc luui wok ëtök ë Kërtho Yecu yic, 4kɔc cï wëiken kuɔɔn në baŋ de wëikï, ee kɔc aa yɔ̈ɔ̈k an, Thieithieei, ku acie yɛn a tök, ee ɣööt ke Nhialic ke Juöör kedhie ayadäŋ. 5Ku thiëckï ɣön ë Nhialic ee lɔ̈ŋ ɣönden ayadäŋ.
Thiëckï Epaineto raan nhiaar, raan cï Kërtho kɔn gam në Akaya. 6Thiëckï Meri, raan cï kajuëc looi në baŋda. 7Thiëckï Andoroniko ku Junia,#16:7: Junia; nɔn ee Juniath; këcïgɔ̈ɔ̈r däŋ ade yic Julia. kɔckuɔ, ku ye kɔc wään mɛc wok ëtök, kek kɔc de naamden në tuuc yiic, kɔc cï Kërtho kɔn gam ke ya ŋoot.
8Thiëckï Ampiliato raan nhiaar ë Bɛ̈nydïtic. 9Thiëckï Urbano raan ë luui wok ëtök ë Kërtho yic, kekë Thataku raan nhiaar. 10Thiëckï Apele raan cï leec ë Kërtho yic. Thiëckï kɔc ke baai de Arithobolo. 11Thiëckï Ɣerodion raanda. Thiëckï kɔc ke baai de Narkitho kɔc nu ë Bɛ̈nydïtic.
12Thiëckï Turupiana kekë Turupotha, kɔc ee luui ë Bɛ̈nydïtic. Thiëckï Perthith, raan nhiaar, raan ee luui arëët ë Bɛ̈nydïtic. 13#Mak 15:21. Thiëckï Rupo raan cï lɔc ë Bɛ̈nydïtic, kekë man ku ye maar ayadäŋ. 14Thiëckï Athunkiritho ku Pelogon, ku Ɣereme, ku Pataroba, ku Ɣerma, kekë mïthëkɔckuɔn rɛ̈ɛ̈r në keek. 15Thiëckï Pilolago ku Julia, ku Nereu kekë nyankënë, ku Olumpa, ku kɔc ɣerpiɔ̈ɔ̈th rɛ̈ɛ̈r në keek kedhie.
16Thiëckï röt wapäc në ciëm ɣeric. Wek thiëëc ɣööt ke Nhialic ke Kërtho kedhie.
Wëët Ciëën
17Ku wek yɔ̈ɔ̈k, wek mïthëkɔckuɔ, wɔikï kɔc ee kɔc pääk, kɔc ee kak ee kɔc tɔ wäc käŋ cak, kɔc ee wëët ë wëëtë week riɔ̈ɔ̈k, päkkï në keek. 18Kɔc cït keek acïkï Bɛ̈nydan Yecu Kërtho ee luööi, ee keyiic kek luuikï, ku ayek kɔc cïn piɔ̈ɔ̈th kërac math piɔ̈ɔ̈th në wël mit luelkï, ayï wëŋ ee kek kɔc wëŋ. 19Ku piŋ piɛŋ wek löŋ acï ɣet tëde kɔc kedhie. Aguɔ piɔ̈u miɛt në baŋdun, ku ënɔɔnë yɛn kɔɔr luɔi bä wek aa kɔc pelnïïm të lɔ këpiɛth, ku yak kɔc kuc käŋ të lɔ kërac. 20Ku Nhialic de mät abï Catan dap tɔ dum ë wecök piny.
Ë dhuëëŋ de Bɛ̈nydan Yecu Kërtho piɔ̈u ë ye tɔ̈u ke week. Amiin.
21 #
Luɔi 16:1. Wek thiëëc Timotheo raan luui wok ëtök, ayï Lukio ku Jathon ku Thothipataro, kɔckuɔ.
22Yɛn Tertio, raan ë gäär awerekë, wek thiëëc ë Bɛ̈nydïtic.
23 #
Luɔi 19:29; 1 Kor 1:14;
2Tim 4:20. Wek thiëëc Gayo raan cï a tɔ ye kaman, ku ye raan cï kɔc ke ɣön ë Nhialic tɔ ye kaman ëbɛ̈n. Wek thiëëc Erathato raan ë ka ke pänydït döt, kekë Kuarto mɛnhkënëda. 24Ë dhuëëŋ de Bɛ̈nydït Yecu Kërtho piɔ̈u ë ye tɔ̈u ke week wedhie. Amiin.#16:24: Këcïgäär däŋ ade yic cöök 24: Dhuëëŋ de Bɛ̈nydandït Yecu Kërtho abï tɔ̈u ke week wedhie. Amiin; kɔ̈k ayek ee kënë tääu në cöök 27 cök.
Lɔ̈ŋ Ciëën de Alɛɛc
25Ku ënɔɔnë, thieithieei ë Raan cath ke riɛl bï en we tɔ kääc aril në këde wëlkiën piɛth, ku guiëër cï Yecu Kërtho guiëër kɔc, ku nyuöth cï kë wään cï moony të ɣɔn ciɛkë piny nyuɔɔth. 26Ku acï tɔ tiëc ënɔɔnë, ku tɔ ŋic juöör ëbɛ̈n në kacïgɔ̈ɔ̈r ë tït, acït löŋ cïï Nhialic de pïïr athɛɛr lueel, bï kek wël aa piŋ ku gamkï ke.
27Nhialic de nɔm pɛl, yen etök, ë ye tɔ̈u ke dhuëëŋ aɣet athɛɛr në Yecu Kërtho. Amiin.
Iliyochaguliwa sasa
Rom 16: dip-JPB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible in Jieeng de Padang © The Bible Society in South Sudan, 2011.
