Rom 14
14
Du Raan Däŋ Gäk
1 #
Kol 2:16. Raan dɛk ë gäm, ke damkï, ku duökï wël ë tɛɛr në yen. 2Ŋɛk aye gäm luɔi duëër en cam ë këriëëc ëbɛ̈n, ku cäm ŋɛk ë wal tei, në kɔ̈c kɔ̈ɔ̈c en. 3Raan ee cam, ë cïï raan cie cam ë biɔɔn guöp, ku raan cie cam, ë cïï raan ë cam ee gɔ̈k, acïï Nhialic dɔm. 4Ee yïn ŋa, yïn raan ee lïm de raan däŋ gɔ̈k? Kɔ̈ɔ̈c kɛ̈ɛ̈c en, ku wïïk wïïk en, ee këde bɛ̈nyde guöp etök. Yeka, ku abï mɔ̈k nhial, Nhialic ade riɛl bï en tɔ kääc.
5Raan tök aye kööl tök riëëu awär kööl däŋ, ku lueel raan däŋ an, akööl akïtkï. Ë raan ëbɛ̈n ë ye këdäŋ ŋic ëgɔk ë yepiɔ̈u. 6Raan riëëu akööl, ee këde Bɛ̈nydït en a riëëu en en, ku raan cïï akööl ee riëëu, ee këde Bɛ̈nydït en acïï en en ee riëëu. Ku raan ee cam, ee cam në këde Bɛ̈nydït, ago lueel an, Thieithieei Nhialic, ku raan cie cam, ee këde Bɛ̈nydït en acïï en ee cam, ku lueel an, Thieithieei Nhialic. 7Ku acïn raan tök në wook, raan pïïr ë këde etök, ku acïn raan thou ë këde etök. 8Pïïr pïïr wok, ee këde Bɛ̈nydït en pïïr wok, ku thon thou wok, ee këde Bɛ̈nydït en thou wok, ayï të pïïr wok ayï të thou wok, wok ee kɔc ke Bɛ̈nydït. 9Ku yen aa thouwë Kërtho, ku jɔt rɔt be pïïr, luɔi bï en aa Bɛ̈nydïït ë kɔc cï thou ayï kɔc pïïr. 10#2 Kor 5:10. Ku yïn, eeŋö gɛ̈k yïn mɛnhkui? Ku eeŋö biɔɔn yïn mɛnhkui guöp aya? Wook wodhie, wo bï kɔ̈ɔ̈c ë thööny ë Kërtho nɔm, thööny ee löŋ guiir. 11#Yith 45:23 (LXX). Cït man cï ë gɔ̈ɔ̈r an,
“Alueel Bɛ̈nydït an,
Tën aa yɛn Nhialic pïïr, ke miɔɔl kedhie abï ke tuk ë Yanɔm.
Ku liëp kedhie abïk awɛ̈ɛ̈c gam ë Nhialic nɔm.”
12Yen ka, wook wodhie, ŋɛk abï këde yenguöp lɛ̈k Nhialic.
Du Kɔc Kɔ̈k tɔ Wiëëk
13Yen du wo röt ee bɛ gɔ̈k, aŋuän luɔi bï wok löŋë lueel ë wopiɔ̈ɔ̈th an, “Ë cïn raan ee këdäŋ tääu kueer, kë bï mɛnhkënë tɔ kɔ̈th, ayï kë bï e tɔ wiëëk. 14Cöök ŋiɛc kï, acä cök ë ŋiɛc ɛn en ëgɔk ë Bɛ̈nydït Yecu yic an, acïn kën ee rac etök, ku raan ë tɔ këdäŋ rac, ke jɔ rac tëde yen. 15Të cï mɛnhkui piɔ̈u diu në baŋ de rïïŋduön ë cuet, ke yïn cïï be rëër ë rëër ë nhiëër. Du raan riäk në rïïŋduön ë cuet, raan wään thouwë Kërtho në biäkde. 16Duökï piathdun ee tɔ lëkë kërac. 17Ciɛɛŋ de Nhialic acie cäm ku acie dëk, ee piathëpiɔ̈u, ku mät, ku piɔ̈nmit ë Wëidït ɣer yiic. 18Ku raan ë Kërtho luööi apiɛth ë kake yiic, ka piɛth ë Nhialic piɔ̈u, ku aye kɔc tɔ ye raan piɛth ayadäŋ.
19Yen ee wok ka ke mät cop ayï ka ke kuɛ̈t bï wok kueet. 20Du luɔi de Nhialic riäk në baŋ de rïŋ. Këriëëc ëbɛ̈n aɣeric tei, ku ee kërac tëde raan ë këdäŋ cam, ago käŋ wööc thïn. 21Apiɛth luɔi cïï yïn rïŋ bï aa cuet, ku luɔi cïï yïn mɔ̈u bï aa dek, ku luɔi cï yïn käŋ bï aa looi ëbɛ̈n, ka bï mɛnhkui tɔ wäc käŋ, ku ka bï e tɔ wiëëk, ku ka bï e tɔ kɔ̈c. 22De gäm cath ke yïn? Ë cath ke yïn yïtök ë Nhialic nyin. Thieithieei ë raan raan kën rɔt gɔ̈k në kë cï en rɔt päl luɔi. 23Ku raan ee piɔ̈u wïl ë kaamic, të ciëm en, aye jɔ̈ɔ̈ny, luɔi liiuwë gäm thïn, ku këriëëc ëbɛ̈n kë liiuwë gäm thïn, yen aye kërac.
Iliyochaguliwa sasa
Rom 14: dip-JPB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible in Jieeng de Padang © The Bible Society in South Sudan, 2011.
