ᐃᓯᑭᐁᓬ 20
20
1ᑭ ᐊᔨᐢᐸᔨᐤ ᒫᑲ ᑌᐸᑯᑊ ᐁ ᐊᑎ ᑕᐦᑐ ᐊᐢᑭᐊᐧᕽ, ᓂᔮᓇᐣ ᐱᓯᒼ ᐊᑎ, ᒥᑖᑕᐦᐟ ᐁ ᐃᑕᑭᒥᐦᐟ ᐱᓯᒼ, ᐋᑎᐦᐟ ᑳ ᓂᑳᓀᔨᑖᑯᓯᒋᐠ ᐃᐢᕒᐁᐃᓬ ᑭ ᐯ ᑲᑫᐧᒋᒣᐊᐧᐠ ᑳ ᑎᐯᔨᐦᒋᑫᔨᐟ, ᐁᑯᓯ ᓂ ᑭ ᐅᑎᐢᑲᐊᐧᐱᐢᑖᑲᐧᐠ. 2ᐅᐟ ᐃᑌᐧᐃᐧᐣ ᒫᑲ ᑳ ᑎᐯᔨᐦᒋᑫᐟ ᓂ ᑭ ᐅᑎᐦᑎᑯᐣ, ᐁ ᐃᑌᐧᐟ, 3ᐃᔨᓂᐃᐧᑯᓯᓵᐣ, ᑭᑐᓯᐠ ᑳ ᓂᑳᓀᔨᑖᑯᓯᒋᐠ ᐃᐢᕒᐁᐃᓬ ᒥᓇ ᐃᓯᐠ, ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ; ᑭ ᐯ ᓇᑕᐃᐧ ᑲᑫᐧᒋᒥᓈᐋᐧᐤ ᒋ? ᐁ ᐃᓯ ᐱᒫᑎᓯᔮᐣ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ, ᓇᒪᐃᐧᔭ ᓂ ᓇᑕᐁᐧᔨᑌᐣ ᑭᔭᐋᐧᐤ ᑭᑕ ᑲᑫᐧᒋᒥᔦᐠ. 4ᑭ ᑲ ᐅᔭᓱᐋᐧᑖᐊᐧᐠ ᒋ ᐃᔨᓂᐃᐧᑯᓯᓵᐣ, ᑭ ᑲ ᐅᔭᓱᐋᐧᑖᐊᐧᐠ ᒋ? ᑭᐢᑫᔨᑕᒧᐃᐠ ᑳ ᓭᓭᐢᑫᔨᑖᑲᐧᓂᔨᑭ ᐅᐟ ᐃᓯᐦᒋᑫᐃᐧᓂᔨᐊᐧ ᐅᑖᐃᐧᐋᐊᐧ:
5 #
ᐁᐠᓴᑕᐢ 6:2-8
ᐅᒥᓯ ᒫᑲ ᑭ ᑲ ᐃᑖᐊᐧᐠ, ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ; ᐊᓂᒪ ᐁ ᑭᓯᑳᐠ ᑳ ᑭ ᓇᐊᐧᓱᓇᐠ ᐃᐢᕒᐁᐃᓬ, ᒥᓇ ᑳ ᓱᐃᐧᓂᐢᑫᐢᑕᐊᐧᑭᐠ ᐅ ᓂᐦᑖᐃᐧᑭᐦᐋᑲᓇ ᐅ ᐋᐧᐢᑳᐦᐃᑲᓂᕽ ᒉᑲᑊ, ᒥᓇ ᑳ ᑭ ᑭᐢᑫᔨᑖᑯᐃᓱᐢᑕᐊᐧᑭᐠ ᐃᒋᑊᐟ ᐊᐢᑭᕽ, ᐃᐢᐱ ᑳ ᐅᐦᐱᓇᒪᐊᐧᑭᐠ ᓂᒋᐦᒋ ᐁ ᐃᑌᐧᔮᐣ, ᓂᔭ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒥᐋᐧᐤ; 6ᐁᐊᐧᑳᐧᓂᒪ ᐁ ᑭᓯᑳᐠ ᓂ ᑭ ᐅᐦᐱᓇᒪᐋᐧᐊᐧᐠ ᓂᒋᐦᒋ, ᑭᑕ ᐯ ᐊᐧᔭᐃᐧᑕᐊᑭᐠ ᐃᒋᑊᐟ ᐊᐢᑭᕽ ᐅᐦᒋ ᑭᑕ ᐃᑐᑕᐊᑭᐠ ᐊᐢᑭᕽ ᑳ ᑭ ᐊᐧᐁᐧᔮᐸᑕᒪᐊᐧᑭᐠ ᐁ ᐱᒥᒋᐊᐧᕽ ᑐᐦᑐᓵᐳ ᒥᓇ ᐋᒧᓯᓯᐹᐢᑲᐧᐟ, ᑳ ᐅᐦᒋ ᑭᐢᑌᔨᑖᑲᐧᐦᑭ ᑲᐦᑭᔭᐤ ᐊᐢᑭᔭ; 7ᓂ ᑭ ᐃᑖᐊᐧᐠ ᒫᑲ, ᑲᐦᑭᔭᐤ ᐊᔨᓯᔨᓂᐤ ᑭᑕ ᐁᐧᐱᓀᐤ ᑳ ᓭᓭᐢᑳᐱᓯᕽ, ᒥᓇ ᐁᑳᐃᐧᔭ ᐃᐧᓀᔨᑖᑯᐃᓱᐠ ᐃᒋᑊᐟ ᒪᓂᑐᑳᓇᐠ ᐅᐦᒋ; ᓂᔭ ᐁᐊᐧᑯ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒥᐋᐧᐤ. 8ᒫᑲ ᓂ ᑭ ᒫᔦᔨᒥᑲᐧᐠ ᒥᓇ ᓇᒪᐃᐧᔭ ᓂ ᐃᐧ ᓇᑐᐦᑖᑲᐧᐠ; ᓇᒪᐃᐧᔭ ᑲᐦᑭᔭᐤ ᐊᔨᓯᔨᓂᐤ ᐁᐧᐱᓀᐤ ᐊᓂᐦᐃ ᑳ ᓭᓭᐢᑳᐱᓯᕽ ᓇᒪᐃᐧᔭ ᒥᓇ ᐳᓂᐊᑐᐢᑲᐁᐧᐊᐧᐠ ᐃᒋᑊᐟ ᒪᓂᑐᑳᓇ; ᐁᑲᐧ ᓂ ᑭ ᐃᑖᐧᐣ ᑭᑕ ᑲᐧᔭᑯᓇᒪᐊᐧᑭᐠ ᓂᐟ ᐋᐦᑯᔭᐁᐧᓯᐃᐧᐣ, ᑭᑕ ᑎᐱᐸᔨᑐᐊᐧᑭᐠ ᓂ ᑭᓯᐋᐧᓯᐃᐧᐣ ᒣᑳᐧᐨ ᐃᒋᑊᐟ ᐊᐢᑭᕽ. 9ᒫᑲ ᓂ ᑭ ᐊᑐᐢᑳᐣ ᓂ ᐃᐧᔪᐃᐧᐣ ᐅᐦᒋ, ᐁᑳ ᑭᑕ ᐃᐧᓀᔨᑖᑯᑖᕽ ᐁ ᐃᓯ ᐋᐧᐸᐦᑕᒥᔨᐟ ᑳ ᐹᐱᑐᑕᐢᑳᓀᓯᔨᐟ ᐊᔨᓯᔨᓂᐊᐧ, ᒣᑳᐧᐨ ᐃᑕ ᑳ ᐊᔮᒋᐠ, ᐁ ᐋᐧᐸᐦᑕᒥᔨᐟ ᑳ ᑭ ᑭᐢᑫᔨᑖᑯᐃᓱᐢᑕᐊᐧᑭᐠ, ᐁ ᐯ ᐊᐧᔭᐃᐧᑕᐊᑭᐠ ᐃᒋᑊᐟ ᐊᐢᑭᕽ ᐅᐦᒋ.
10ᓂ ᑭ ᐊᐧᔭᐃᐧᑕᐦᐋᐊᐧᐠ ᒫᑲ ᐃᒋᑊᐟ ᐊᐢᑭᕽ ᐅᐦᒋ, ᒥᓇ ᐱᑲᐧᑕᐢᑭᕽ ᓂ ᑭ ᐯ ᐃᑐᑕᐋᐊᐧᐠ. 11#ᓬᐃᐱᑎᑲᐢ 18:5ᓂ ᑭ ᒥᔮᐊᐧᐠ ᒫᑲ ᓂ ᑲᑫᐢᑫᐧᐃᐧᓇ, ᒥᓇ ᓂ ᑭ ᐋᐧᐸᐦᑕᐋᐊᐧᐠ ᓄᔭᓱᐊᐧᓯᐁᐧᐃᐧᓇ, ᐁᐊᐧᑯᓂ ᑭᐢᐱᐣ ᐊᔨᓯᔨᓂᐤ ᐃᐦᑐᑕᑭ ᑭᑕ ᐅᐦᒋ ᐱᒫᑎᓯᐤ. 12#ᐁᐠᓴᑕᐢ 31:13-17ᐁᑯᓯ ᒥᓇ ᓂ ᑭ ᒥᔮᐊᐧᐠ ᓂᐟ ᐊᔦᐧᐱᐃᐧᑭᓯᑳᒪ, ᑭᑕ ᑭᐢᑭᓇᐋᐧᑌᔨᑖᑲᐧᐦᑭ ᓂᔭ ᐅᐦᒋ ᒥᓇ ᐃᐧᔭᐋᐧᐤ, ᑭᑕ ᑭᐢᑫᔨᑕᐦᑭᐠ ᓂᔭ ᑳ ᑎᐯᔨᐦᒋᑫᐟ ᑳ ᑲᓈᒋᐊᑭᐠ. 13ᒫᑲ ᐅ ᐋᐧᐢᑳᐦᐃᑲᐣ ᐃᐢᕒᐁᐃᓬ ᓂ ᑭ ᒫᔦᔨᒥᑲᐧᐠ ᐱᑲᐧᑕᐢᑭᕽ; ᓇᒪᐃᐧᔭ ᑭ ᒥᑎᒣᐊᐧᐠ ᓂ ᑲᑫᐢᑫᐧᐃᐧᓇ, ᒥᓇ ᑭ ᐋᑕᐁᐧᔨᑕᒪᐧᐠ ᓄᔭᓱᐋᐧᓯᐁᐧᐃᐧᓇ, ᐁᐊᐧᑯᓂ ᑭᐢᐱᐣ ᐊᔨᓯᔨᓂᐤ ᐃᐦᑐᑕᑭ ᑭᑕ ᐅᐦᒋ ᐱᒫᑎᓯᐟ; ᐁᑯᓯ ᓂᐟ ᐊᔦᐧᐱᐃᐧᑭᓯᑳᒪ ᒥᐢᑕᐦᐃ ᑭ ᐃᐧᓀᔨᑖᑯᑖᐊᐧᐠ; ᐁᑲᐧ ᓂ ᑭ ᐃᑖᐧᐣ ᑭᑕ ᑲᐧᔭᑯᓇᒪᐊᐧᑭᐠ ᓂᐟ ᐊᐦᑯᔭᐁᐧᓯᐃᐧᐣ ᐱᑲᐧᑕᐢᑭᕽ, ᑭᑕ ᒣᐦᒋᐊᑭᐠ. 14ᒫᑲ ᓂ ᑭ ᐊᑐᐢᑳᐣ ᓂ ᐃᐧᔪᐃᐧᐣ ᐅᐦᒋ, ᐁᑳ ᑭᑕ ᐃᐧᓀᔨᑖᑯᑖᕽ ᐁ ᐃᓯ ᐋᐧᐸᐦᑕᒥᔨᐟ ᑳ ᐹᐱᑐᑕᐢᑳᓀᓯᔨᐟ ᐊᔨᓯᔨᓂᐊᐧ, ᐁ ᐋᐧᐸᐦᑕᒥᔨᐟ ᑳ ᑭ ᐊᐧᔭᐃᐧᑕᐊᑭᐠ. 15#ᓇᒼᐸᕒᐢ 14:26-35ᐁᑯᓯ ᒥᓇ ᓂ ᑭ ᐅᐦᐱᓇᒪᐋᐧᐊᐧᐠ ᓂᒋᐦᒋ ᐱᑲᐧᑕᐢᑭᕽ, ᐁᑳ ᑭᑕ ᐯᓯᐊᐧᑭᐠ ᐊᐢᑭᕽ ᑳ ᑭ ᒥᔭᑭᐠ, ᑳ ᐱᒥᒋᐊᐧᕽ ᑐᐦᑐᓵᐳ ᒥᓇ ᐋᒧᓯᓯᐹᐢᑲᐧᐟ, ᑳ ᐅᐦᒋ ᑭᐢᑌᔨᑖᑲᐧᐦᑭ ᑲᐦᑭᔭᐤ ᐊᐢᑭᔭ; 16ᒋᑫᒫ ᑭ ᐋᑕᐁᐧᔨᑕᒪᐧᐠ ᓄᔭᓱᐋᓯᐁᐧᐃᐧᓇ, ᒥᓇ ᓇᒪᐃᐧᔭ ᑭ ᒥᑎᒣᐊᐧᐠ ᓂ ᑲᑫᐢᑫᐧᐃᐧᓇ, ᒥᓇ ᑭ ᐃᐧᓀᔨᑖᑯᑖᐊᐧᐠ ᓂᐟ ᐊᔦᐧᐱᐃᐧᑭᓯᑳᒪ; ᒋᑫᒫ ᐅᑌᐦᐃᐋᐧᕽ ᑭ ᐱᒥᑎᓴᐁᐧᐊᐧᐠ ᐅ ᒪᓂᑐᑳᓂᐋᐧᐊᐧ. 17ᒫᑲ ᐁᔨᐁᐧᕽ ᓂ ᑭ ᑭᑎᒫᑭᓇᐋᐧᐊᐧᐠ ᐁᑳ ᑭᑕ ᓂᓯᐊᐧᓈᒋᐦᐊᑭᐠ, ᓇᒪᐃᐧᔭ ᒫᑲ ᒥᑐᓂ ᓂ ᑭ ᑭᓯᐱᐸᔨᐋᐊᐧᐠ ᐱᑲᐧᑕᐢᑭᕽ.
18ᓂ ᑭ ᐃᑎᒫᐊᐧ ᒫᑲ ᐅᐟ ᐊᐋᐧᓯᒥᓯᐋᐧᐊᐧ ᐱᑲᐧᑕᐢᑭᕽ, ᐁᑳᐃᐧᔭ ᒥᑎᒣᐋᐧᕽ ᐅ ᑲᑫᐢᑫᐧᐃᐧᓂᐋᐧᐊᐧ ᑯᑖᐃᐧᐋᐧᐊᐧᐠ, ᒥᓇ ᐁᑳᐃᐧᔭ ᓈᑲᑌᔨᑕᒫᐧᕽ ᐅᔭᓱᐋᐧᓯᐁᐧᐃᐧᓂᐋᐧᐊᐧ ᒥᓇ ᐁᑳᐃᐧᔭ ᐃᐧᓀᔨᑖᑯᐃᓱᐠ ᐅ ᒪᓂᑐᑳᓂᐋᐧᐊᐧ ᐅᐦᒋ; 19ᓂᔭ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒥᐋᐧᐤ; ᒥᑎᒣᐠ ᓂ ᑲᑫᐢᑫᐧᐃᐧᓇ, ᒥᓇ ᑲᓇᐁᐧᔨᑕᒧᐠ ᓄᔭᓱᐋᐧᓯᐁᐧᐃᐧᓇ, ᒥᓇ ᐃᑐᑕᒧᐠ; 20ᒥᓇ ᑲᓈᒋᐦᑖᐠ ᓂᐟ ᐊᔦᐧᐱᐃᐧᑭᓯᑳᒪ; ᐁᑯᓯ ᐁᐊᐧᑯᓂ ᑭᑕ ᑭᐢᑭᓇᐋᐧᑌᔨᑖᑲᐧᓇᐧ ᓂᔭ ᐅᐦᒋ ᒥᓇ ᑭᔭᐋᐧᐤ, ᑭᑕ ᑭᐢᑫᔨᑕᒣᐠ ᓂᔭ ᐁᐊᐧᑯ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒥᐋᐧᐤ. 21ᒫᑲ ᐊᓂᑭ ᐊᐊᐧᓯᓴᐠ ᓂ ᑭ ᒫᔦᔨᒥᑲᐧᐠ; ᓇᒪᐃᐧᔭ ᑭ ᒥᑎᒣᐊᐧᐠ ᓂ ᑲᑫᐢᑫᐧᐃᐧᓇ, ᓇᒪᐃᐧᔭ ᒥᓇ ᑲᓇᐁᐧᔨᑕᒪᐧᐠ ᓄᔭᓱᐋᐧᓯᐁᐧᐃᐧᓇ ᑭᑕ ᑐᑕᐦᑭᐠ, ᐁᐊᐧᑯᓂ ᑭᐢᐱᐣ ᐊᔨᓯᔨᓂᐤ ᐃᐦᑐᑕᑭ, ᑭᑕ ᐅᐦᒋ ᐱᒫᑎᓯᐟ; ᑭ ᐃᐧᓀᔨᑖᑯᑖᐊᐧᐠ ᓂᐟ ᐊᔦᐧᐱᐃᐧᑭᓯᑳᒪ; ᐁᑲᐧ ᓂ ᑭ ᐃᑖᐧᐣ ᑭᑕ ᑲᐧᔭᑯᓇᒪᐊᐧᑭᐠ ᓂᐟ ᐋᐦᑯᔭᐁᐧᓯᐃᐧᐣ, ᑭᑕ ᑎᐱᐸᔨᑐᐊᐧᑭᐠ ᓂ ᑭᓯᐋᐧᓯᐃᐧᐣ ᐁᑯᑕ ᐱᑲᐧᑕᐢᑭᕽ. 22ᒫᑲ ᐁᔨᐁᐧᕽ ᓂ ᑭ ᐅᒋᓂᐢᑫᔨᐣ, ᒥᓇ ᓂ ᑭ ᐊᑐᐢᑳᐣ ᓂ ᐃᐧᔪᐃᐧᐣ ᐅᐦᒋ, ᐁᑳ ᑭᑕ ᐃᐧᓀᔨᑖᑯᑖᕽ ᐁ ᐃᓯ ᐋᐧᐸᐦᑕᒥᔨᐟ ᑳ ᐹᐱᑐᑕᐢᑳᓀᓯᔨᐟ ᐊᔨᓯᔨᓂᐊᐧ, ᐁ ᐋᐧᐸᐦᑕᒥᔨᐟ ᑳ ᑭ ᐯ ᐊᐧᔭᐃᐧᑕᐊᑭᐠ. 23#ᓬᐃᐱᑎᑲᐢ 26:33ᐁᑯᓯ ᒥᓇ ᓂ ᑭ ᐅᐦᐱᓇᒪᐋᐧᐊᐧᐠ ᓂᒋᐦᒋ ᐱᑲᐧᑕᐢᑭᕽ, ᑭᑕ ᓯᓭᐧᑎᓴᐊᐧᑭᐠ ᓇᓈᑐᑯᐢᑳᓀᓯᓈᕽ, ᒥᓇ ᑭᑕ ᐱᐁᐧᑎᓴᐊᐧᑭᐠ ᐹᐱᑐᐢ ᐊᐢᑭᕽ; 24ᒋᑫᒫ ᐁᑳ ᐁ ᑭ ᐅᐦᒋ ᐃᑐᑕᐦᑭᐠ ᓄᔭᓱᐋᐧᓯᐁᐧᐃᐧᓇ, ᒫᑲ ᐁ ᑭ ᐋᑕᐁᐧᔨᑕᐦᑭᐠ ᓂ ᑲᑫᐢᑫᐧᐃᐧᓇ, ᐁᑯᓯ ᐁ ᑭ ᐃᐧᓀᔨᑖᑯᑖᒋᐠ ᓂᐟ ᐊᔦᐧᐱᐃᐧᑭᓯᑳᒪ, ᒥᓇ ᐁ ᒧᐢᑕᐃᐧᓇᐋᐧᒋᐠ ᐅᑖᐃᐧᐋᐧᐊᐧ ᐅ ᒪᓂᑐᑳᓂᔨᐊᐧ. 25ᐁᑯᓯ ᒥᓇ ᓂ ᑭ ᒥᔮᐊᐧᐠ ᑲᑫᐢᑫᐧᐃᐧᓇ ᐁᑳ ᐁ ᒥᔮᐧᓯᓂᔨᑭ, ᒥᓇ ᐅᔭᓱᐋᐧᓯᐁᐧᐃᐧᓇ ᐁᑳ ᑭᑕ ᑭ ᐅᐦᒋ ᐱᒫᑎᓯᒋᐠ; 26ᒥᓇ ᓂ ᑭ ᐃᐧᓀᔨᑖᑯᐋᐊᐧᐠ ᐃᐧᔭᐋᐧᐤ ᐅ ᒣᑭᐃᐧᓂᐋᐧᕽ, ᐊᓂᒪ ᐃᐢᑯᑌᕽ ᐁ ᓵᐳᑕᐋᒋᐠ ᑲᐦᑭᔭᐤ ᓂᐢᑕᒼ ᓂᐦᑖᐃᐧᑭᐦᐋᑲᓇ, ᑭᑕ ᑭᐋᐧᑌᔨᑕᒥᐊᑭᐠ, ᑭᑕ ᐅᐦᒋ ᑭᐢᑫᔨᑕᐦᑭᐠ ᓂᔭ ᐁᐊᐧᑯ ᑳ ᑎᐯᔨᐦᒋᑫᐟ.
27ᐁᐊᐧᑯ ᐅᐦᒋ ᐃᔨᓂᐃᐧᑯᓯᓵᐣ, ᑭᑐᓯᐠ ᐅ ᐋᐧᐢᑳᐦᐃᑲᓂᕽ ᐃᐢᕒᐁᐃᓬ, ᒥᓇ ᐃᓯᐠ, ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ; ᐁᑯᑕ ᐅᒪ ᒥᓇ ᑯᑕᐃᐧᐋᐧᐊᐧᐠ ᓂ ᑭ ᐹᐢᑖᒧᐃᐧᑲᑖᑲᐧᐠ, ᐊᓂᒪ ᐁ ᑭ ᐃᓯ ᐊᐧᓂᑐᑕᐃᐧᒋᐠ. 28ᒋᑫᒫ ᐃᐢᐱ ᑳ ᐯ ᐃᑐᑕᐊᑭᐠ ᐊᐢᑭᕽ ᐊᓂᒪ ᑳ ᑭ ᐅᐦᐱᓇᒪᐊᐧᑭᐠ ᓂᒋᐦᒋ ᑭᑕ ᒥᔭᑭᐠ, ᐁᑲᐧ ᑭ ᐋᐧᐸᐦᑕᒪᐧᐠ ᑳ ᑕᐦᑐ ᒑᑲᑎᓈᐠ, ᒥᓇ ᑲᐦᑭᔭᐤ ᑳ ᐱᑫᐧᐸᑭᔨᐟ ᒥᐢᑎᑲᐧ, ᐁᑯᑕ ᒫᑲ ᑭ ᐸᑭᑎᓇᒪᐧᐠ ᐅ ᒪᒍᐢᑌᐦᐊᒫᑫᐃᐧᓂᐋᐧᐊᐧ, ᒥᓇ ᐁᑯᑕ ᑭ ᒣᑭᐊᐧᐠ ᑳ ᐅᐦᒋ ᑭᓯᐋᐧᑖᐧᒋᐠ ᐅ ᐸᑭᑎᓈᓱᐃᐧᓂᐋᐧᐤ, ᐁᑯᑕ ᒥᓇ ᑭ ᐃᐧᑭᒫᓯᑫᐊᐧᐠ, ᒥᓇ ᑭ ᓯᑭᓇᒪᐧᐠ ᐅ ᒥᓂᐦᑫᐧᐃᐧ ᐸᑭᑎᓈᓱᐃᐧᓂᐋᐧᐊᐧ. 29ᐁᑲᐧ ᓂ ᑭ ᐃᑖᐊᐧᐠ, ᑖᓂᓯ ᐅᒪ ᐁᑖᐧᑌᐠ ᑳ ᐃᐢᐹᐠ ᐃᑕ ᑳ ᐃᑐᐦᑌᔦᐠ? ᐁᑯᓯ ᐁᐊᐧᑳᐧᓂᒪ ᑭ ᐃᓯᔨᐦᑳᑌᐤ ᐹᒪ ᐱᔨᐢ ᐊᓄᐦᐨ ᑳ ᑭᓯᑳᐠ.
30ᐁᑯᓯ ᒫᑲ ᐃᓯᐠ ᐅ ᐋᐧᐢᑳᐦᐃᑲᓂᕽ ᐃᐢᕒᐁᐃᓬ, ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ; ᑭ ᐃᐧᓀᔨᑖᑯᐃᓱᓈᐋᐧᐤ ᒋ ᑳ ᑭ ᐃᐦᑐᑕᑭᐠ ᑯᑖᐃᐧᐋᐧᐊᐧᐠ? ᒥᓇ ᑭ ᓇᑕᐃᐧ ᐱᓯᑳᐧᑎᓯᑐᑕᒫᐧᓈᐋᐧᐤ ᒋ ᑳ ᓭᓭᐢᑫᔨᑖᑲᐧᓂᔨᑭ ᐅᐟ ᐃᓯᐦᒋᑫᐃᐧᓂᐋᐧᐊᐧ? 31ᐃᐢᐱ ᒫᑲ ᐸᑭᑎᓇᒣᑯ ᑭ ᒣᑭᐃᐧᓂᐋᐧᐊᐧ, ᐃᐢᐱ ᓯᔮᐳᑕᐋᔦᑳᐧᐃᐧ ᑭᑯᓯᓯᐋᐧᐊᐧᐠ ᐃᐢᑯᑌᕽ, ᑭ ᐃᐧᓀᔨᑖᑯᐃᓱᓈᐋᐧᐤ ᒋ ᑲᐦᑭᔭᐤ ᑭ ᒪᓂᑐᑳᓂᐋᐧᐊᐧᐠ ᐅᐦᒋ, ᐱᔨᐢ ᐊᓄᐦᐨ ᑳ ᑭᓯᑳᐠ? ᑭ ᑲ ᑲᑫᐧᒋᒥᓈᐋᐧᐤ ᒋ ᒫᑲ, ᑭᔭᐋᐧᐤ ᐅ ᐋᐧᐢᑲᐦᐃᑲᓂᕽ ᐃᐢᕒᐁᐃᓬ? ᐁ ᐃᓯ ᐱᒫᑎᓯᔮᐣ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ, ᓇᒪᐃᐧᔭ ᓂ ᓄᐦᑌ ᑲᑫᐧᒋᒥᑯᓯᐣ ᑭᔭᐋᐧᐤ ᐅᐦᒋ; 32ᐊᓂᒪ ᒫᑲ ᑳ ᐱᐦᑐᑫᒪᑲᕽ ᑭ ᒥᑐᓀᔨᒋᑲᓂᐋᐧᕽ ᓇᒪᐃᐧᔭ ᑭᑕ ᐃᐦᑭᐣ ᐊᓂᒪ ᑳ ᐃᑌᐧᔦᐠ, ᓂ ᑲ ᐃᓯ ᐊᔮᓈᐣ ᑖᐱᐢᑯᐨ ᑳ ᐹᐱᑐᑕᐢᑳᓀᓯᒋᐠ, ᑖᐱᐢᑯᐨ ᑳ ᑕᐦᑐᑌᐃᐧᓯᒋᐠ ᐱᑐᐢ ᐊᐢᑭᕽ, ᑭᑕ ᐊᑐᐢᑫᐢᑕᒫᕽ ᒥᐢᑎᐠ ᒥᓇ ᐊᓯᓂ.
33ᐁ ᐃᓯ ᐱᒫᑎᓯᔮᐣ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ, ᑫᐦᒋᓈ ᐁ ᒪᐢᑲᐃᐧᒋᐦᒉᔮᐣ, ᒥᓇ ᐁ ᓱᐃᐧᓂᐢᑫᔮᐣ, ᒥᓇ ᐋᐦᑯᔭᐁᐧᓯᐃᐧᐣ ᐁ ᑲᐧᔭᑯᓇᒫᐣ, ᑭ ᑲ ᑭᐦᒋ ᐅᑭᒫᑲᑖᑎᓈᐋᐧᐤ; 34ᑭ ᑲ ᐯ ᐊᐧᔭᐃᐧᑕᐦᐃᑎᓈᐋᐧᐤ ᒫᑲ ᐊᔨᓯᔨᓂᓈᕽ ᐅᐦᒋ, ᒥᓇ ᑭ ᑲ ᒫᐊᐧᓴᑯᓂᑎᓈᐋᐧᐤ ᐊᐢᑭᕽ ᐅᐦᒋ ᐃᑌ ᑳ ᑭ ᓯᓭᐧᐢᑳᔦᐠ, ᐁ ᒪᐢᑲᐃᐧᒋᐦᒉᔮᐣ, ᒥᓇ ᐁ ᓱᐃᐧᓂᐢᑫᔮᐣ, ᒥᓇ ᐋᐦᑯᔭᐁᐧᓯᐃᐧᐣ ᐁ ᑲᐧᔭᑯᓇᒫᐣ; 35ᐁᑯᓯ ᐅ ᐱᑲᐧᑕᐢᑭᒥᐋᐧᕽ ᐹᐱᑐᐢ ᐊᔨᓯᔨᓂᐊᐧᐠ ᑭ ᑲ ᐃᑐᑕᐃᑎᓈᐋᐧᐤ, ᐁᑯᑕ ᒫᑲ ᑭᑳᐧᑲᓂᐋᐧᕽ ᑭ ᑲ ᑭᑐᑎᑎᓈᐋᐧᐤ. 36ᑖᐱᐢᑯᐨ ᑳ ᑭ ᐃᓯ ᑭᑐᑕᑭᐠ ᑯᑖᐃᐧᐋᐧᐊᐧᐠ ᐁ ᐱᑲᐧᑕᐢᑭᐊᐧᕽ ᐃᒋᑊᐟ ᐊᐢᑭ, ᐁᑯᓯ ᑫ ᐃᓯ ᑭᑐᑎᑕᑯᐠ, ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ. 37ᑭ ᑲ ᓯᐹᑕᐃᑎᓈᐋᐧᐤ ᒫᑲ ᐸᑲᒫᑲᓈᑎᑯᕽ, ᐁᑯᓯ ᑭ ᑲ ᐃᑐᑕᐃᑎᓈᐋᐧᐤ ᐃᐧᒋᐦᐃᓯᒋᑫᒥᑐᐃᐧ ᒥᒋᒪᐱᓱᐃᐧᓂᕽ; 38ᓂ ᑲ ᐊᐧᔭᐃᐧᔮᐹᐊᐧᔮᐊᐧᐠ ᒫᑲ ᐃᑕ ᑳ ᐊᔮᔦᐠ ᐅᐦᒋ ᐊᓂᑭ ᑳ ᒫᔭᑲᒥᑭᓯᒋᐠ, ᒥᓇ ᐊᓂᑭ ᑳ ᐊᐧᓂᑐᑕᐃᐧᒋᐠ; ᓂ ᑲ ᐊᐧᔭᐃᐧᑕᐦᐋᐊᐧᐠ ᐊᐢᑭᕽ ᐅᐦᒋ ᐃᑕ ᑳ ᐊᔮᒋᐠ ᒫᑲ ᓇᒪᐃᐧᔭ ᑭᑕ ᐱᐦᑐᑫᐊᐧᐠ ᐃᐢᕒᐁᐃᓬ ᐊᐢᑭᕽ; ᐁᑯᓯ ᑭ ᑲ ᑭᐢᑫᔨᑌᓈᐋᐧᐤ ᓂᔭ ᐁᐊᐧᑯ ᑳ ᑎᐯᔨᐦᒋᑫᐟ. 39ᒫᑲ ᐃᐧᔭ ᑭᔭᐋᐧᐤ ᐅ ᐋᐧᐢᑳᐦᐃᑲᐣ ᐃᐢᕒᐁᐃᓬ, ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ; ᓯᐯᐧᑌᐠ, ᓇᑕᐃᐧ ᐊᑐᐢᑳᑯᐠ ᑳ ᐃᑕᓯᔦᐠ ᑭ ᒪᓂᑐᑳᓂᐋᐧᐊᐧᐠ, ᒥᓇ ᐹᑎᒫ, ᑭᐢᐱᐣ ᐁᑳ ᐋᐧ ᓇᑐᐦᑕᐃᐧᐁᐧᑫᐧ; ᒫᑲ ᐁᑳᐃᐧᔭ ᐁᑲᐧ ᐃᐧᓀᔨᑖᑯᑖᐠ ᑳ ᑲᓈᑖᕽ ᓂ ᐃᐧᔪᐃᐧᐣ ᑭ ᒣᑭᐃᐧᓂᐋᐧᐊᐧ ᐅᐦᒋ, ᒥᓇ ᑭ ᒪᓂᑐᑳᓂᐋᐧᐊᐧᐠ.
40ᒋᑫᒫ ᐊᓂᑕ ᑳ ᑲᓈᑕᕽ ᓂ ᐊᐧᒋᒼ, ᐊᐧᒋᕽ ᑳ ᐃᐢᐸᐠ ᐃᐢᕒᐁᐃᓬᐃᕽ, ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ, ᐁᑯᑕ ᑲᐦᑭᔭᐤ ᐅ ᐋᐧᐢᑳᐦᐃᑲᐣ ᐃᐢᕒᐁᐃᓬ, ᑲᐦᑭᔭᐤ ᐁ ᐃᐦᑕᓯᒋᐠ, ᓂ ᑲ ᐊᑐᐢᑳᑲᐧᐠ ᐁᑯᑕ ᐊᐢᑭᕽ; ᐁᑯᑕ ᓂ ᑲ ᐅᑎᓈᐊᐧᐠ, ᐁᑯᑕ ᒫᑲ ᓂ ᑲ ᓇᑕᐁᐧᔨᑌᐣ ᑭ ᐸᑭᑎᓈᓱᐃᐧᓂᐋᐧᐊᐧ, ᒥᓇ ᑳ ᓂᐢᑕᒥᑭᐦᑭ ᑭ ᒣᑭᐃᐧᓂᐋᐧᐊᐧ, ᑭᑭ ᑲᐦᑭᔭᐤ ᑳ ᑲᓈᑕᑭ ᑳ ᐊᔮᔦᐠ. 41ᑖᐱᐢᑯᐨ ᐃᐧᑭᒫᓯᑲᐣ ᑭ ᑲ ᐃᓯ ᐅᑎᓂᑎᓈᐋᐧᐤ, ᐃᐢᐱ ᐯᓯᑕᑳᐧᐃᐧ ᐊᔨᓯᔨᓂᓈᕽ ᐅᐦᒋ, ᒥᓇ ᒫᐊᐧᒋᐦᐃᑕᑳᐧᐃᐧ ᐹᐱᑐᐢ ᐊᐢᑭᕽ ᐅᐦᒋ ᐃᑌ ᑳ ᑭ ᓯᓭᐧᑎᓴᐅᑲᐃᐧᔦᐠ; ᑭᔭᐋᐧᐤ ᒫᑲ ᐅᐦᒋ ᓂ ᑲ ᑲᓈᑌᔨᒥᑲᐃᐧᐣ ᐁ ᐃᓯ ᐋᐧᐸᐦᑕᐦᑭᐠ ᑳ ᓇᓈᑐᑯᐢᑳᓀᓯᒋᐠ ᐊᔨᓯᔨᓂᐊᐧᐠ. 42ᑭ ᑲ ᑭᐢᑫᔨᑌᓈᐋᐧᐤ ᒫᑲ ᓂᔭ ᐁᐊᐧᑯ ᑳ ᑎᐯᔨᐦᒋᑫᐟ, ᐃᐢᐱ ᐯ ᐃᑐᑕᐃᑕᑳᐧᐃᐧ ᐃᐢᕒᐁᐃᓬ ᐊᐢᑭᕽ, ᐊᓂᒪ ᐊᐢᑭ ᑳ ᑭ ᐅᐦᒋ ᐅᐦᐱᓂᒫᐣ ᓂᒋᐦᒋ ᑭᑕ ᒥᔭᑭᐠ ᑯᑖᐃᐧᐋᐧᐊᐧᐠ. 43ᐁᑯᑕ ᒫᑲ ᑫ ᑭᐢᑭᓯᔦᐠ ᑭᐟ ᐃᓯᐦᒋᑫᐃᐧᓂᐋᐧᐊᐧ, ᒥᓇ ᑲᐦᑭᔭᐤ ᑭᐟ ᐃᑐᑕᒧᐃᐧᓂᐋᐧᐊᐧ, ᑲ ᑭ ᐅᐦᒋ ᐃᐧᓀᔨᑖᑯᐃᓱᔦᐠ; ᑭ ᑲ ᐸᑳᐧᑎᓱᓈᐋᐧᐤ ᒫᑲ ᐁ ᐃᓯ ᐋᐧᐸᐦᑕᒣᐠ ᑲᐦᑭᔭᐤ ᒪᒋᑫᑲᐧᐩ ᑳ ᑭ ᑐᑕᒣᐠ. 44ᑭ ᑲ ᑭᐢᑫᔨᑌᓈᐋᐧᐤ ᒫᑲ ᓂᔭ ᐁᐊᐧᑯ ᑳ ᑎᐯᔨᐦᒋᑫᐟ, ᐃᐢᐱ ᑭ ᐊᑐᐢᑫᐢᑕᒫᑕᑳᐧᐃᐧ ᓂ ᐃᐧᔪᐃᐧᐣ ᐅᐦᒋ, ᓇᒪᐃᐧᔭ ᐃᐧᔭ ᑳ ᐃᓯ ᒪᒋᐃᓯᒋᑫᔦᐠ, ᐊᐦᐳ ᓇᒪᐃᐧᔭ ᑳ ᐃᓯ ᓂᓯᐊᐧᓈᑎᓂᑫᔦᐠ, ᑭᔭᐋᐧᐤ ᐃᐢᕒᐁᐃᓬ ᐅ ᐋᐧᐢᑳᐦᐃᑲᐣ, ᐃᑌᐧᐤ ᑳ ᑎᐯᔨᒋᑫᐟ ᑭᓭᒪᓂᑐ.
45ᐅᐟ ᐃᑌᐧᐃᐧᐣ ᒫᑲ ᑳ ᑎᐯᔨᐦᒋᑫᐟ ᓂ ᑭ ᐅᑎᐦᑎᑯᐣ, ᐁ ᐃᑌᐧᐟ, 46ᐃᔨᓂᐃᐧᑯᓯᓵᐣ, ᓵᐊᐧᓄᑖᕽ ᐃᑎᐢᑫᐧᔨ, ᒥᓇ ᓵᐊᐧᓄᑖᕽ ᐃᓯ ᐱᑭᐢᑫᐧ, ᑭᐢᑭᐁᐧᐦᐃᑫᑐᑕ ᒥᐢᑎᑯᐢᑳᐤ ᒣᑳᐧᐢᑲᒥᐠ ᓵᐊᐧᓄᑕᕽ; 47ᑭᑐᑕ ᒫᑲ ᒥᐢᑎᑯᐢᑳᐤ ᓵᐊᐧᓄᑖᕽ, ᐁ ᐃᑌᐧᔭᐣ, ᓇᑐᐦᑕ ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᐟ; ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ; ᒫᑎᑲ, ᑭ ᑲ ᓴᐢᑲᐅᑎᐣ, ᐁᑯᓯ ᑭᑕ ᒣᐢᑎᑲᓱ ᑲᐦᑭᔭᐤ ᐁ ᐊᐢᑳᑎᑯᐃᐧᐟ ᒥᐢᑎᐠ ᑳ ᐊᔮᐊᐧᐟ; ᒥᓇ ᑲᐦᑭᔭᐤ ᑳ ᐹᓱᐟ ᒥᐢᑎᐠ; ᐁ ᑳᐧᑯᑌᐠ ᐃᐢᑯᑌᐤ ᓇᒪᐃᐧᔭ ᑭᑕ ᐋᐢᑕᐁᐧᐃᑳᑌᐤ, ᒥᓇ ᑲᐦᑭᔭᐤ ᒥᑳᐧᑲᓇ ᓵᐊᐧᓄᑖᕽ ᐅᐦᒋ ᑭᐁᐧᑎᓄᑖᕽ ᐃᓯ ᑭᑕ ᑭᓯᑌᐊᐧ ᐁᐊᐧᑯ ᐅᐦᒋ. 48ᑲᐦᑭᔭᐤ ᒫᑲ ᑳ ᐅ ᐃᐧᔮᓯᐟ ᑭᑕ ᐋᐧᐸᐦᑕᒼ ᓂᔭ ᑳ ᑎᐯᔨᐦᒋᑫᐟ ᐁ ᑭ ᓴᐢᑲᐊᒫᐣ; ᓇᒪᐃᐧᔭ ᑭᑕ ᐋᐢᑕᐁᐧᐃᑳᑌᐤ. 49ᐁᑲᐧ ᓂ ᑭ ᐃᑖᐧᐣ, ᐋᐦ! ᑳ ᑎᐯᔨᐦᒋᑫᔭᐣ ᑭᓭᒪᓂᑐ! ᐁᑯᓯ ᐅᒪ ᐁᓯᒋᐠ, ᓇᒪ ᒋ ᐊᐢᐸᐋᑫᒧᐃᐧᓇ ᐱᓯᓯᐠ ᑳ ᐃᐧᐦᑕᕽ.
Iliyochaguliwa sasa
ᐃᓯᑭᐁᓬ 20: KKMs
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
This Bible text is a corrected edition of the 1908 Western Cree Bible; it is in the public domain.