ᐃᓯᑭᐁᓬ 21
21
1ᐅᐟ ᐃᑌᐧᐃᐧᐣ ᒫᑲ ᑳ ᑎᐯᔨᐦᒋᑫᐟ ᓂ ᑭ ᐅᑎᐦᑎᑯᐣ, ᐁ ᐃᑌᐧᐟ, 2ᐃᔨᓂᐃᐧᑯᓯᓵᐣ, ᒉᕒᐅᓴᓬᐊᒥᕽ ᐃᑌᐦᑫ ᐃᑎᐢᑫᐧᔨ, ᑲᓈᒋᑲᒥᑯᕽ ᒫᑲ ᐃᑌᐦᑫ ᐃᓯ ᐱᑭᐢᑫᐧ, ᒥᓇ ᑭᐢᑭᐁᐧᐦᐃᑫᑐᑕ ᐃᐢᕒᐁᐃᓬ ᐊᐢᑭ; 3ᑭᑐᑕ ᒫᑲ ᐃᐢᕒᐁᐃᓬ ᐊᐢᑭ ᐁ ᐃᑌᐧᔭᐣ, ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ; ᒫᑎᑲ, ᑭ ᓇᔦᑖᐁᐧᔨᒥᑎᐣ, ᒥᓇ ᓂ ᑲ ᔮᔨᐢᑭᐱᑌᐣ ᓂ ᓯᒫᑲᓂᑯᒫᐣ ᐱᐦᒋᑯᒫᓈᓂᕽ ᐅᐦᒋ, ᐁᑯᓯ ᓂ ᑲ ᑭᐢᑭᐁᐧᐸᐋᐧᐤ ᑭᔭ ᐅᐦᒋ ᐅᑲᐧᔭᐢᑭᑖᑎᓯᐤ ᒥᓇ ᑳ ᒪᒑᔨᐃᐧᐟ. 4ᐊᔨᐢ ᒫᑲ ᑭᑕ ᑭᐢᑭᐁᐧᐸᐊᐧᐠ ᑭᔭ ᐅᐦᒋ ᐅᑲᐧᔭᐢᑭᑖᑎᓯᐤ ᒥᓇ ᑳ ᒪᒑᔨᐃᐧᐟ, ᐁᐊᐧᑯ ᐅᐦᒋ ᓂ ᓯᒫᑲᓂᑯᒫᐣ ᑭᑕ ᓯᐯᐧᐸᔨᐤ ᐱᐦᒋᑯᒫᓈᓂᕽ ᐅᐦᒋ ᐁ ᓇᑐᐸᔨᐢᑖᑯᐟ ᑲᐦᑭᔭᐤ ᑳ ᐅ ᐃᐧᔮᓯᐟ ᓵᐊᐧᓄᑖᕽ ᐅᐦᒋ ᑭᐁᐧᑎᓄᑖᕽ ᐃᓯ. 5ᑲᐦᑭᔭᐤ ᒫᑲ ᑳ ᐅ ᐃᐧᔮᓯᐟ ᑭᑕ ᑭᐢᑫᔨᑕᒼ ᓂᔭ ᑳ ᑎᐯᔨᐦᒋᑫᐟ, ᐁ ᑭ ᔮᔨᐢᑭᐱᑕᒫᐣ ᓂ ᓯᒫᑲᓂᑯᒫᐣ ᐱᐦᒋᑯᒫᓈᓂᕽ ᐅᐦᒋ; ᓇᒪᐃᐧᑳᐨ ᒥᓇ ᑭᑕ ᑭᐁᐧᒪᑲᐣ. 6ᒥᐦᒋᔭᐁᐧᒧ ᒫᑲ, ᑭᔭ ᐃᔨᓂᐃᐧᑯᓯᓵᐣ; ᐊᑖᒥᕽ ᐁ ᐱᑫᐧᔨᑕᒪᐣ ᒥᓇ ᐁ ᐃᐧᓴᑭ ᒧᓯᑖᔭᐣ ᑭ ᑲ ᒥᐦᒋᔭᐁᐧᒧᐣ ᐁ ᐋᐧᐸᒥᐢᑭᐠ. 7ᑭᑕ ᐃᐦᑭᐣ ᒫᑲ ᐃᐢᐱ ᐃᑎᐢᑳᐧᐃᐧ, ᑖᓀᐦᑭ ᑳ ᒥᐦᒋᔭᐁᐧᒧᔭᐣ? ᑭ ᑲ ᐃᑖᐧᐣ, ᐋᒋᒧᐃᐧᓇ ᐅᐦᒋ, ᒋᑫᒫ ᐹᐸᔨᐤ; ᑲᐦᑭᔭᐤ ᒫᑲ ᒥᑌᐦ ᑭᑕ ᑎᑭᑌᐤ, ᒥᓇ ᑲᐦᑭᔭᐤ ᒥᒋᒋᔭ ᑭᑕ ᓀᓱᐊᐧᓇᐧ, ᒥᓇ ᑲᐦᑭᔭᐤ ᐊᐦᒑᕽ ᑭᑕ ᓀᓱᐃᐧᐸᔨᐤ, ᒥᓇ ᑲᐦᑭᔭᐤ ᒥᐦᒋᑲᐧᓇ ᑭᑕ ᓂᔭᒥᓯᒪᑲᓇᐧ ᑖᐱᐢᑯᐨ ᓂᐱ; ᒫᑎᑲ ᐹᐸᔨᐤ, ᒥᓇ ᑭᑕ ᐃᑐᒋᑳᑌᐤ, ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ.
8ᐅᐟ ᐃᑌᐧᐃᐧᐣ ᒫᑲ ᑳ ᑎᐯᔨᐦᒋᑫᐟ ᓂ ᑭ ᐅᑎᐦᑎᑯᐣ, ᐁ ᐃᑌᐧᐟ, 9ᐃᔨᓂᐃᐧᑯᓯᓵᐣ, ᑭᐢᑭᐁᐧᐦᐃᑫ, ᒥᓇ ᐃᑌᐧ, ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ; ᐃᑌᐧ, ᓯᒫᑲᓂᑯᒫᐣ, ᓯᒫᑲᓂᑯᒫᐣ, ᑖᓴᐃᑳᑌᐤ, ᒥᓇ ᑭᒋᐢᑖᐱᐢᑲᐦᐃᑳᑌᐤ; 10ᑖᓴᐃᑳᑌᐤ ᑭᑕ ᓂᐸᒋᑫᒪᑲᕽ; ᑭᒋᐢᑖᐱᐢᑲᐦᐃᑳᑌᐤ ᑭᑕ ᐃᓯ ᐊᔮᐠ ᑖᐱᐢᑯᐨ ᐁ ᐋᐧᐋᐧᐢᑌᐸᔨᐠ; ᑭ ᑲ ᒥᔭᐋᐧᑌᓇᐤ ᒋ ᒫᑲ? ᐅ ᐸᑲᒫᑲᓈᑎᐠ ᓂᑯᓯᐢ, ᒫᔦᔨᒣᐤ ᑲᐦᑭᔭᐤ ᒥᐢᑎᑲᐧ. 11ᒣᑭᓈᓂᐊᐧᐣ ᒫᑲ ᑭᑕ ᑭᒋᐢᑖᐱᐢᑲᐦᐃᑳᑌᐠ, ᑭᑕ ᐋᐸᑕᕽ; ᓯᒫᑲᓂᑯᒫᐣ, ᑖᓴᐃᑳᑌᐤ, ᐁᐦᐁ, ᑭᒋᐢᑖᐱᐢᑲᐦᐃᑳᑌᐤ, ᑭᑕ ᐸᑭᑎᓂᑳᑌᐠ ᐅᒋᐦᒋᕽ ᐅᓂᐸᑖᑫᐤ. 12ᒫᑐ ᒥᓇ ᒪᐃᐧᒧ, ᐃᔨᓂᐃᐧᑯᓯᓵᐣ; ᒋᑫᒫ ᐸᑲᒥᐢᑳᑲᐧᐠ ᓂᐟ ᐊᔨᓯᔨᓂᒪᐠ, ᐸᑲᒥᐢᑳᑲᐧᐠ ᑲᐦᑭᔭᐤ ᐃᐢᕒᐁᐃᓬ ᐅᑭᒫᐊᐧᐠ; ᐸᑭᑎᓈᐊᐧᐠ ᑭᑕ ᓂᐸᐦᐃᑯᒋᐠ ᓯᒫᑲᓂᑯᒫᐣ ᑭᑭ ᓂᐟ ᐊᔨᓯᔨᓂᒪ; ᐸᑲᒥᐸᐧᒣᐦᐅᓱ ᒫᑲ. 13ᒋᑫᒫ ᑯᑌᔨᒥᐁᐧᐃᐧᐣ ᐃᐦᑕᑲᐧᐣ ᑖᓂᓯ ᒫᑲ ᑭᐢᐱᐣ ᐊᐦᐳ ᐸᑲᒫᑲᓈᑎᐠ ᑳ ᒫᔦᔨᐦᒋᑫᒪᑲᕽ ᐁᑳ ᐃᐦᑕᑲᐧᑭ? ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ.
14ᑭᔭ ᒫᑲ ᐃᔨᓂᐃᐧᑯᓯᓵᐣ, ᑭᐢᑭᐁᐧᐦᐃᑫ, ᒥᓇ ᐸᑲᒥᒋᐦᒉᐊᒫ; ᒥᓇ ᑭᔮᒼ ᓯᒫᑲᓂᑯᒫᐣ ᑭᑕ ᓇᐳᓂᑳᑌᐤ ᓂᐢᑖᐧᐤ, ᐅ ᓯᒫᑲᓂᑯᒫᐣ ᑳ ᓂᐸᐦᐃ ᒥᓵᐧᑲᓂᑳᑎᐦᐟ; ᐁᐊᐧᑫᐧᔨᐤ ᐅ ᓯᒫᑲᓂᑯᒫᐣ ᑳ ᑭᐦᒑᔨᐃᐧᐟ ᑳ ᓂᐸᐦᐃ ᒥᓵᐧᑲᓂᑳᑎᐦᐟ, ᑳ ᐱᐦᑐᑫᒪᑲᕽ ᐅ ᓂᐯᐃᐧᑲᒥᑯᐋᐧᕽ. 15ᓂ ᑭ ᐊᐢᑖᐣ ᐁ ᑭᓈᐠ ᓯᒫᑲᓂᑯᒫᐣ ᑲᐦᑭᔭᐤ ᐅ ᑭᐦᒋᐃᐢᑳᐧᑌᒥᐋᐧᕽ, ᑭᑕ ᓀᓱᐃᐧᑌᐦᐁᐸᔨᒋᐠ, ᒥᓇ ᑭᑕ ᔭᐦᑭ ᐹᐱᓱᐊᒫᒋᐠ; ᐋᐦ! ᑖᐱᐢᑯᐨ ᐁ ᐋᐧᐋᐧᐢᑌᐸᔨᐠ ᐃᓯ ᐊᔮᐤ, ᑭᓂᑳᐤ ᑭᑕ ᓂᐸᒋᑫᒪᑲᕽ. 16ᒫᐊᐧᒋᐦᐃᑐ, ᑭᐦᒋᓂᐢᑭᕽ ᐃᑐᐦᑌ; ᐅᔨᑳᐸᐃᐧ, ᓇᒪᑎᓂᕽ ᐃᑐᐦᑌ; ᐱᑯᐃᑌ ᐁ ᐃᑎᐢᑫᐧᔨᔭᐣ. 17ᓂᔭ ᒥᓇ ᓂ ᑲ ᐸᑲᒥᒋᐦᒉᐊᒫᐣ, ᒥᓇ ᓂ ᑲ ᑌᐱᔭᐁᐧᑖᐣ ᓂᐟ ᐋᐦᑯᔭᐁᐧᓯᐃᐧᐣ; ᓂᔭ ᑳ ᑎᐯᔨᐦᒋᑫᐟ ᑳ ᑭ ᐃᑌᐧᔮᐣ.
18ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᐟ ᒥᓇ ᓂ ᑭ ᐅᑎᐦᑎᑯᐣ, ᐁ ᐃᑌᐧᐟ, 19ᐁᑯᓯ ᒥᓇ, ᑭᔭ ᐃᔨᓂᐃᐧᑯᓯᓵᐣ, ᑭᐢᑭᓇᐋᐧᒋᑕᒫᓱ ᓂᓱ ᒣᐢᑲᓇᐊᐧ, ᐅ ᓯᒫᑲᓂᑯᒫᐣ ᐹᐱᓬᐊᐣ ᑭᐦᒋ ᐅᑭᒫᐤ ᑭᑕ ᐯ ᐃᐢᐸᔨᔨᐠ; ᐁ ᐃᓯ ᓂᓯᑭ ᑭᑕ ᐯᔭᑲᐧᐣ ᐊᐢᑭ ᐃᑌ ᑫ ᐅᐦᑕᒧᑭ; ᑭᐢᑭᓇᐋᐧᒋᐦᑖ ᒫᑲ, ᑭᐢᑭᓇᐋᐧᒋᐦᑕ ᐃᑕ ᐁ ᒫᑖᒣᒧᐠ ᒣᐢᑲᓇᐤ ᐅᑌᓈᕽ. 20ᑭ ᑲ ᑭᐢᑭᓇᐋᐧᒋᐦᑖᐣ ᒣᐢᑲᓇᐤ, ᓯᒫᑲᓂᑯᒫᐣ ᑭᑕ ᐃᐢᐸᔨᐠ ᕒᐋᐸᐃᕽ ᑳ ᐊᔮᒋᐠ ᐋᒪᐣ ᐅᐟ ᐊᐋᐧᓯᒥᓴ, ᒥᓇ ᒍᑕ ᒉᕒᐅᓴᓬᐊᒥᕽ ᑳ ᒣᓂᐢᑭᑲᑌᐠ. 21ᒋᑫᒫ ᐹᐱᓬᐊᐣ ᑭᐦᒋ ᐅᑭᒫᐤ ᑭ ᓂᐸᐃᐧᐤ ᐃᑕ ᐁ ᐸᐢᑫᒧᐠ ᒣᐢᑲᓇᐤ, ᐁ ᒫᑖᒣᒧᑭ ᓂᓱ ᒣᐢᑲᓇᐊᐧ, ᑭᑕ ᐋᐸᒋᐦᑖᐟ ᐸᑯᓇᐃᐧ ᑭᐢᑫᔨᑕᒧᐃᐧᐣ; ᐊᑐᓴ ᑭ ᐁᐧᐁᐧᐱᐸᔨᑖᐤ, ᐊᓂᐦᐃ ᑌᕒᐊᐱᒼ ᑭ ᓇᑐᐢᑲᒪᐁᐧᐤ, ᐅᐢᑯᐣ ᑭ ᑲᓇᐋᐧᐸᐦᑕᒼ. 22ᐅ ᑭᐦᒋᓂᐢᑭᕽ ᑭ ᐊᔮᔨᐤ ᐁ ᐃᓯ ᐸᑯᓇᐃᐧ ᑭᐢᑫᔨᑕᒧᐃᐦᐟ ᒉᕒᐅᓴᓬᐊᒼ ᐅᐦᒋ, ᑭᑕ ᐅᔭᐢᑖᐟ ᐸᑲᒪᐃᑳᑲᓇ, ᑭᑕ ᑖᐊᐧᑎᕽ ᓂᐸᑖᑫᐃᐧᓂᕽ, ᑭᑕ ᐯᑖᑲᐧᕽ ᓵᐦᑯᐁᐧᐃᐧᐣ, ᑭᑕ ᐅᔭᐢᑖᕽ ᐸᑲᒪᐃᑳᑲᓇ ᑭᐦᒋᐃᐢᑳᐧᑌᒥᕽ, ᐊᐧᒋᑳᓇ ᑭᑕ ᐅᔨᐁᐧᐸᐊᒥᕽ, ᐊᓱᐃᐧᑲᒥᑲᐧ ᑭᑕ ᐅᓯᐦᑖᕽ. 23ᐁᑯᓯ ᐃᐧᔭᐋᐧᐤ ᐱᑯᓇᑕ ᐸᑯᓇᐃᐧ ᑭᐢᑫᔨᑕᒧᐃᐧᐣ ᑭᑕ ᐃᑖᐱᓯᒥᑲᐧᐠ, ᑳ ᑭ ᑭᐦᒋᐃᑎᑯᒋᐠ; ᒫᑲ ᒪᒋᐃᑎᐃᐧᐣ ᑭᐢᑭᓯᑐᑕᒼ, ᑭᑕ ᐅᑎᓂᐦᒋᐠ.
24ᐁᐊᐧᑯ ᐅᐦᒋ ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ; ᒋᑫᒫ ᐁ ᑭ ᐃᓯᐦᒋᑫᔦᐠ ᑭ ᒪᒋᑐᑕᒧᐃᐧᓂᐋᐧᐤ ᑭᑕ ᑭᐢᑭᓯᑐᒋᑳᑌᐠ, ᐃᐧᔭ ᑭ ᐊᐧᓂᑐᑕᒧᐃᐧᓂᐋᐧᐊᐧ ᐁ ᐋᐧᐸᒋᑳᑌᑭ, ᐁᑯᓯ ᑲᐦᑭᔭᐤ ᑭᐟ ᐃᑐᑕᒧᐃᐧᓂᐋᐧᕽ ᑭ ᒪᒋᑐᑕᒧᐃᐧᓂᐋᐧᐊᐧ ᐁ ᓄᑲᐧᑭ; ᒋᑫᒫ ᐁ ᑭᐢᑭᓯᑐᑖᑲᐃᐧᔦᐠ, ᑭ ᑲ ᐅᑎᓂᑲᐃᐧᓈᐋᐧᐤ ᒥᒋᐦᒋ ᐅᐦᒋ. 25ᑭᔭ ᒫᑲ, ᑳ ᓂᐸᐦᐃ ᒥᓵᐧᑲᓂᑳᑎᑲᐃᐧᔭᐣ ᑳ ᒪᒑᔨᐃᐧᔭᐣ. ᐃᐢᕒᐁᐃᓬ ᐅᐟ ᐅᑭᒫᒪ, ᑭ ᑭᓯᑳᒼ ᑳ ᐅᑎᐦᒋᐸᔨᐠ, ᐃᑕ ᐃᐢᑳᐧᔮᐨ ᒪᒋᐃᑎᐃᐧᐣ ᐊᔮᑭ; 26ᐅᒥᓯ ᐃᑌᐤ ᑳ ᑎᐯᔨᐦᒋᑫᐟ ᑭᓭᒪᓂᑐ; ᐃᑲᑌᓇ ᑭᐦᒋ ᐅᑭᒫᐃᐧ ᑭᑭᐢᑳᒋᑲᐣ, ᒥᓇ ᑫᑕᐢᑐᑎᓀ ᑭᐦᒋ ᐅᑭᒫᐊᐧᐢᑐᑎᐣ; ᐅᒪ ᓇᒪᐃᐧᔭ ᒥᓇ ᐁᑯᓯ ᑭᑕ ᐃᓯ ᐊᔮᐤ; ᐃᐢᐱᓇᒧᐠ ᐊᓂᒪ ᑳ ᑕᐸᑖᓯᐠ, ᒥᓇ ᑕᐸᑎᓇᒧᐠ ᐊᓂᒪ ᑳ ᐃᐢᐹᐠ. 27ᓂ ᑲ ᑫᐧᑎᐱᐁᐧᐸᐁᐣ, ᓂ ᑲ ᑫᐧᑎᐱᐁᐧᐸᐁᐣ, ᓂ ᑲ ᑫᐧᑎᐱᐁᐧᐸᐁᐣ; ᓇᒪᐃᐧᔭ ᒫᑲ ᑭᑕ ᐃᐦᑕᑲᐧᐣ, ᐹᑎᒫ ᑕᑯᓯᑭ ᐊᓇ ᑫ ᐅᐟ ᐊᔮᓂᐟ; ᓂ ᑲ ᒥᔮᐤ ᒫᑲ.
28 #
ᒉᕒᐃᒫᔭ 49:1-6; ᐃᓯᑭᐁᓬ 25:1-7; ᐁᒫᐢ 1:3-15; ᓭᐸᓈᔭ 2:8-11 ᑭᔭ ᒫᑲ ᐃᔨᓂᐃᐧᑯᓯᓵᐣ, ᑭᐢᑭᐁᐧᐦᐃᑫ, ᒥᓇ ᐃᑌᐧ, ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ ᐋᒪᐣ ᐅᐟ ᐊᐋᐧᓯᒥᓴ ᐅᐦᒋ, ᒥᓇ ᐅ ᒪᒋᐃᓯᐁᐧᐃᐧᓂᐋᐧᐤ ᐅᐦᒋ; ᒥᓇ ᐃᑌᐧ ᑭᔭ, ᓯᒫᑲᓂᑯᒫᐣ, ᓯᒫᑲᓂᑯᒫᐣ ᑫᒋᑯᐱᒋᑲᑌᐤ, ᓂᐸᑖᑫᐃᐧᐣ ᐅᐦᒋ ᑭᒋᐢᑖᐱᐢᑲᐦᐃᑳᑌᐤ, ᑭᑕ ᓂᓯᐊᐧᓈᒋᐦᐃᐁᐧᐠ, ᑭᑕ ᐃᓯ ᐊᔮᐠ ᑖᐱᐢᑯᐨ ᐁ ᐋᐧᐋᐧᐢᑌᐸᔨᐠ; 29ᐋᐦᒋᐱᑯ ᐱᑯᓇᑕ ᐁ ᐃᓯ ᐋᐧᐸᒥᐢᑭᐠ, ᐋᐦᒋᐱᑯ ᑭᔮᐢᑭᐃᐧᓇ ᐁ ᐸᑯᓇᐃᐧ ᐃᓯᓇᒧᐃᐢᑭᐠ, ᑭᑕ ᐱᒥᓯᒥᐢᑭᐠ ᐅᑲᐧᔮᐋᐧᕽ ᑳ ᓂᐸᐦᐃ ᒥᓵᐧᑲᓂᐃᐧᒋᐠ, ᐅ ᑭᓯᑳᒥᐋᐧᐤ ᑳ ᐅᑎᐦᒋᐸᔨᔨᐠ, ᐃᑕ ᐃᐢᑳᐧᔭᐨ ᒪᒋᐃᑎᐃᐧᐣ ᐊᔮᑭ. 30ᑳᐃᐧ ᐊᐢᑖ ᐱᐦᒋᑯᒫᓈᓂᕽ, ᐃᑕ ᑳ ᑭ ᐅᓯᐦᐃᑲᐃᐧᔭᐣ, ᐊᓂᒪ ᐊᐢᑭ ᐃᑕ ᑳ ᑭ ᓄᑯᓯᔭᐣ, ᑭ ᑲ ᐅᔭᓱᐋᐧᑎᑎᐣ. 31ᑭ ᑲ ᑲᐧᔭᑯᑎᑖᐧᑎᐣ ᒫᑲ ᓂ ᑭᓯᐢᑖᑫᐃᐧᐣ; ᑭ ᑲ ᐳᑖᑎᑎᐣ ᐁ ᐃᐢᑯᑌᐊᐧᕽ ᓂ ᑭᓯᐋᐧᓯᐃᐧᐣ ᐅᐦᒋ; ᑭ ᑲ ᐸᑭᑎᓂᑎᐣ ᒫᑲ ᐅᒋᐦᒋᐋᐧᕽ ᐁ ᐱᓯᐢᑭᐋᐧᑎᓯᒋᐠ ᐊᔨᓯᔨᓂᐊᐧᐠ, ᑳ ᓇᐦᐃᒋᐠ ᐁ ᓂᓯᐊᐧᓈᒋᐦᐃᐁᐧᒋᐠ. 32ᑭᔭ ᑭ ᑲ ᐃᓯ ᐊᔮᐣ ᑖᐱᐢᑯᐨ ᒥᐦᑕ ᑳ ᐳᓂᑳᑌᑭ; ᑭ ᒥᐦᑯ ᑭᑕ ᐊᔮᐤ ᒣᑳᐧᐨ ᐊᐢᑭᕽ; ᓇᒪ ᐃᐧᑳᐨ ᒥᓇ ᑭ ᑲ ᑭᐢᑭᓯᑐᑖᑲᐃᐧᐣ; ᒋᑫᒫ ᓂᔭ ᑳ ᑎᐯᔨᐦᒋᑫᐟ ᑳ ᑭ ᐃᑌᐧᔮᐣ.
Iliyochaguliwa sasa
ᐃᓯᑭᐁᓬ 21: KKMs
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
This Bible text is a corrected edition of the 1908 Western Cree Bible; it is in the public domain.