Саалтыр 143
143
1Давид псалома.
Алгыс буоллун Айыы Тойоҥҥо, мин очуос хайабар!
Кини миигин сэриилэһэргэ үөрэтэр,
кыргыһарга бэлэмниир;
2Кини миэхэ үтүөтүк сыһыаннаһар, дурда-хахха буолар;
Кини мин кириэппэһим, мин Өрүһүйээччим,
харым куйаҕа, эрэнэр эрэлим;
Кини миэхэ норуоппун бас бэриннэрэр.
3 Айыы Тойон, кимий-тугуй киһи диэн,
тоҕо Эн киниэхэ кыһаллаҕын?
Кимнээҕий ол дьон диэн,
тоҕо кинилэргэ болҕомтоҕун уураҕын?
4Киһи сиккиэр тыал кэриэтэ;
кини күнэ-дьыла күлүк сүүрэрин кэриэтэ.
5Халлааннаргын иҥнэри тутан, Айыы Тойон, түһэн кэл;
хайалары таарыйан, буруолат.
6Чаҕылҕанынан курбуулаан, кинилэри ыһаттаа,
оҕунан ытыалаан, киэр куоттартаа.
7Үөһэттэн илиигин уунаҥҥын,
миигин өрүһүйэн ыл, быыһаа бу дириҥ ууттан,
туора уустар илиилэриттэн,
8албын-көлдьүн тыллаахтартан,
сымыйанан андаҕайааччылартан.
9Айыы Таҥара! Мин саҥа ырыаны Эйиэхэ ыллыаҕым,
уон устурууналаах арфаҕа оонньуоҕум –
10Эйиэхэ, ыраахтааҕыларга кыайыыны бэлэхтээччигэ,
кулуккун Давиды кыырыктаах кылыстан быыһааччыга.
11Өрүһүйэн ыл миигин, быыһаа
туора уустар илиилэриттэн –
албын-көлдьүн тыллаахтартан,
сымыйанан андаҕайааччылартан.
12Уолаттарбыт уолан саастарыгар
модун мастардыы баараҕадыйдыннар;
кыргыттарбыт кэрэмэн дыбарыастар
чочуонай колонналарын санаттыннар.
13Ас-үөл эгэлгэтэ дэлэйдик угуллан,
ампаардарбыт ыга туоллуннар;
иитэр барааммыт үтүмэнник үксээтин,
мэччитэр сирдэрбитигэр
уонунан тыһыынчанан элбээтин;
14күрүөлүүр сүөһүбүт эмис-тот, төрөлкөй буоллун;
олорор куораппыт эркинин өстөөх көҥү көппөтүн,
дьоммутун-сэргэбитин үүрэн-түрүйэн барбатын;
уулуссаларбытыгар ытабыл-соҥобул иһиллибэтин.
15Маннык алгыска тиксибит норуот дьоллоох;
Айыы Тойон Таҥаралаах норуот дьоллоох.
Iliyochaguliwa sasa
Саалтыр 143: СБК
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Институт перевода Библии, 2008-2022