ZEKHARIA 7
7
AMPEU ye amlo tsumono Kumvukeu mithi
1Darus no akukatou shikeu ampe kuthuno aqhi toku eno atsala abidini Kislev qhilo AMPEU no atsape lakhi itsuke.
2Bethel lo akemiqono Aqokitikhi MPEU Achine kilo Sharezer ngo Regemelek eno pano timiqo puwuke, tiye AMPEU wu kukumgha inikhu penike eno 3achinemi ngo tungkupmi vilo hipau vehu iniju peniyeke: “Achineki kutsalevekeu ghenguno ninguno ampe kushuwa kutolo aqhi apunguulo kumvu chekeu toi ninguye tishi mloqa achekepu keo mokya?”
4AMPEU sutsa hipau ilau ighike. 5Pano pi, “Aghakhu hipaulo akemiqo vilo eno achinemiqo vilo pilo ike panonguno hi ampe lhotsuni dolo aqhi apunguu eno aqhi akutsuniu lo kumvu chekeu eno mlo qachekeu huye igihukeu lono kumoe. 6Kughou panonguno kuchu kusho shini keno tiye panoqo ghakiqipu ghenguno shicheke.”
7Kughou Jerusalem ye kinikulushi eno timi kumzapushi akelono eno tipau sukumxa taun lo likhi kumo puzu apeu qhalo eno kulolau naghuto kumxalo ghi timi kumzapu ake ghuloki lono AMPEU no azuumi tungkupmi vechewo hipau pikeuke.
Hekibide ghenguno Piyighivepe
8AMPEU no atsape hipau Zekharia tsuke: 9“Ado kushuwo lono ino ahza kutsu hipaqo iwu timi tsuke: ‘Nonguye lakhino lakhi athikuzumi lau kuchou xakutha, kupukilekeu eno kimiye qhiyi keu shimayesake. 10Nonguye chimemi, mighimgha eno inami khunoqo nongu gholo ani keno momu khukhumu nongu kukuphu avehupu shi aghikemiqo nedaqoda kevilo. Momu lakhino lakhi shipusa nikeu laghi kughuqhi kevilo.’
11“Ikemu iwu timiqono initsumoniye tsatsayi auve. Panongu kukumsu xukhomove eno inimoniaye panongu kini kiyikhaluve. 12Panonguno amlo hekighike pesu auvekeuye Aqokitikhi MPEU no pa ghungu pelo puzuumi tungkupmiqo vechewo ayezah eno akukutsu tsa tsupuwukeu chilumoniyeke. Tighenguno niye ighono aloghu ideveke. 13Ino pikeu panonguno inimoke ghenguno kughou panonguno inikhu keno ino khochilemoveke. 14Pasapagha toi ino panoqo jole pesu inaghami yeghilo auvepe. Ikehu aghakhu kivi hipauye kughukughalei keu-a shive eno khunomu tilehi kughunamove.”
Iliyochaguliwa sasa
ZEKHARIA 7: SUMIBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.