ZEKHARIA 10
10
AMPEU no Xaphenike Piqhi
1Ghixu tusho lono AMPEU vilo tsutsughu khulo. AMPEU no tsutsughu eno khungkusu puwutsu cheni eno kumtsu ghenguno aghasalo atsuni mini ipeghipe cheni. 2Timino ajulho kimihi ngo asakiqhimi sasu kuptsa cheni ikemu panonguno khokichile ithulukeuye akimki eno avehu kuhamitheke. Khamino asamo kiqi pitsu cheni ikemu nosabidekeu likhi; panonguno lokughunopu nongu tsukeuye adouke. Ike timiye bheri puhavekeu toi itsu itsuwuve cheni. Panonguye sakiphemi kuhake ghenguno akupunalo ilove cheni.
3AMPEU no pi, “Niye inaghami khunoqono iwu timiqo shou ayehpe cheni keno tipaqo lau iloghu ani eno niye panoqo ghimeqhini cheni. Juda lo akemiqoye iwuke eno ni, Aqokitikhi MPEU no panoqo heju kutoluve nani. Panonguye iwu aghukhe khurshi kuka kumto toi shi nani. 4Panoqo gholono iwu timiqo jukutsu nike ayehkipemi, sakiphemi eno azah kutsumi ipeghi nani. 5Juda lo akemiqoye ghushimino pano ghumiqo alaghila anibalo qodasu keu toi tokuluu shi nani. AMPEU no panongu gholo anike ghenguno panonguno aghu shi nani eno panonguno aghumi wu khurshi ghushimi pinamu halesuve nani.”
6“Ino Juda lo achekemi shikumto nani;
ino Israil lo achekemi hakholuve nani.
Ino panoqo shou imlo ighiqhiyikeu
anani eno panoqo kumtsu pano
ghakhulo sachile saghi nani.
Panonguye ino khilemu panoqo
pevemoke toive nani.
Ino panoqo Lhou AMPEU ke;
ino panoqo kighini khochile tsu nani.
7Israil lo achekemiye ghushimi
toi choshiyi nani,
aji sho akemi toi alokivi shi nani.
Pano tikughukoqono tokulu hipau
kumsuchilelu nani,
AMPEU no mla tsukeulo aghakiqishi anani.”
8“Ino iwu timiqo ku-kumqo sawo
kumtsa qhi nani.
Ino panoqo xaphe sawo puzuu
panonguye kiutoi kumzapu keno
titoi shitsu nani.
9Ino ashiayeh kutami gholo panoqo
halepuwuve namu,
putou yeghilo ghi panonguno
kumsuchileu nani.
Panongu eno pano tianuliye puxutsu nani
eno kumtsa pano phuyinalo ideghi nani.
10Ijip ngo Asiriya lono ino panongu
phuyinalo saghi nani eno pano
ghakhulo panoqo pelo ngolupe nani.
Gilead ngo Libanon loghi ino
panoqo pelo ngope nani;
aghakhu kumtsulo timino
chhitoive nani.
11Kughou panonguno aghime
azughi toi akeu kathasu wuni keno,
Ni, AMPEU no azu kighide ghasuve nani,
tileno Nayil ghoki thonheikeu kumtsu qhaive nani.
Aqhekuzau Asiriya ye ghakuchunive nani,
eno Ijip akughushuuye li kuka hauve nani.
12Ino iwu timiqo shikumtope mutotoi
nani eno panonguno imlla eno igholu nani.”
AMPEU no piqhiveake.
Iliyochaguliwa sasa
ZEKHARIA 10: SUMIBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.