MALAKI 1
1
1Israil lo akemi timiqo vilo pipe nike AMPEU no atsape hipau Malaki tsuke.
AMPEU no Israil Kimiye
2AMPEU no pawu timiqo vilo pi, “Niye pulhapujulo nongu kimiye cheni.” Ikemu panonguno khochile pi, “Noye okikimiye kishi nipiye kya?”
AMPEU no khochile,” Esao ngo Jakob pamaye athiazu ke ikemu niye Jakob ngo pa laghami kimiye cheni 3eno Esao ghakhulo naghutoqo kutsa pinyivetsu eno ayeghiye tughashi ghenguno qhivetsuke.”
4Edommi, Esao laghamino, “Niphughiqo kutsaleve ake ikemu ninguno tipaqo shikithe pukuni” ipi piaye, AMPEU no ishi pichile nani, “Panoqo pelo shikithe puku apelo, ino tipaqo itaghi xalevetsu nike. Timino panoqo vilo ‘Ayeghi lhoksakugha’ eno AMPEU no ‘hupaqo shou alhokupuju aloghu ide chekemiqoke ipi pi nani.’ ”
5Israilmiye pano nhethino hipau ithulu nani eno panonguno ishi pi nani, “AMPEU ye Israilmi yeghi nguno kutami-alo ghi akughushuu ke! “
AMPEU no Achinemi Sakiyi
6Aqokitikhi MPEU no achinemi vilo pi,”Anu lakhiye papu gihu cheni eno aqemi lakhiye pa mipeu gihu cheni. Niye nongu papuke, nonguye kushiye igihumo kya? Niye nongu mipeu ke nonguye kushiye igihumo kya? Nonguno ijumithi cheni eno tishi keghi nonguno ishi inijuke, ‘Ninguye khileno ojumithi cheni kya?’ 7Achine kitiqevekeu chuqupu pesu imlla chekeu khachelo sughi cheni. Nonguno ishi iniju cheni, ‘Ningu ye kishi puzu osumsa move kya?’ Ino nongu vilo pinike, imlla chekeu khache jukuchhube keu lonoke. 8Kughou nonguno anhethi kighiche momu ayiku kughupa momu kusukini lhoxu heqhipe mllani keno tiye achipi kughashi nonguye kumsu ani kesha? Lhoxu tikithipu pesu ayehkipeu tsujulo! Paye nongu lau amlo kiqi shi nani keo momu nonguno qhuinijukeu alepitsu nani kya?”
9Ike itehiye nongu achinemiqo, Alhou vilo nilau akivipu shitsu penike inijulo. Paye nongu kighini initsumo nani eno tiye nongu kipimishi ani. 10Aqokitikhi MPEU no pi, “Nongu gholo khuala pelono achineki hukikha khave penishi anie, tishianguno nongu pelo imllakeu khachelo avehu kuhakeu mi kuyiqu pemo nike. Niye nongu jupe imlo qi amoe. Niye nonguno akumllagho ilau sughikeu ikhilutsumo nani. 11Ayeghi cheku lakhi lono lakhiu kutolo timiqono igihu cheni. Aqha kumtsulo panonguno tsungquikeu ta pitipe itsu cheni eno ino ikhikulupu lhoxu heqhipe mlla cheni. Panongu kumtsuno igihu cheni! 12Ikemu kughou nonguno imlla keu khacheye ame kuhae ipino tipaulo nonguno jumithi chekeu chuqupu pesu mlla nikeno nonguye igihumove anie. 13Nonguno, ‘Ninguye hipaqo jupe angaghaivae!’ ipi cheni eno nonguno agi sukughupe itsu cheni. Imlla ani kepi nonguno puka sughikeu lhoxu momu ayiku kughupa momu kusukini lhoxu pesu ighi cheni. Niye nongu launo tipau ikhilutsu nani kepi kumsu ani kesha? 14Timi khuuno pa tsu-aqu lojilo lhoxu akivi akeu itsu nikeu shi piqhive puzu lhoxu ame kuhakeu lakhi heqhipe imlla keno pishikiqhiu shou musuinikeu lakhi auvae. Kughengu niye kukami kije lakhi eno shiayeh kumtsulo timino isumsa acheni.”
Iliyochaguliwa sasa
MALAKI 1: SUMIBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.