HAGAYI 1
1
Achineki shikithe nikeu Zahkutsu
1Darus no Persia lo akukatou shikeu ampe akiniulo aqhi akutsughou atsala atughiulo AMPEU no tungkupu Hagayi vechewo atsape tsuke. Tiye Juda lo ahng shiakeu Shealti-el nu Zerubabel ngo Jehozadok nu Achinetou Joshua pama lau pipuwuke.
2Aqokitikhi MPEU no Hagayi vilo pi, “Timi hipaqo no pikeuno Achineki shikithe puku nikeu ghuloki hiye achipi shimphie pike.” 3AMPEU no tileno tungkupu Hagayi vechewo atsape hipau timiqo lau tsuke: 4“Iwu timiqo, kushiye nonguye aki kivilo ngo ani puzu iAchine kiye ixapiniyi anipe kya? 5Nongu shou kiu shi ikughi ani keno nonguye ithumla kesha? 6Nonguno athi kumzapu xusu ani ikemu aghulo likhi ghile hulu ani. Nonguye achuqupu chukepuye ani ikemu nongu pelo lukumkha shi peithalu kepu shiamoe. Nonguye atsayiji shokepu ani ikemu yeleqolei kepu kuhae! Nonguye aphimini ani ikemu nongu pelo luvuyi lukepu lukumkha shi kuhae. Qeleqe qechukemino aqe qepewo jolabo akighipe akeulo suve ani. 7Kushiye hikithipu shiani kela nonguye ithulumo kesha? 8Naghutolo iqholo, takuta pughilo eno Achineki shikithe pukulo; tithiuno ino amlo qi nani eno imlla kuzupu qhemi lono mllalu kepu shi nani.”
9“Nonguno kumzapu ghile huniye juake ikemu aghulo likhi shi aghike. Kughou nonguno ghile hupusu akilo pughi keno ino fuleve tsuke. Niye kushiye tipau shi kya? kughengu nonguno pututa shelo pututa kilo mighimghai mula ani puzu iAchine kiye ixapinyi ani kehue. 10Tighenguno tsughuqhimoe eno kiumu ipeghimlae. 11Ino qhaikeu tsala aghakhulo sughi, naghutoqo shou, aghilu shou atsayilu shou, oliv xathili shou, ayeghi lono ipeghiche keu xabo shou, timi ngo lhoxuqo shou eno nonguno chichekeu jeli kumtsu shou sughike.”
Timiqono AMPEU Zahkutsu pelu
12Tileno Zerubabel ngo Joshua eno Babilon lo puxu puaghikemi khunoqo ideighi keno tipaqo kumtsuno AMPEU no panoqo vilo kiu shilopi keno tipau shike. Panonguye musave eno AMPEU tsapeu tungkupu Hagayi ghokulu shike. 13Tileno Hagayi no AMPEU tsape pesu timiqo tsuke: “Ino nongu sasu anani, tiye ishoqhike.” 14AMPEU no timi kumtsu Achinekilo kumlapu mulape nike panongu mlo hakuthotsuke: Juda lo ahng Zerubabel, Achinetou Joshua eno halepheve keu lono puxu puaghikemi ideighikeqo kumtsu hakutho tsuke. Panonguno Aqokitikhi MPEU, panoqo Lhou Achine ki kumlapu mlathuve, 15tiye Darus no akukatou shikeu ampe akiniulo aqhi akutsughou atsala muku abidiu lono huthuke.
Iliyochaguliwa sasa
HAGAYI 1: SUMIBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.