APOSTOLMI 28
28
Malta lo
1Ninguno akushukulu amuku tolu kethiu, ningu vilo pikeuno zudo yeghi huye Malta ipi. 2Tile kughuna kichemiqono shisheno shompami sasu keshi ningu ikhilu. Tile tsughu thuve eno suthi ae, ikehu panonguno ami shieno ningu kumtsu ikhikulu shi. 3Paul no asukugha amqo lakhi kichepe ighi puzu tipaqo amilo suakelauye apighi lakhi akushuno ghakeu lono ipeghino paulo hechizheluve. 4Tile kughunakuamiye aphighino Paul u hechije akeu ithulu puzu lakhino lakhi vilo pi. “Timi hipauye ghikiqhimi shiani putsa. Azughi lono akushukulu polu kethiu ghi azapolo kighini huno pa puxumoniye kutovae.” 5Ikemu Paul no apighi hu amilo kilhesuve eno kumu pa shipsamove. 6Paye ingughuyive momu zuleno iluiqi thive nani kepi timiqoye khejuae. Ikemu panonguno ado kushuwa khejuve kethiu ghi pa shou kiumu pa kutashive keu ipeghimove kelo, timiqoye panongu kukumsu kiliveno pi, “Paye alhou lakhie!”
7Tipa-a lono kushokumolo, zudo yeghi tipaulo akukau Publio no chichekeu alu hami ae. Pano ningu kimiyeqhiyi ikhilu eno atsala kuthu kutolo ninguye pa kilo inami shiae. 8Publio pa puhye aghakimki ngo ajikubano supuzu azu-a dape ae. Paul no pa kilo wuno inikhutsu eno pa-u pesu pa shou chhope be eno pa shipivie. 9Kughou hi shikeno zudoyeghi tipaulo kusukinimi kutami ghi ighi eno shipivilukhae. 10Panonguno agho kutomo ningu tsu, eno kughou ninguno zukilu lono cheveniye kelo ninguno aghuzulalo avehupu shikepu suwo sutsupuwue.
Malta lono Rom Kuto
11Aqhi kuthu thiu, ninguye zukilu lakhi ti zudoyeghi lono susu tsala lono cheve. Zukilu tiye Alekzandria lono ighikeu, tipau pesu “Alhou Atuna” ipi cheke. 12Ninguye Syrakusa ipikeu taun tolu eno tile atsala kuthu ngove. 13Tileno ninguye veho susu Rhegium ipikeu phughi tolu. Ghulo lakhi thiuye apeu kudauno amlhu mulhu thuve, eno ghulo kini lono ninguye Puteolia lo ighi. 14Tile ninguno kupulumi khami phulu eno panoqo gholo ngotsulopi kusukelo tile atsala tsuni puwove. Eno tishieno Rom lo ninguno ighi. 15Rom lo athikuzumi qono ningu ghili chilu puzu Appi Lhikishia ngo Aghuzulaki Kuthu kutolo ghi ningu sasu kusholuniye ighi. Panoqo ithulu kelo, Paul no shikimithi Alhou tsu eno pa mlo kuloghi shikithelu. 16Kughou Rom lo ninguno ighikeno, Paul ye ghushimi lakhino pa kheghi pa likhi pa kutashi ngolupe nikeu pulovetsu.
Rom lo Akelo
17Atsala kuthu thiu Paul no tipa-a lo Judami sakiphemiqo kuhonike kukutsu. Panonguno kumqolu kelo Paul no panoqo vilo pi, “Athikuzu miqo! Niye nitimi shou momu nipu asu launo ithulukeu khuayeh shou kiumu mla puamo kemu, Jerusalem lono ikughape akughumi lakhi shivepe eno Rommi ulo suve tsue. 18Panonguye ivilo iniju kide kudajuve puzu iphepuwuve nikeu pulo ae kughengu ipithive kuzupu ino shipuaghikeu panonguno kiumu phulumoe. 19Ikemu kughou Judamiqono hipaulo lakha keno, niye Rom kukau Kaisar pelo itsakughathave penikeu khumaye save, tishimu nishiayeh shou kiumu ngukunike niye sughikepu kuhae. #Aposto 25.11 20Hipau vehu ghenguno nongu sasu kusho eno nongu putsanike ino iniju, kughengu ayikichhe hipauno itshupe akeu huye, Israilmino khuu laju akeno tipau pa ghenguno niye ishi anike.” 21Panonguno pa vilo pi, “Ninguye Judia lono oghenguno yekeu yekili kumu ithumla, momu ningu thikuzumi khumu tilano asutsa kithe pesu ighimoe momu oghili lhoksa kumu chimlae. 22Ikemu okukumsuye kiutoi kela olauno ninguno chilunishi ani, kughengu ninguno ithi akeuno hi nono pichekeu mqo huye aqha kumtsulo timino pipusa acheni.”
23Ikehu panonguno Paul sasu ghulo lakhilo kushonikeu shi kihithave, eno panongu kutomo shesu Paul kungoalo ighi. Inaqhe lono putho kutolo pano pichekeu apasushi lhepiye, eno Alhou yehkipe ghili ashepe shi. Pano Jisu ghili pesu panongu pelo mutsuqheyi ithivepe nike pukaputsa ghi Muse yezah lo eno tungkupmino yepuakeu lono kichephepe piye. 24Panoqo gholo khami pa tsa inipesu tsaqui ithive, ikemu khamiye pulutsumoe. 25Ikehu, panongu dolo kuqhamlano auve kehu, Paul no atsa nhekha lakhi pive kethiuye panonguye ixawove. Paul no hi pike, “Aghungu Kimthe no Isaya tungkupu vechewo nongu puasu vilo pikeu huye kiutoi kuchou kela! 26Hitoi pike:
‘Wuno timi hipaqo vilo pilo: Nonguno tsaqui ini nani ikemu khilemu ithikuthu moe;
Nonguno tsaqui junani, ikemu khilemu ithumlae. #Isa 6.9-10 27Kughengu timi hipaqo mloye mamayivae;
Panonguno pano kini mikekhaluvae;
Eno panonguno pano nhethi miyiluvae,
Tishimokeaye, panongu nhethino ithuluni cheke,
Panongu kinino chiluni cheke,
Panongu mlono ithikuthuluni cheke.
Eno ilau tsughu ighieno ino panoqo shipivini cheke, ipi Alhou no pie.’ ” 28Paul no highi pi, “Nonguno hi ithikepushi ani, tiye Alhou wu xakulupu tsakiviuye Judakumomi lau puwutsu ani. Panonguno initsu nani!” 29[Pano hipatsa pive kethiuye, Judamiqo panongu dolo mutomushughi ixawove.]
30Ampe kini kutolo Paul ye pa likhi pano ame su-ghi ngokeu ki lakhilo ache, eno pa sasu kushoniye ighikemi kumtsu sasu kushokile che. 31Pano kumtsu gizu lono eno kiunomu pa lakha keu kuhano Alhou yehkipe ghili pikulha eno Ampeu Jisu Khristo ghili pesu kutsu che.
Iliyochaguliwa sasa
APOSTOLMI 28: SUMIBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
