APOSTOLMI 20
20
Makedonia ngo Akhayia lo
1Muto mughukeu tave kethiu Paul no kutsuluvekeqo kukumqono panoqo mlo shikumtotsu puzu panongu vilo ileno-alo pive puzu paye Makedonia lo wuniye cheve. 2Pano tipa qhalo wupuzu alokughuno tsukeu tsa kutomo pino paye Grik lo ighi. 3Paye tileno aqhi kuthu puwove. Paye ashukaki lono Siriya lo wuniye kuto ae ikelo Judamino pa pithiveniye kuchughupe aghive, ikehu Makedonia kudauno idewonikeu avehu kughuve. 4Beria noghami Purho nu Sopatra ngo Thesalonika noghami Aristarka ngo Sakunda pama, Derbia ghami Gayio ngo Asia yeghiqhalomi Timothi, Tikhika, eno Trofima ishino pa mtsa wue. 5Hipaqono nizuuno wuno Troa lono nikhe aghipe. 6Kholaqhi sumokeu sho pesu Aghulhu shikeu tsala tovekethiuye ninguno Filippi lo ashukaki lono cheve eno atsala pungu thiuno Troa lo panoqo gholo sulu, tile ninguno atsala tsuni puwove.
Troa lo Paul Ghuzu Ashekhau
7Sabat tsala avelau ningu kuposhukulu ghulhu shiniye kuhokumqoe. Paul no timiqo sasu kuptsa ae, eno thoghiu chevenikeu shi akehu paye zubumta kutolo atsa kuptsa ae. 8Ninguno aki jolha kungu-ulo kuho akeulo akulu kutomo ae. 9Eutikha ipikeu apumi lakhiye alashe mutsulo iqa-ae. Paul no shulo atsapi auvekehu, Eutikha ye cheyi zuhuve, ipuzu zucheyive kehu paye aki jolha akuthuu lono iluiqive, eno panonguno khapeqhelu kelo paye thive aghi. 10Ikemu Paul no iqi puzu pa dapesu zu eno pa u pesu pa vapeno panoqo vilo pi, “Yeyeshi kevilo, paye xu aphike!” 11Tishino pano aki jolha kunguu iku puzu achuqupu kusajeno chuve kethiu tsuthomoke kutolo pano sasu ado kushuwo kuptsa apuzu Paul ye cheve. 12Timiqono apumi hu thayi akilo sawuve eno shisheno panongu mlo kiqishive.
Troa lono Mileta lo Wuve
13Ninguye azuuno ashukakilo wuve puzu Aso kudau wuve, eno tilauno Paul pelo ningu gholo ikughi lupeniye shia. Pano ningu vilo tishilo pi puake, kughengu paye tilau alachesu ighinikeu shi ake. 14Kughou ninguno Aso lo pa sasu kusholu keno ningu gholo pa sasu ikughive eno ningu kumtsa Mityleni tolu. 15Ninguye tileno chesusu thoghiu Khia ghungu tolu, eno akuthunino Samos lo kathawo tolu ipuzu abidinino Mileta tolu. 16Ike Paul ye Asia lono ado puwokhave moni kehu Efesia hechesu tile ngomono wuvenikeu pughu pesu ae. Tolukepu shiaye Pentikost tsalani Jerusalem lo ngoluni ke ghenguno paye chokilheshi cheke.
Paul no Efesia lo Kupulumi Muchomiqo Khove
17Mileta tokelo Paul no Efesia lo aghini shipuwu, eno akukuholo kupulumi muchomiqo ighino pa sasu kusholo pi pipuwu. 18Kughou panoqono ighikeno Paul no ishi pi,
“Ino Asia yeghiqhalo ipukhu nesu tughu tsalani lono kishi nongu zulo xu acheni keno nongu ampino ithi ani. 19Judamino ipithive nikeu shike ghenguno anhezu kipiji eno pishipujukeu ishou ikughi pulaghi mutsha-ivu ghi Ampeu qeu shi achenie. 20Mishi gholomu luthu kilomu nongu kivipu kutsu piye kelo niye kiumu suchilevemoe. 21Judami vilo ghi Grikmi vilo ghi ishi Alhou kudau xaide ighinikeu eno ningu mpeu Jisu shou pulube nikeu shepe thumuyishi pithie. 22-23Eno itehiye, Aghungu Kimthe no itshuluvekeu gholu ghi Jerusalem lo wuni cheni, aphughi kumtsulo Aghungu Kimthe no ikutughu akeuno akughu shinikeu ngo shilukusano ikhe anie pikeu thono, tilau Jerusalem lo ishou kiu ikughi nani keno kutauye kiumu mthae. 24Alhou wu kupukini tsakiviu pesu kutughu nikeu kumlapu saje khikhi Ampeu Jisu no itsukeno tipau puzuchekeu shikupuluni malapi ani kethono ikuxu pesu ilikhi isala amekuapu shilu ani kemala pi kihichemoe. #2 Timo 4.7 25Ino ithi anike, nongu khunoqo gholo ino Alhou yehkipe pesu asheshu ache keno hinguno hilauye khilemu iju ithulumae. 26Ikehu ino akumtoshi ishi tsala lono nongu vilo pi ani, ike nongu gholo khuu khumu puhavekeuye imakho kumoe. 27Kughengu Alhou kupughu kumtsu pesu nongu vilo pikulha nikeu lono suchilepe puamoe. 28Nongu likhi nongu jukutsukiyi lo eno Aghungu Kimthe no nongu pelo jukidekuda peniaye qhipuatsukeu loji hu jukutsu-kiyi tsulo. Alhou kukuhou kheu shilo, tiye pa Nu kithi vechewo pawu shilupe puanike. 29Ino ithi anike, ino chevekethiuye tungtugha yikusaqono nongu gholo ighi nani eno kupulumiqo-loji hapiye-pighi nani. 30Nongu likhi nongu gholono kixikila tsa pinikemi ipeghive nani, eno kutsuluvekemi musu sasu pano papewuvepe nikeu shi nani. 31Tighenguno jukuto alo, ino anhezu thotsu piji ampe kuthu kutolo tamono putho pucho nongu lakhikhi shika chekeu kumsulualo.
32“Itehiye Alhou no nongu hiju penikeulo eno pawu kupukini tsape shikeulo nongu pesu ino kulhuqhi anie. Pa tsape shikeu huno nongu xaqhelu nani eno paw shiluvekemiqo gholo nongu mheghi ighilu penani. 33Niye timi khuu shuna-tsandi mu momu tiphimini mu alamine puamoe. 34Nongu ampino ithi ani ke, i-u peitha puzu ivehupu eno igholo chekeqo vehupu kumtsu mlaithatsu cheke. 35Ino pulhapuju nongu shipiye chekeuno, shishe aghimeshi mlapuzu tomo-chhimokeqo kuphumasa, eno Ampeu Jisu ampino hitoi pipuakeu tsa kumsulu kepue, ‘Tsukeuno lukeu nguno akumghapue.’ ”
36Paul no hi pikhave kethiu panongu kumtsu sasu qhoqhunhepe akighini shie. 37Panonguno pa vilo ileno wolo pi kinikile akelo panongu kumtsuno qau khave. 38Paul no pikeu tsa gholo kutau kumtsu nguno akhotouno panonguye pa sasu itaghi kushokilelu mae pikeu tsa huno panongu mlo ghimeqhive. Panonguno ashukaki kutolo pa sawo phe.
Iliyochaguliwa sasa
APOSTOLMI 20: SUMIBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
