APOSTOLMI 18
18
Korinthia lo
1Tishi kethiu Paul ye Athen qhive puzu Korinthia lo wuve. 2Tilehi Paul no Pontikus noghami Akuila ipike Judami lakhi sasu kusholu. Akuila ghi tiholono pa nipu Priskila sasu Itali yeghi lono ighi ae, kutau kumono Rom kukau Klaudia no Judami kumtsu vilo Rom phughi qhiveno chevelo pi ahza tsuke. Ike Paul no pama putsaniye wu, 3eno pama gholo ngove eno panongu kumtsa mla ache, kughengu pama hutoi Paul ye aphi-ki tsughu keu vechewo pa likhi pano peithakepu qechu-che. 4Sabat tsala atsu-tsu Sinagog lo wuno kutsala puzu Judami ngo Grikmi pelo mutsumishei ithipeniye pukaputsa.
5Kughou Sila ngo Timothi pamano Makedonia kudauno ighive keno, Paul ye ado kumtsu atsa hu pe asheshu ae, Judamiqo vilo Jisu ye Khristo kepi ashepe shie. 6Kughou Judami no pa hakha eno pa piputhauve keno Paul no pa makho kumoe pikeu shi-ghi pa phimini kuthopiye puzu panoqo vilo ishi pi, “Nongu kithiye nongu shouke! Tiye imakho kumoe! Hinguno hilau niye Judakumomi, lau wuniae.” 7Ikehu pano panoqo launo cheve puzu Judakumomi, Alhou sumsa chekemi lakhi paje Tito Jesto ipikeu nokilo ilove. Pa kiye Sinagog kiyixelo ake. 8Sinagog hoholo ayehkipeu Krispa ye pa kibolomi kumtsu sasu Ampeu kupulumi shive. Korinthiami kutomono Paul no pikeu tsa chilu puzu pululu eno baptiz shilu khae.
9Kijili lakhi Paul no kungunhetsu ithuluke tile Ampeu no pa vilo ishi pi, “Noye msa kevilo, ikemu tamono pialo, 10kughengu ino ogholo ani. Khunomu oshipusa mla nani, kughengu aphughi hipaulo iwu timi kutomo ani.” 11Ike paye ampe lakhino tuxa tile ngove eno Alhou tsa pesu timiqo shika ache.
12Kughou Galio pelo Akhaiya qhalo Rom kuka wu Ahng shivepe keno, Judami kumtsu kuqhano Paul tsuqu sasu kughakilo wu. 13Panonguno pikeuno, “Timi hipauye ayezah lono kuhakeu ghi timiqo musu sawo Alhou mlla penikeu pukaputsa ani.” 14Paul no atsa piniye shikemtsa Galio no Judamiqo vilo ishi pi, “Judamiqo, hiye akumo-kumla momu heqhi-buqhikeu tsakenapi aye ino tsaqui nongu tsa iniju tsuni cheke, 15ikemu hiye atsa ngo aje eno nongu yezah vehu kutsalakeu keke nongu likhi nonguno xathaluvelo. Niye hikithipu vehu kughatha amlae!” 16Tishieno kughaki lono pano panongu hapheve. 17Ikelo panonguno Sinagog hoholo sakipheu Sosthene tsuquluve eno kughaki zulono pa hethuve. Ikemu Galio no tipaulo kutulamu jusu tsumoe.
Antiok lo Idewo
18Paul ye ado kushuwa Korinthia lo ache puzu athikuzumiqo qhiveno Priskila ngo Akuila pama sasu Siriya lo wuniye ashukaki lono cheve. Ashukakilo chevemphi lono Kengkhria lo pa kutsusa miyeve, kughengu pano ashoqhi lakhi shikehu. #Akiki 6.18 19Panongu Efesia lo ighikelo, Paul no panoqo tile qhive, Paul ye Sinagog lo ilo puzu Judami sasu kutsalakile ae. 20Panonguno pa vilo ado ta ngo aghi lopi kemu pano pulomove. 21Panongu launo wuveniye akelo Paul no panoqo vilo pi, “Alhou pulou shi aghi aye, niye nongu lau ide ighini.” Tishieno ashukakilo ilo puzu Efesia lono cheve.
22Kughou pano Kaisaria tolu keno Jerusalem lo chesu iqho puzu Akukuhomi sasu kushokileluno tithiu Antiok lo iqive. 23Tile ado ta ngo apuzu paye cheve eno Galatia ngo Frugia qhalo a- a lakhilo wuno kupulumi kumtsu shikumto.
Efesia ngo Korinthia lo Apollo
24Judami lakhi paje Apollo ipikeu, ighono atsa pikithimi eno kuchoyesu tsaqutsaleyi ithi akemi huno Efesia lo ighi. Paye Alekzandria lono punukemi. 25Timi hipauye Ampeu laghilo akivishi shikaputhupe puakemi, eno paye Johan launo baptiz shilukeu likhi ithiakemu pano azukinishi Jisu ghili mutsumisheyi pesu pikulha eno kutsupiye cheke. 26Pano amlo kumto shi Sinagog lo pikulha che, ikemu kughou Priskila ngo Akuila pamano pa tsa chilu keno akilo pa sawo puzu Alhou laghi kithikiyi lhepe pa vilo pi. 27Apollo no Akhaiya yeghilo katha ikunikeu shi kughuve, ikehu Efesia lo kupulumiqono pa kuphu eno tilau kupulumiqo pelo alokivishi pa sasu peniaye yekili tsupuwu. Kughou pano tipa-a tokeno, Alhou kukupu lono kupulumi shiluvekeqo pano shishe kuphutsu. 28Kughengu pano kutsalakile kepulo mutotoi shi puzu aqo-aho gholo kighekelo Judamiqo gheqhi, eno Jisu ye Khristo kepi kuchoyesu lono kichepiye ke.
Iliyochaguliwa sasa
APOSTOLMI 18: SUMIBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
