APOSTOLMI 16

Timothi, Paul eno Sila

1Paul no akukuhou xuju susu Derbia ngo Lustra lo ghi ighi. Puluchekemi lakhi paje Timothi ipi puzu tile ache. Paza ghi kupulumi eno Judami ikemu papuh ye Grikmi ke. 2Lustra lo ngo Ikonia lo athikuzumi kumtsu no Timothi pipivi che. 3Paul no Timothi pelo pa gholo chepenishi, ikehu pano sawo pa phighu yiko ghavetsu. Kughengu Judami tipa-a lo akemi kumtsuno Timothi papuh ye Grikmi kepi ithi akehu. 4Pama aphughi khije lo wuni keno Jerusalem lo apostolmi ngo kupulumi kichimiqono kuptsathalukeu yeh timiqo pesu tsu eno panoqo vilo tipaulo akeu yeh pelulo pi pie. 5Ikelo akukuhouqo akupululo shikumto tsu, eno ghulo atsu-tsu kihi sulukemi alau shi ikowove.

Troa lo Paul Kungunhetsu

6Asia lo atsakiviu piwu nikeulo Aghungu Kimthe no hakhave kehu Paul ngo Sila pamaye Frugia ngo Galatia qhalo wuve. 7Kughou pamano Musia lughi ghungulo ighi keno Bithinia ghakhulo wunike pamano pukaputsa, ikemu Jisu Ghungu no pama pelo wupemoe. 8Ikehu pamano Musia qha kathasusu Troa lo iqive. 9Tipa ji kungunhetsu lakhi Paul lau ipeghi; Makedoniami lakhi puthugho puzu pa qhuiniju ghi pi, “Makedonia lo ighilo eno ni kuphutsulo!” 10Paul no kungunhetsu hipau ithuluve kethiu, ninguno Makedonia lo wuniye kuto, kughengu ningu pelo atsakiviu pesu panoqo vilo asheshu peniye Alhou no ningu kulu anikepi xathalue.

Filippi lo Ludia no Xukithelu

11Ninguno Troa qhive puzu ashukaki lono vejoi kathasu Samothraka lo wu eno thoqhiuno Niapolis tolue. 12Eno tileno Filippi lo wue. Hipau-aye Makedonia lo distrik atughiu phughike, eno Rommi no kughuna chekeu-a lakhi. Tilehi ninguno atsala hami ngove. 13Sabat tsalani ninguno aphughi nguno khalau aghoki muku kudau wuno Judamino akighini shi chekeu-a aghi nani kepi kumsua. Ninguno tile iqa puzu totimi tile kumqo aghikeqo putsa. 14Ningu tsa iniakeqo gholo totimi lakhi je ye Ludia. Liye Thiyatira ghami eno huzuyikeu tiphimini jechekemi, eno liye kuchou shi Alhou mllache. Ampeu no li mlo xukhotsu puzu li pelo Paul no pikeulo amlo tsuqhiyilu pe. 15Kughou lino abolomiqo sasu baptiz shiluve keno lino ningu ku-su ghi ishi pi, “Nonguno niye Ampeu pukhubelu vea ipi aghi aye ighino ikilo ngolo.” Tishieno lino ningu sasu wu.

Filippi lo Akughu shi

16Ghulo lakhi ninguno akighini alo wuchekelo timi qemi ilimi lakhino ningu sasu kusho. Li philo aghungu lhoksa lakhi ae, tino li pelo ighinikeu ghili pilupeche. Lino kutami ghenguno tumu tsukeu lono li mpiuno ye pisa kutomo qeluche. 17Lino Paul ngo ningu papesu ighamuku ishi pi, “Timi hipaqoye shishe Akiqheu Lhou qemiqoe! Panonguye timi vilo xakulupu la kutughu chekemie!” 18Lino ghulo atsu-tsulo hitoi shi ache. ike Paul no azuzuve puzu tsughuwo tughakusa ghungu vilo pi, “Jisu Khristo je lono ino oha ani, noye li launo ipeghi velo!” Tipa mtsa tughakusa ghunguno ipeghive. 19Li mpiunoqono panonguno pisa qeluchekeu la kuhavekeu ithive puzu, panonguno Paul ngo Sila pama tsuquluve eno aqo-kumqoke-alo ayehkipemi zulo pama sunhe sasu wu. 20Panonguno Rommi kijemi zulo pama saghino pi, “Timi hipaqoye Judami ke, eno panonguye niphughilo kupunasu anie. 21Panonguno ningu yezahlo kuhakeu akhu-ayeh kutau pesu asheshu cheni; ninguye Rommi keke tipau ikhilu momu pepimhe mlae.” 22Tile timi kumqo akeqo kumtsuno pama nguku akeulo pisuwukhave. Kijemi qono Paul ngo Sila pama phimini suxuvetsuno aqhe pesu pama ghaqhi nikeu ahza tsuve. 23Pama shishe ghaqhive kethiu panonguno pama akughukilo khathaveno akughumi kheu atou vilo pama tsaqui khathape puave lopi ahza tsu. 24Ahza hipau ithuluno akughukheu atouno pama kughape akughuki chebo akuthoulo su eno asulu kimshi dolo pama pukhu tshuvetsue.

25Ikemu zubumtalo Paul ngo Sila pamaye Alhou lau akighini shi, ale phe eno akughumi kutamino pama tsa ini ae. 26Zuleno ayeghi kughutha kije lakhi ighi eno tino akughuki tsukucho kumtsu tulavetsu eno paikhavino ahukikha kumtsu khaqhive, akughumi tshupe puakeu yikichhe kumtsu ikole ikiqive. 27Akughuki kheu atouno ida ithughi kelo akughuki hukikha khaqhi puaghi keu ithulu eno akughumiqo pokhavea kughashi kumsuveno pazuta sujope pa likhi pa pithiveniye kutove. 28Ikemu Paul no ighamuku pi, “Olikhi oghuza kevilo, ningu kumtsu hila aphike.” 29Ikelo pano akulu khu puzu zuyi iloghi, eno msa khokhoshi Paul ngo Sila pama pukhu phivilo ikiqi. 30Tishieno pama sasu khalau saipe puzu iniju, “Akijeu nokujo, ixalupe nike niye kiu shimayesa kya?” 31Pamano ishi pi, “Ampeu Jisu shou pulubelo tishi aye no eno okibolomi xaluve nani.” 32Eno pamano Ampeu tsa pesu pa eno pa kibolo akemi kumtsu vilo pi. 33Putho tipa tuqhudo lono pano pama sawo pama philo azaku qhuvetsuno mtazu pano pa kibolomi kumtsu sasu baptiz shiluve. 34Tishi puzu pano Paul ngo Sila pama sasu pa kilo wu eno kuchukusho kutope pama tsu. Pano Alhou lau pulubeluve kehu pa kibolomi kumtsu sasu pano alokivishive.

35Tishiwo thoghiu Rom kuka yehkipemino yehkhemi kijemi puwu puzu ishi pi, “Timi hupaqo phepuwuvelo.” 36Ike akughu kheu atouno hipatsa Paul vilo ishi pi, “Ayehkipemi no nokujo phepuwuvelo pivae. Ike nokujoye ipeghivelo eno amlo kiqishi wulo.” 37Ikemu Paul no kijemi vilo pi, “Nino kiumu kuqu mokemu panonguno mishi zulono ni hepuani, eno ninguye Rom ghakhumi ke! Ikeghi akughukilo ni khathave ishike. Ipuzu panonguye itehiye tuqhouno ni phepuwuveni pi ani kesha? Khilemu tishimlae! Rom kuka yehkipemiqo ampino hila ighieno ni ikhiphe masae.” 38Yehkhemi kijemino hipa tsa pewo ayehkipemiqo vilo pi, eno kughou panoqono Paul ngo Sila pamaye Rom ghakhumie pi chilukeno, panonguye msave. 39Ikehu panonguno ighi puzu pama qhuinijuno akughuki lono pama saipeghi puzu pama vilo aphughi tipau lono chevetsulo pi iniju. 40Pamano akughuki lono ipeghi puzu Ludia kilo wu. Pamano athikuzumiqo sasu kushono panongu mlo shikumto tsa pi puzu cheve.

Iliyochaguliwa sasa

APOSTOLMI 16: SUMIBSI

Kuonyesha

Shirikisha

Nakili