APOSTOLMI 12
12
Shikighimekeu Alaushive
1Hipa ghulokilo akukau Herod no akukuhomi khami shou aghime tsuthuve. 2Pano Johan thikuzuu Jems kutsu luvetsu. 3Hi shikeulo Judami lopu shikeu pano ithulu puzu pano wo Pitor ghi kughaluve. (Hiye kholaqhi sumokeu sho pesu Aghulhu shikeu ghuloki shi ae.) 4Pitor kughaluveno akughukilo suve, eno ghushimi bidi-dino amqo bidi shi qhipuzu aghukhe shighi khepenikeu shive. Hechekulu Ghulhu thiuno Herod ye timi aqha zulono Pitor shou atsa kughanikeu shiae. #Ipe 12.1-27 5Ikehu Pitor ye akughuki alou ghi khekutokupuyi pesu qhie. Ikemu akukuhouno pa ghenguno shishe Alhou vilo inikhu ae.
Akughuki lono Pitor Khaqhipheve
6Herod no kughakilo thoghiu pa sawuni keu shia. Ike tipaji Pitor ye aghukhemi kini dolo zuae. Ayikichhe kighi kinino pa tshupepua eno akughuki hukikhalo aghukhemino aghukhua. 7Paikhavi lono Ampeu wu kungumi lakhi tile puthugho eno akuvu lakhino achebolo yevuqaive. Pano Pitor bighilo tukini pa kudaputhu eno ishi pi, “Mtazu ithulo!” Ike Pitor ulono ayi kichhe kighi hu iko ikiqive. 8Tishino kungumi huno pi, “Opo khapuluve eno opukhu kuqho supuluvelo.” Pitor no tishiluve ikelo kungumino pi, “Okuuphi uluveno ipapelo.” 9Pitor no pa papesu akughuki khalau ipe, paye kungumino kiu shitsu ani keno kuchou kepi mthano ae, ikemu kungunhetsu ithulu ani kughashi kumsu ae. 10Pamano aghukhua atughiu ngo akiniu veche ipeve puzu aphughi kudau wuchekeu ayi khagholo ighie. Tino akutoshino pama khaqhi puwuve, eno ipe puzu pama kumtsa alaghila lakhilo cheche. Paikhavi lono kungumi huno Pitor qhiveno wuve.
11Tile Pitor ye atsuveshe alotsukhuyiluveno pi: “Kuchou ino ithivae, Ampeu no pawu kungumi hapuwu puzu Herod ulono eno Judamino shiniepi kumsu akeu kumtsu lono ihakholuvae.”
12Kughou pano ti kumsuluve keno, Johan Mark paza Maria kilo wuve. Timi kutomo tile kumqono akighini shi ae. 13Ike kughou pano ahukikha kukhu keno, aqeliu Rhoda no khaqhiniye ipeghi. 14Pitor tsapi michiluve puzu liye alokivi launo khaqhisu nike zuqhu pochilesu ilo puzu Pitor ye khalau puthugho aniepi pi. 15Kutamiqono li vilo, “Noye izuani keniae!” ipi pi; ikemu lino tsumomo kuchouke pi auve. Ike kutamiqono khochilepi, “Tiye kungumi pa kusau keniae.” 16Ikemu Pitor no kukhu awuve; eno kughou panonguno ahukikha khaqhi keno pa ithulu puzu shishe akichiqhive. 17Panongu pelo inaqhoive peniaye pano au kutsu piye, eno Ampeu no akughuki lono kishi pa saipeghiluve keno kishekulu lhepiye. “Hipau pesu Jems vilo ngo athikuzumi kutami vilo pilo” ipi pano pive. Ipuzu paye cheve eno a-a kutau wuve.
18Tsuthove kethiu, aghukhemi dolo Pitor ye kiu shivekela pi shishe mubumghu thuve. 19Herod no Pitor phujulo pi ahza tsukeulo pa phumlave. Eno aghukhemiqo iniju kidekudaju eno panoqo pithivepe nikeu ahza tsuve. Tithiu Herod ye Judia lono Kaisaria lo iqive eno tilau ache.
Herod Kithi
20Herod ye Turmi ngo Sidonmi shou axu idekeu ache, ikehu panonguno pa lau kumtsa amqo lakhi shi ighi. Atughushi panonguno Blasta mulo zuluve, paye akukau kilo peithakutsuu atou ke. Tithiu panonguno Herod lau wupuzu alakishi qhuinijue, kughengu panongu ghakhumiye akukau ghakhu lono achuqupu sukishe sughi cheke.
21Kihithapuakeu tsalani, Herod no akukau nanu pepuno pa kuka lakhulo iqa, eno pawu timiqo vilo asheshuae. 22Timi qono, “Hiye timi kumono alhou lakhi tsapi thono,” ipi ighamukue. 23Zuleno Ampeu wu kungumino pa hekuluqhive, kughengu pano ajekipi Alhou tsumo kehu; eno paye apitheno tsaqhi pithive.
24Ikemu Alhou tsaye vekupha eno alau shi ikowove.
25Barnaba ngo Saul pamaye kiu ghenguno puwukela shikupuve kethiu Jerusalem lono ideighive eno Johan khuu Mark ipi kuchekeno pama gholo sasu ighi.
Iliyochaguliwa sasa
APOSTOLMI 12: SUMIBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
